Isoko ifutse y’umuziki! Ibyihariye ku ishuri ry’umuziki ryahoze ku Nyundo (Video)

Yanditswe na Uwiduhaye Theos
Kuya 20 Ugushyingo 2018 saa 04:07
Yasuwe :
0 0

Hambere aha, kumva hari umuntu uhingutsa ko mu Rwanda hari ahantu ho kwigira umuziki bya kinyamwuga ntibyashobokaga, iyo wabazaga umuhanzi aho akomora impano ye yasubizaga ko yayivomye muri korali cyangwa ari ingabire yagabiwe na Rurema.

Uretse kuba nta shuri ryari rihari, birashoboka ko no kumvisha umubyeyi ko umwana we agiye kwiga umuziki bitari koroha kuko utafatwaga nk’umwuga watunga nyirawo, agahirwa ndetse akabarirwa mu bafite akayabo.

Ubu byarahindutse! Mu itangira ry’amashuri uhura na benshi bafite ibikapu wagira uwo ubaza uti urajya he?, ati “Ngiye kwiga ku ishuri ry’umuziki i Muhanga.”

Kuri bamwe inzozi zabaye impano, muri make ‘barasakiwe’. Ubu Leta yashimye aharyaga benshi, izana ishuri ry’umuziki riri gukarishya ubwenge ndetse hari benshi ryamaze guhindura intyoza mu gukirigita ibyuma bya muzika, kugorora ijwi, kwandika indirimbo n’ibindi.

Iri shuri rimaze imyaka ine ryatangiriye ku Nyundo mu Karere ka Rubavu ariko ubu riherereye i Muhanga ahahoze ishuri nderabarezi rya Kavumu College.

Ni imyaka mike rimaze ariko hari abarirangijemo bahagaze neza mu muziki nyarwanda ndetse bakomeje kwigarurira imitima ya benshi. Aba barimo; Igor Mabano, Yverry, Umuraperi Kaligombe, Ben Adolphe, itsinda rya Sebeya Band n’abandi.

Njya kurisura nasanze abanyeshuri barasoje amasomo bategereje gusoza umwaka. Natunguwe nuko nta n’umwe uba utuje ahubwo bahora bitoza ibicurangisho bitandukanye bya muzika, mbese umuziki wahindutse nk’amaraso abatemberamo.

Yaba abari mu buryamo, abari mu mashuri bagiye gukarishya ubumenyi cyangwa abari gutembera mu kigo nta gihe cyo kuruhuka no gutakaza, usanga buri wese agenda yivugisha asubiramo indirimbo cyangwa se afite gitari acuranga.

Dusubiye mu mateka y’iri shuri

Iri shuri ryatangiye mu 2014 ubwo Leta yahitagamo gutangiza ishuri ry’Ubumenyingiro ry’ibijyanye na muzika.

Murigande Jaques [Mighty Popo] yabwiye IGIHE ko iri shuri ryatangiye nk’andi mashuri menshi y’imyuga.

Ati “Ishuri rya Muzika ryatangiye turi ku Nyundo i Rubavu, ryatangiye nk’uko andi mashuri y’imyuga atangira. Hari hageze ko dutangiza ishuri ryigisha umuziki rijyanye n’ubumenyingiro, ryatangiye dufite abanyeshuri 30 ubu tukaba tugeze ku banyeshyuri 100.”

Kuva iri shuri ritangiye rimaze gushyira ku isoko ry’umurimo abanyeshuri bari hagati ya 50 na 55.

Ubu ryigisha amasomo atandukanye arimo; Piano, kuvuza ingoma, gucuranga ubwoko butandukanye bwa Guitar, Kuririmba [Vocals], uko umuhanzi yitwara ku rubyiniro, gushyira amanota mu muziki, gakondo, kuririmbira muri Korali, kwandika indirimbo, Igifaransa, Icyongereza no gutunganya ibihangano.

Abarijyamo barivuga imyato

Ruzima Bill wiga mu mwaka wa nyuma muri iri shuri, usanzwe ari n’umwe mu bagize itsinda rya Yemba Voice, ritangiye gukomera muri iki gihe yabwiye IGIHE ko kwiga muri iri shuri byamuhinduye uwundi ubu akaba amaze kuba kabuhariwe mu bijyanye na muzika.

Ati “Ubundi mbere ntaratangira kwiga umuziki ntabwo nari mfite ubumenyi bwuzuye ariko maze kumenya byinshi biwerekeye. Uburambe maze kugira ni uko ubu nshobora kuririmbira abantu benshi nta bwoba mfite. Njye umuziki watangiye kunyinjiriza ubwo natangiraga kwiga ku Nyundo.”

Ibi abihuriraho n’abandi banyeshuri batandukanye twaganiriye bakakubwira ko nibasohoka muri iri shuri bazaba bamaze guhinduka abandi bandi.

Nari meze nk’igiti gifite imizi idashoye kure mu butaka…

Iri shuri kuri bu ryigamo abahanzi batandukanye bari basanzwe bakora umuziki bagiye batungurana bakagaragara bari mu bashaka kwiga muri iri shuri, ubwo hatangiraga igikorwa cyo gutoranya abagomba gutangirana n’icyiciro cya 2018.

Muri abo bahanzi harimo; Danny Nanone, Lanie na Derek wo mu itsinda rya Active.

Danny Nanone yiga ibijyanye no gutunganya indirimbo, kuvuza ingoma, gucuranga piano no kubyaza umuziki inyungu.

Yabwiye IGIHE ko kwiga muri iri shuri bimaze kumwungura ubumenyi ku rwego ruhambaye, kuko ubu ashobora kumenya uko akorana n’abacuranzi mu buryo bworoshye mu gihe ari ku rubyiniro ndetse akaba ashobora kwitunganyiriza indirimbo akayishyira utunganya indirimbo ‘Producer’ agiye kuyinoza gusa.

Ati “Ubunararibonye bufatika bwa mbere nakuye muri iri shuri rya muzika, ni ukuvuga ngo hari ibintu byinshi nari nifitemo nk’impano muri njye ariko ntazi uko nabikoresha. Mfite icyizere ko noneho mu muziki nshobora kuzakora umuziki imyaka myinshi kuko nzi ibyo nkora.”

Yakomeje avuga ko yari ameze nk’igiti kinini cy’ingazamarumbo ariko gifite imizi iri hafi ku buryo umuyaga uje wahita ukirimbura byoroshye.

Ati “Mbere ntarajya kwiga umuziki rero nari meze nk’igiti kinini gifite imizi ariko idashoye kure mu butaka, Danny Nanone baramuzi n’ubundi ndacyari nk’uko nari meze ariko noneho nashakaga gushora ya mizi ku buryo umuyaga uje utapfa kumpungabanya. Umwanya mfite ngiye kuwisubiza nongereho na bwa bumenyi mfite mu muziki.”

Umuhanzikazi Lanie nawe wiga muri iri shuri, yavuze ko yahoze yifuza kwiga umuziki kuva kera ndetse akemeza ko kuva atangiye kuwiga hari byinshi amaze kunguka birimo kumenya kuririmba gakondo no gucuranga ibicurangisho bitandukanye.

Ryahuruje amahanga

Muri Kamena uyu mwaka abanya-Canada bagera kuri bane baje kwihugura mu bijyanye na muzika no kwimenyereza muri iri shuri.

Aba banyeshuri bari basanzwe biga mu ishuri rya Selila ryo muri iki gihugu naryo ryigisha ibyerekeye umuziki.

Uwitwa Jelayna Murdoch yabwiye IGIHE ko ari ishema kuri we kuba yaraje kwihugura ku bijyanye na muzika mu Rwanda kuko hari ibyo amaze kunguka mu gihe cy’amezi asaga atanu ahamaze.

