00:00:00 IGIHE NETWORK KN KINYARWANDA EN ENGLISH FR FRANCAIS

Stromae yashize hanze album nshya, Harmonize na Bruce Melodie bahuza imbaraga… indirimbo nshya za weekend

Yanditswe na Uwiduhaye Theos
Kuya 6 March 2022 saa 11:13
Yasuwe :

Mu mpera za buri cyumweru IGIHE yiyemeje gukora urutonde rw’indirimbo zitandukanye nshya z’abahanzi yaba abakizamuka ndetse n’abamaze kubaka izina. Ni gahunda igamije guteza umuziki nyarwanda imbere.

Ni urutonde rukorwa nta kindi gikurikijwe ahubwo ari ukureba gusa indirimbo yasohotse. Ubu twakusanyije indirimbo ziheruka twabashije kubona.

Album ya Stromae yari itegerejwe na benshi yasohotse …

Umuririmbyi w’Umubiligi ukomoka mu Rwanda, Paul Van Haver [Stromae], yashyize hanze album nshya yise ‘Multitude’ igizwe n’indirimbo 12.

Indirimbo zigize iyi album zirimo “Invaincu”, “Fils de joie”, “Mon amour”, “Pas vraiment”, “La solassitude”, “Mauvaise journée, “Bonne journée”, “Déclaration”, “C’est que du bonheur” na “Riez”. Izi uko ari 10 zije ziyongera ku zindi zagiye hanze mu minsi ishize zifite amashusho zirimo “Santé” na “L’enfer”.

Muri Mutarama mu kiganiro yagiranye na Televiziyo yo mu Bufaransa ya TF1 yavuze ko izi ndirimbo zose zikoze mu buryo butandukanye kuko uyu muhanzi avuga ko yakoreshejeho ibicurangisho byinshi birimo ibyo muri Aziya, Amerika y’Epfo na Afurika.

Ngo impamvu album ye yayise ‘Multitude’ ni uko iriho uruvange rw’ibintu bitandukanye.

Ushaka kumva iyi album ku mbuga zitandukanye zibarizwaho umuziki Wakanda hano: https://stromae.lnk.to/Multitude

Narakwiringiye

Ni indirimbo nshya ya Nyinawumuntu Grace uri mu bahanzi bari kuzamuka neza mu muziki wo kurya Imana. Iyi ndirimbo ivuga ku kugira neza kw’Imana.

Yabwiye IGIHE ko yayihimbye nyuma y’uko Imana imwibukije indwara ikomeye yamukijije akiri umwana. Ati “Nashimiraga Imana ku bw’ineza yayo mu buzima bwanjye ariko by’umwihariko bishingiye ku gitangaza yanyibukije yankoreye ndi umwana. Yankijije indwara yari inkomereye binyuze mu nzozi.”

Aranzi

Ni indirimbo nshya y’umuhanzi Adrien Misigaro. Igaruka ku mirimo Imana ikorera abantu. Hari aho uyu muhanzi aririmba ati “Aranzi azi byose byanjye. Niyo ndyamye ansegura urukundo rwe. Sinkigira ubwoba ku bw’imirindi y’ababi, ubwo mufite none nta cyankura umutima.”

Byose bihira abakunda Imana

Ni indirimbo Emmy Pro yahurijemo hamwe abaririmbyi bakomeye muri Kiliziya Gatolika bahuriye mu itsinda rya Rwanda Catholic AllStars ndetse na Aline Gahongayire uzwi mu ndirimbo zo kuramya Imana.

Iyi ndirimbo yahimbwe na Sr Fébronie Kamana, wabwiye IGIHE ko yashakaga kugaragaza ko abantu bagira ibibazo ariko byagera ku bakunda Imana hakazamo itandukaniro.

Narababariwe

Ni indirimbo y’umuhanzi Twagiramungu Emmanuel ukoresha amazina ya T-WAGG uri bafashe iya mbere mu kuririmba Drill Music mu ndirimbo zihimbaza Imana. Iyi ndirimbo ye igaruka cyane ku kuntu Yesu yunze abantu n’Imana ubwo yemeraga kubambwa ku musaraba.

Umutima uramwenya

Ni indirimbo y’umuhanzi Methuselah Sax Water ukora injyana ya Afro Jazz akaba n’umucuranzi wa Saxophone. Iyi ndirimbo ye nshya iri mu njyana ya Romantic Blues. Yabwiye IGIHE ko yayituye abakundana by’ukuri kandi babasha akabasabira umugisha ku Mana.

Bafana bafana

Ni indirimbo ya Butera Knowless, Bulldogg na Fireman. Ni indirimbo yumvikanamo amagambo akomeye, aba bahanzi berekana urugendo batangiriyemo kuva mu myaka ya 2008 kugeza uyu munsi bagikora.

Buri wese muri iyi ndirimbo aba yumvikanisha ukuntu yatangiye umuziki bigoranye ariko kugeza ubu ukaba hari urwego umaze kugeraho nubwo hakiri inzitizi. Kimwe mu byo aba bahanzi bagarutseho kandi gikunze kugarukwaho, harimo gusuzuguza abahanzi nyarwanda bakarutishwa abanyamahanga.

Nkatira

Ni indirimbo y’umuhanzi Javanix yafatanije na FAX Rapper uvukana na David Pro. Ni indirimbo ku muntu uba waramaze kwiheba kubera kuba ruharwa mu gukora ibyaha. Javanix wakoze iyi ndirimbo akorera umuziki mu Ntara y’Iburengerazuba, mu Karere ka Rusizi. Yavutse mu 1995. Aheruka gushyira hanze album mu minsi ishize yise ‘Virus’.

Cash Out

Ni indirimbo y’umuraperi Red Ink ndetse na Kivumbi King. Ni indirimbo yahimbiwe abanyabirori. Iyi ndirimbo igiye hanze nyuma y’izindi RedInk aheruka gushyira hanze zirimo “Hit Skinks”, “Akiryo”, “Ndikwirukanka” yakoranye na LoganJoe, Og2tone, Kenny K shot na Trizzie 96.

Tugende

Ni indirimbo ya Eric Mabano Kagame wamenyekanye mu muziki nka Mr Kagame iri kuri album aheruka gushyira hanze ari nayo ye ya mbere yise ‘Goligota’ yahurijeho abahanzi batandukanye bakomeye mu Rwanda.

Iyi album iriho indirimbo 10. Zirimo izo yahuriyemo n’abahanzi nka Theo Bosebabireba, Ariel Wayz, Cally, Herbert Skillz, DJ Marnaud na Nessa. Iyi album iriho indirimbo zitandukanye nka Bwombo, Mukunzi, Kiliziya, Akanini k’icumi n’izindi.

Reba indirimbo zose zigize album ya Mr Kagame: https://open.spotify.com/album/3HDWP3IyoI5N58iKgzXrdE?si=lHJXzFx4QZuk04cZux5PIw&utm_source=copy-link&nd=1

Abazimu

Ni indirimbo y’umuhanzi Nitwa Rucogoza Brighton ukoresha amazina ya B Bright. Uyu muhanzi iyi ni iya kane mu ndirimbo afite. Yavuze ko igitekerezo cyo kuyikora mu buzima urubyiruka ruri gucamo ubu kandi na none n’agahinda gakabije abantu bafite kubera ibibazo by’iyi si ahitamo kubikoramo indirimbo.

Umunyabigwi II

Ni Extended Play[EP] nshya y’umuraperi Kenny Barikage ukoresha amazina ya Og2tone ivuga ku buzima bw’abaraperi bwo ku mihanda. Iyi EP y’uyu muhanzi yahuriyeho na bagenzi be barimo Logan Joe, Trizzie Ninety Six, Kenny k-shot na Ririmba.

Indirimbo ziriho zirimo nka ‘Crazy’ , ‘Sodoma’, ‘Street Melodies’, ‘Mbikuzurize’ yakoranye na Logan Joe, ‘Loyalty’, ‘Shooters’ yahuriyemo na Kenny K-Shot na Trizzie Ninety six, ‘Friday’ na ‘Benitha.

Kimomo

Ni indirimbo nshya aba bahanzi bashyize hanze nyuma y’imyaka ine umwaka ushize iri tsinda ryari rimaze risa n’iricecetse mu muziki. Umwaka ushize ryari ryasubukuye ibikorwa by’umuziki nyuma y’igihe bivugwa ko ryasenyutse.

Tariki 2 Ugushyingo 2021, nibwo iri tsinda riherekejwe na Dondada Ent bagiranye ikiganiro n’abanyamakuru, mu rwego rwo kumurika amasezerano y’imyaka itandatu baherutse gushyiraho umukono. Icyo gihe bashyize hanze EP [Extended play record] bise ‘Activity’ iriho indirimbo eshatu. Izo ndirimbo ni Amabara, Madamazela na Tequiero.

Iyi ndirimbo y’aba basore nshya ivuga ku musore uba utaha umukobwa avuga ko afite ubwiza budasanzwe.

Kakandi

Ni indirimbo y’umuhanzi Bourchaga uba uririmba umuntu wemerwa na benshi ariko mu by’ukuri ari umuntu w’umukene udafite ibikorwa na bike. Iyi ndirimbo yakoze mu buryo bw’amajwi na TidyBeats naho uwitwa The ProHab akora Mixage na Mastering. Amashusho yafashwe na Mozey afatanyije na Olaf Datus na Director C.

Dudu

Ni indirimbo nshya y’umuhanzi Kevin Kade. Iyi ndirimbo igaruka ku musore uba usaba umukobwa ko bafatanya umunezero bakishima kakahava. Kevin Kade amaze iminsi ari gukorera ibikorwa bye bya muzika muri Kenya.

Crazy

Ni indirimbo nshya ya Bruce Melodie yafatanije n’Umunya-Tanzania Harmonize. Iyi ndirimbo igiye hanze nyuma yaho aba bahanzi bari bamaze iminsi bagaragaza ko bafitanye ubucuti budasanzwe ndetse Harmonize yagaragaje ko ashyigikiye Bruce Melodie ubwo yiteguraga gukora igitaramo cy’imyaka 10 yari amaze mu muziki umwaka ushize.

Ijipo

Ni indirimbo nshya y’umuhanzi Afrique yafatanyije n’uwitwa Last Born. Iyi ndirimbo aba bahanzi bagaragaza ko umuntu amenyekana ariko abantu aho kumuha amafaranga ahubwo bakamuhata inzoga ndetse n’abakobwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .