Izo filime zirimo ibihangange bizwi ku rwego mpuzamahanga nka Viola Davis, Michael B. Jordan, Rami Malek, Jason Statham, Nick Carter n’abandi bubatse amazina muri sinema haba muri Amerika, u Buhinde, Suède n’ahandi.

Hari izamaze kugaragara ku mbuga nka Netflix, Paramount+ na Amazon Prime, izindi ziboneka mu nzu za sinema ku Isi zirimo na Canal Olympia iherereye mu Mujyi wa Kigali. Zimwe muri izo filime zirimo:

“Odela 2”

Ni filime y’Abahinde iri mu Gi-Telugu gikoreshwa cyane muri icyo gihugu. Irimo abakinnyi bakomeye nka Tamannaah Bhatia, Hebah Patel na Vasishta N. Simha nk’abakinnyi b’imena. D. Madhu na Sampath Nandi nibo ba bayitunganyije.

Amashusho yafashwe na Ashok Teja yandikwa na Sampath Nandi. Igaruka ku nkuru ishingiye kuri “Odela Railway Station|” yagiye hanze mu 2022.

Ni filime ivuga kuri Odela Mallanna Swamy wiyemeza kurinda agace avukamo imbaraga za sekibi. Yagiye hanze ku 17 Mata 2025.

“G20”

Ni filime nshya yagiye hanze ku wa 10 Mata 2025. Igaruka ku nama y’abakuru b’ibihugu byo muri G20.

Iyo nama iba iri kubera muri Afurika y’Epfo. Nyuma yo gutangira kwayo ibyihebe biza gushimuta abaperezida batandukanye n’abandi bayobozi ba za guverinoma baba bitabiriye iyo nama.

Perezida wa Leta Zunze Ubumwe za Amerika, akoresha ubunararibonye aba yarakuye mu gisirikare, akarwanirira umuryango we baba bajyanye muri iyo nama ndetse n’abayobozi bagenzi be.

Iyo filime igaragara kuri Amazon Prime. Irimo abakinnyi bakomeye barimo nka Viola Davis ukina ari Perezida wa Amerika, Antony Starr, Marsai Martin n’abandi batandukanye.

“The Amateur”

Ni filime y’Abanyamerika yagiye hanze mu 2025 ivuga ku bikorwa byo kuneka. Yanditswe na Ken Nolan na Gary Spinelli. Ishingiye ku gitabo cyasohotse mu 1981 cyanditswe na Robert Littell, cyigeze no gukinwamo filime y’Abanya-Canada.

Ivuga kuri Charlie Heller. Uyu mugabo aba ari impuguke mu gusesengura no gusobanura amabanga y’ubutasi mu Rwego rw’Ubutasi rwa Leta Zunze Ubumwe za Amerika (CIA). Isi imwikaragiraho nyuma y’uko umugore we yiciwe mu gitero cy’iterabwoba cyabereye i Londres.

Iyo abayobozi be bananiwe gufata icyemezo ngo bakore iperereza cyangwa bihimure, Charlie ahitamo kubyikorera.

Iyo filime yayobowe na James Hawes, ikinwamo n’abakinnyi b’amazina akomeye barimo Rami Malek, Rachel Brosnahan,Caitríona Balfe, Michael Stuhlbarg, Holt McCallany, Julianne Nicholson na Laurence Fishburne. Yagiye hanze ku wa 11 Mata 2025 muri Leta Zunze Ubumwe za Amerika, ikwirakwizwa na 20th Century Studios.

“Until Dawn”

Hashize umwaka umwe nyuma y’uko umuvandimwe we aburiwe irengero, Clover n’inshuti ze bafata icyemezo cyo kujya mu kibaya cyitaruye aho uwo mushiki we yaherukaga kugaragara, bagamije gushaka ibisubizo.

Bageze aho, binjira mu nyubako ishaje y’abasura aho hantu nyaburanga. Bahura n’umwicanyi wahishe isura ubahiga umwe ku wundi, akabica urusorongo.

Iyi filime izajya hanze ku wa 25 Mata 2025 bigizwemo uruhare na Sony Pictures Releasing. Irimo abakinnyi bakomeye nka Ella Rubin, Michael Cimino, Odessa A’zion, Ji-young Yoo n’abandi batandukanye.

“A Working Man”

Iyi filime yagiye hanze ku wa 28 Werurwe 2025. Igaruka ku nkuru ya Levon Cade (Jason Statham mu buzima busanzwe), uba waravuye mu gisirikare akajya gukora akazi k’ubwubatsi.

Uyu mugabo aza gutangira gushakisha umukobwa ushimutwa n’itsinda ry’abacuruzi b’ibiyobyabwenge ndetse ndetse agahangana na bo ashaka kubohoza uyu mwana uba warashimutiwe mu kabari yajyanye na bagenzi be kwishimira ko basoje amasomo.

Uretse Jason Statham hagaragaramo abandi bakinnyi nka Jason Flemyng, Merab Ninidze n’abandi batandukanye.

Ni filime yakozwe bigizwemo uruhare n’ibyamamare nka Chris Long, Jason Statham ukinamo ari umukinnyi w’imena, John Friedberg, David Ayer, Sylvester Stallone wamamaye nka Rambo, Bill Block na Kevin King Templeton.

Iyo filime iri gukwirakwizwa na Amazon MGM Studios binyuze muri Metro-Goldwyn-Mayer.

“Gunslingers”

Ni filime igaruka ku mugabo washakishwaga cyane kurusha abandi muri Amerika. Nyuma yo kugaragara muri Kentucky, amateka ye yuzuyemo urugomo no kumena amaraso yongera kuburwa ndetse agakurikirwa n’itsinda ry’abantu bafite inyota yo kwihorera.

Abavandimwe barahangana, imitwe iracikagurika, amasasu atangira kuba urufaya mu mudugudu. Muri urwo rugomo, uwo mugabo uzwiho kurasa vuba ahinduka igihangange, agakanira abanzi be urubakwiye.

Ni inkuru ivuga ku buhungiro bwahindutsemo intambara, ukuri ku mibanire yabaye imvano yo kumena amaraso, n’uko uburyarya n’inyota y’amafaranga bishobora gusenya byose.

Ni filime yagiye hanze ku wa 11 Mata 2025, bigizwemo uruhare na Lionsgate Films.

“Ransom Canyon”

Ni filime yagiye hanze ku wa 17 Mata 2025 kuri Netflix. Ishingiye ku nkuru yo mu Mujyi muto wo muri Leta ya Texas, aho imiryango itatu ikomeye y’aborozi ihanganira ubutaka bwayo, umurage n’abantu ikunda.

Igaragaramo abakinnyi nka Josh Duhamel, Minka Kelly, Lizzy Greene, James Brolin, Eoin Macken, Meta Golding, Marianly Tejada, Jack Schumacher, Garrett Wareing na Andrew Liner. Iyi filime ifite ‘episode’ 10.

“Sinners”

Ni filime yakinwemo na Michael B. Jordan, iri mu zimaze igihe zitegerejwe na benshi. Ishingiye ku nkuru ya Michael B. Jordan ukinamo yahinduwemo babiri, we n’impanga ye baba basubiye mu mujyi bavukamo wa Mississippi Delta, bakaza guhura n’ibibazo byo guhangana n’ibiremwa by’umwijima.

Igaragaramo ibyamamare muri sinema nka Haile Steinfeld, Jack O’Connell, Wunmi Mosaku, Jayme Lawson, Omar Miller, Buddy Guy n’abandi benshi. Ni filime ifite iminota 137 yatangiye gukorwa muri Mutarama 2024.

Abayiganuye bwa mbere ni abo muri Leta Zunze Ubumwe za Amerika ku wa 03 Mata 2025, yinjiza miliyoni 4,7$.

Kuyikora byatwaye ari hagati ya miliyoni 90$ na miliyoni 100$. Ku bashaka kuyireba bari mu Rwanda bayibona muri Canal Olympia guhera ku wa 19 Mata 2025.

“The Glass Dome”

Ni filime y’uruhererekane y’Abanya-Suède yasohotse tariki ya 15 Mata 2025, ariko mu gihe gito cyane yahise yihuta ishyirwa mu 10 za mbere kuri Netflix. Yakunzwe bitewe n’uburyo iteye ubwoba.

The Glass Dome ivuga kuri Lejla, uba usanzwe ari umushakashatsi wiga ku bjyanye no kurwanya ibyaha, imiterere yabyo n’impamvu zibitera.

Agaruka mu gihugu cye cya Suède nyuma y’urupfu rw’umubyeyi wamureze. Ariko akigerayo, ibintu bihinduka bibi kuko inshuti ye y’akadasohoka yitwa Alicia ishimutwa mu buryo bumwe n’ubwo we ubwe aba yarigeze gushimutwamo akiri umwana.

Lejla yiyemeza kuguma mu mujyi no gukiza Alicia, ariko uko arushaho gushakisha ukuri, ni ko ibikomere by’ubwana bwe bigenda bigaruka.

“The Carters: Hurts to Love You, Angel Carter”

Ni filime mbarankuru igaruka ku muryango wa Nick Carter wamamaye muri Backstreet Boys, n’uko ubwamamare mu muryango wabo bwabagizeho ingaruka.

Igaruka ku buzima bwa bamwe muri aba bavandimwe barimo Aaron Carter witabye Imana mu 2022 afite imyaka 34 nyuma y’igihe arwana no kwigobotora ibiyobyabwenge ndetse n’ibibazo byo mu mutwe, na mushiki we Leslie na we wari warabaswe n’ibiyobyabwenge.

Muri iyi filime Angel Carter mushiki wa Aaron Carter wapfuye asobanura ingaruka ubwamamare bwo mu bwana bwagize ku buzima bwabo nk’umuryango.

Angel na musaza we Nick Carter basubiza amaso inyuma ku mateka yabo nk’umuryango, bose bakibaza icyateye urupfu rw’abavandimwe babo barimo Leslie, Aaron na Bobbie Jean, bose bishwe no gukoresha ibiyobyabwenge. The Carters: Hurts to Love You iboneka kuri Paramount+.