Ati “Maze kunguka byinshi mu gihe maze nimenyereza mu buryo butandukanye ibijyanye na muzika, hari ibyo nungutse mu muziki gakondo w’u Rwanda ndetse no ku muki ugezweho. Maze kugira ubumenyi buhagije nk’umwarimu ku buryo mu gihe nzaba nsubiye iwacu nizera ko hari icyo nzaba njyanyeyo.”

Yashimye cyane uburyo abanyeshuri bigishwa muri iri shuri rya muzika, avuga ko ikintu cya mbere azajyana iwabo ari ukwigisha abandi uburyo bwo kwitwara ku rubyiniro kuko biri mu byo akundira aba banyeshuri.

Umwaka utaha ishuri rishobora guhindurirwa izina

Iri shuri umwaka utaha rifite gahunda yo guhindura imikorere rikitwa ‘School of Creative Arts’ ndetse rikagira inzu yihariye izajya itunganya umuziki.

Mighty Popo ati “Hano ni hagari tuzahavugurura muri ibi biruhuko, tugiye kubaka Studio itunganya muzika. Uretse abiga hano nabo hanze bashobora kuzajya baza tukabafasha. Ni kimwe muri gahunda dufite hano ndende cyane mu gutanga umusanzu mu ruganda rwa muzika.”

Yakomeje avuga ko bashaka no kuzana andi masomo yihariye ajyanye no gutunganya filimi nko kuzandika, kiziyobora no kuzikina ndetse by’umwihariko bagashyiraho n’isomo kubashaka kumenya uko bandika ibigomba gukorwa mu mashusho y’indirimbo y’umuhanzi.

Imihigo ni yose …

Mighty Popo yavuze ko bashaka kuzana uburyo bworoshye ku buryo buri muntu wese ushaka kwihugura mu bya muzika kandi mu gihe gito ashobora kwiga mu buryo bworoshye kandi bitabangamiye izindi gahunda ze.

Ati “Ibyifuzo ni byinshi […] nko mu myaka itanu cyangwa icumi twifuza kuzana porogaramu yo kwigisha abantu mu gihe gito, tukareba ukuntu abahanzi benshi bo mu Rwanda bashobora kuba barayiciyemo, bashobora kuba batifuza kwiga mu myaka itatu ariko noneho tuzatangiza uburyo kwiga mu gihe gito nk’umwaka ndetse n’amezi atatu n’atandatu.”

Yakomeje avuga ko bafite gahunda yo kuzashyiraho kaminuza y’iri shuri izajya iha abahanzi bamaze gusoza amasomo muri iri shuri bakaba bakomeza.

Bisaba iki kwiga muri iri shuri?

Iyo umwaka w’amashuri ugiye gutangira habaho kuzenguruka igihugu cyose hashakishwa impano zitandukanye, abatsinze muri ibyo byiciro bakagenda bahura n’abandi kugeza hatoranyijwe abagomba kwiga muri iri shuri ritangiye kuba ubukombe mu Rwanda no hanze.

Kuryigamo bisaba nibura kuba warasoje amashuri atatu cy’icyiciro rusange cy’ayisumbuye.

Buri munyeshuri yishyura 120 000 Frw buri gihembwe yiyongeraho ayo kugura imyenda n’ibikoresho by’ishuri, iyo ari mu bihe by’itangira ry’amashuri.

Ubuzima bw'abanyeshuri ni umuziki
Abiga umuziki mu ishuri ry'i Muhanga bitoza gukoresha ibicurangisho bitandukanye
Abanyeshuri baba bakina ariko banasubiramo indirimbo z'abahanzi batandukanye
Billy uririmba muri Yemba Voice avuga ko amaze kunguka byinshi
Jalayna Murdoch avuga ko amaze guhaha ubumenyi buhambaye mu gihe amaze akorera imenyereza mu ishuri rya muzika
Mighty Popo uyobora iri shuri rya muzika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza