00:00:00 IGIHE NETWORK KN KINYARWANDA EN ENGLISH FR FRANCAIS

Filime ya Nahimana Clémence yegukanye igihembo mu iserukiramuco ryo mu Bwongereza

Yanditswe na Uwiduhaye Theos
Kuya 5 May 2022 saa 01:57
Yasuwe :

Filime ya Nahimana Clémence wamamaye mu rwenya nka Feruje yise ‘I Bwiza’ [Tenacity], igaruka ku buzima abahanzi babamo nyuma yo guhanga bikarangira hungutse abandi, yahawe igihembo mu iserukiramuco ribera mu Bwongereza.

Iyi filime yegukanye igihembo mu cyiciro cya Filime nziza yo muri Africa (Best Indie film from Africa) mu Iserukiramuco Best Indie Film Awards ribera mu Mujyi wa Londres mu Bwongereza.

Nahimana Clémence yabwiye IGIHE ko kwegukana iki gihembo, bigiye kumutera imbaraga zo gukomeza gukora kandi ko umuhate yagize wo kuyikora utabaye uw’ubusa.

Ati “Kwegukana iki gihembo ni umunezero. Birantera imbaraga n’icyizere cy’ejo hazaza nkaba nakora ibindi.”

Iki ni cyo gihembo cya mbere cyegukanywe n’iyi filime. Imwe mu nyungu zikomeye Nahimana agiye kugira ni uko filime igiye kumenyekanishwa n’abategura iri rushanwa.

Ibi bihembo byatanzwe muri Best Film Awards; byatangiye gutangwa guhera mu 2020 mu rwego rwo gushimira abantu bahize abandi muri sinema ku Isi yose.

I Bwiza ni filime ndende imara iminota 115 yanditswe inayoborwa ku bufatanye bwa Nahimana Clémence na Nturanyenabo Emmanuel, amashusho yayo afatwa na Sibomana Gilbert (One Hundred Pixels).

Yerekanywe tariki 15 Ukuboza 2021, mu cyumba cya sinema kigezweho Canal Olympia giherereye ku i Rebero.

I Bwiza ni filime ivuga inkuru y’umukobwa Gatoni Maya w’imyaka 23, ubarizwa muri koperative ikora ibihangano by’ubwoko bwinshi uhangana na Myasiro, umukire ubigurisha kuko abona abaha amafaranga make.

Urugamba rwo kuvuganira abahanzi, Gatoni Maya arufatanya n’urwo gutunga umuryango we, kwita kuri musaza we no kuvuza nyina.

Iyi filime igaragaza ubwiza bw’u Rwanda, uruhare rw’urubyiruko n’abagore mu iterambere. Ni umushinga wa Nahimana watewe inkunga na Imbuto Foundation ifatanyije na UNDP mu 2020 muri gahunda yo kuzahura inganda ndangamuco zagizweho ingaruka n’icyorezo cya COVID-19.

Nahimana mu minsi ishize ubwo filime yerekanwaga yatangaje ko intego nyamukuru yayo ari ukurwanya akarengane abahanzi bahura nako.

Yakomeje ati “Intego nyamukuru muri iyi filime ni ukurwanya akarengane abahanzi bahura nabyo.”

Nyuma yo kwerekanwa Filime I Bwiza nibwo yatangiye urugendo rwo kwitabira amaserukiramuco ya sinema hirya no hino ku Isi.

Feruje wakoze iyi filime yavuze ko igamije kurwanya akarengane gakorerwa abahanzi
Nturanyenabo Emmanuel ari mu banditse anayobora Filime I Bwiza. Aha hari umwaka ushize ubwo yerekanwaaga bwa mbere mu Rwanda
Muri iyi filime ‘Role’ ya Gatoni Maya ukina ari umukinnyi w’imena ikinwa na Kanoheli Christmas Ruth usanzwe azwi mu gutunganya indirimbo nka Chrisy Neat

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .