00:00:00 IGIHE NETWORK KN KINYARWANDA EN ENGLISH FR FRANCAIS

Indirimbo nshya zagufasha kuryoherwa na Weekend

Yanditswe na Uwiduhaye Theos
Kuya 28 May 2022 saa 08:53
Yasuwe :

Nk’uko bisanzwe bigenda mu mpera za buri cyumweru IGIHE ibagezaho urutonde rw’indirimbo nshya z’abahanzi barimo abamaze kugera ku rwego rukomeye n’abakizamuka.

Ikigamijwe ni ugutanga umusanzu mu iterambere ry’umuziki no gufasha abadukurikira kuruhuka no kunogerwa n’impera z’icyumweru.

My day

Ni indirimbo Symphony Band yashyize hanze iyihuriyemo na Bwiza nyuma yo kuba yari irimo Ariel Wayz ariko uyu muhanzi bakavuga ko yabagoye kugeza aho byarangiye akuwemo.

Iyi ndirimbo y’urukundo igaruka ku bantu bakundana baba baterana imitoma umwe abwira undi ko amufasha akagira umunsi mwiza buri gihe.

Hari aho baririmba bati “Ndakwinginze mbwira ko unkunda kandi buri gihe uzahaba ku bwanjye.”

Ndanezerewe

Ni indirimbo iri mu zigize Extended Play [EP] umuhanzi witwa Da Promota y’indirimbo esheshatu yahurijemo abandi bahanzi batandukanye aheruka gushyira hanze.

Iyi EP uyu muhanzi yayise ‘Saba’ iriho izindi ndirimbo nka ‘Intambwe’ yahuriyemo na Emmy Vox, ‘Nyobora’ yakoranye na Sean Brizz, ‘Baba wangu’ na ‘Ha agaciro’ yakoranye na Mandela.

Inana

Ni indirimbo y’urukundo y’Umuririmbyi Nsengimana Rukundo Christian uzwi nka Chriss Eazy. Aba aririmba asaba umukobwa kumuha umwanya akamwereka byinshi mu rukundo.

Chriss Eazy yatangiye gukorana na Junior Giti mu 2020 akimara gusoza amashuri yisumbuye. Amaze gukora indirimbo zakunzwe zirimo iyitwa ‘Fasta’, ‘Amashu’, ‘Kanjenje’ yahuriyemo na Papa Cyangwe, ‘Amashimwe’ yakoranye na Fireman n’izindi z’abandi bahanzi yagiye agaragaramo.

Akamararungu

Ni indirimbo y’umuhanzi w’indirimbo gakondo Munyakazi Deo. Yabwiye IGIHE ko yayihimbye ashaka gukumbuza abantu ibihe bya kera internet itaraza ariko ashaka no gutanga impanuro mu buryo butandukanye.

Ni iya gatatu kuri album uyu musore ari gukora yitegura gushyira hanze mu minsi iri imbere.

Big Move Mixtape I

Ni Mixtape y’umuhanzi Ingabire Sandra ukoresha amazina y’ubuhanzi ya Dylan Flex. Uyu muhanzi w’imyaka 18 abarizwa muri Label ya House of Rumuli ya Tn Zethy.

Ni yo mixtape ya mbere ya Dylan flex iriho indirimbo zirindwi yakoranye n’abahanzi bagiye batandukanye barimo nka Olluwa Ndondo , Bruce the 1st, Jumpy Boyz, Soldier Kid, Taykun, Kenny K-Shot n’abandi.

USHAKA KUREBA IYI MIXTAPE WAKANDA HANO
Fake Gee

Ni indirimbo nshya y’Umuhanzikazi Shengero Aline Sano [Alyn Sano] uri mu b’igitsinagore bari kwigaragaza cyane mu muziki nyarwanda. Igaruka ku guhanura abasore babeshya abakobwa urukundo bashaka kubatesha umwanya.

Uyu muhanzikazi agiye gushyira hanze album ye ya mbere yise ‘African Lioness’ cyangwa se ‘Intare y’ingore y’inyafurika’. Ni album izaba iriho indirimbo 12.

Alyn sano yatangiye umuziki mu buryo bw’umwuga mu 2016. Yamenyekanye cyane mu myaka yo mu 2018 mu ndirimbo zitandukanye zirimo iyo yise ‘Naremewe Wowe’ n’izindi.

Ndarura

Ni indirimbo nshya y’umuhanzi Juno Kizigenza. Ivuga ku musore wiyemeje gukunda umukobwa umwe akavuga ko yamaze kumurarura burundu.

Iyi ndirimbo yashyize hanze nyuma y’igihe gito asohoye izindi zirimo iyo yise ‘Urankunda’ na ‘Loyal’. Mu buryo bw’amajwi iyi ndirimbo nshya yakozwe na Element Eleéeh muri Country Records mu gihe Mix na Mastering yakozwe na Bob Pro. Amashusho yafashwe na Nkotanyi Frery.

Merci

Ni indirimbo ya Juda Muzik, ikebura abantu bakunda kujya kwivanga mu rukundo rw’abantu bikaba byatuma batana. Darest uri mu bagize iri tsinda yabwiye IGIHE ko baririmbye inkuru mpamo.

Juda Muzik igizwe n’abasore babiri barimo Junior ubusanzwe witwa Mbaraga Junior Alex na Darest ubusanzwe witwa Ishimwe Prince.

Clout

Ni indirimbo ya Ish Kevin na Ycee wo muri Nigeria iri kuri mixtape aheruka gushyira hanze yise “‘Trapish II” ikubiyemo inkuru zitandukanye ziganjemo izigaruka ku buzima yagiye anyuramo mu myaka amaze ku Isi n’iyo mu muziki. Iriho indirimbo zirindwi.

Muri iyi ndirimbo yise Clout yahuriyemo n’umuhanzi w’icyamamare mu muziki wa Afurika, Oludemilade Martin Alejo wubatse izina nka Ycee, aririmba agaragaza ko abakobwa basigaye bicuruza ku manywa y’ihangu kandi ku bantu bababyaye.

Fresh

Ni indirimbo nshya ya Nel Ngabo yifashishijemo Kayumba Darina wabaye Igisonga cya kabiri mu irushanwa rya Miss Rwanda kimwe n’abandi bantu bakomeye mu myidagaduro y’u Rwanda.

Uretse Miss Kayumba, Nel Ngabo yifashishije abandi barimo Knowless, Platini, Iradukunda Bertrand rutahizamu w’Ikipe y’Igihugu Amavubi, Sabine Mutabazi witabiriye Miss Rwanda, OG The General n’abandi benshi.

Iyi ndirimbo nshya ya Nel Ngabo ibaye iya mbere asohoye itari kuri album ye ya kabiri RNB360.

Ndakwibutse

Ni indirimbo nshya ya Annette Murava uri mu bahanzi bari kwitwara neza mu muziki wo guhimbaza Imana. Igamije guhumuriza abantu bihebye kubera ibibazo byinshi bari kunyuramo muri iki gihe.

Annette Murava ubusanzwe asengera muri Eglise Vivante i Kabuga. Uyu muhanzikazi yatangiye umuziki mu 2015 ku giti nyuma yaho yari amaze igihe kinini aririmba muri za korali.

Inkuru nziza

Ni indirimbo ya Ben & Chance bafatanyije na James&Daniella. Izi ‘Couples’ zose zizwiho kuba ziri mu zifite igikundiro gihambaye muri muzika Nyarwanda.

Muri iyi ndirimbo nshya bagaragaza ko Imana yabakunze igatanga umwana wayo ku musaraba kugira ngo abari mu isi bacungurwe.

Niwe

Ni indirimbo y’umuramyi Chryso Ndasingwa yafatanije na Fidele Niyo. Igaruka ku kuntu ubuhungiro abantu bafite no gutabarwa ari iby’Imana kuko ariyo idakoza isoni. Amashusho y’iyi ndirimbo yafashwe mu buryo bwa live.

Igitondo

Ni indirimbo nshya y’umuhanzi Danny Mutabazi uri mu baramyi bo mu itorero rya ADEPR. Iyi ndirimbo ibwira abantu bacitse intege mu rugendo rujya mu ijuru ko bakwiriye gukomeza gushikama kuko rugikomeje.

Danny Mutabazi yatangiye kuririmba mu 2004 abarizwa muri korali z’abana, impano ye yaje gukura kugeza mu 2015 ubwo yatangiye kuririmba ku giti cye.

Nduhiwe

Ni indirimbo nshya ya Shalom Choir ADEPR Nyarugenge. Iyi ni indirimbo y’ishimwe ku Mana idahwema kurinda abantu bayo umunsi ku wundi.

Korali Shalom imaze imyaka 36 itangijwe ni ubuheta mu makorali y’i Nyarugenge nyuma ya Hoziana yayitanze mu ivugabutumwa ry’indirimbo.

Yashinzwe mu 1986 ari korali y’abana bato, yitwaga “Umunezero”. Icyo gihe muri ADEPR Nyarugenge hari korali nkuru imwe ariyo Hoziyana. Mu 1990 yemerewe kwitwa izina ifata “Shalom”.

Nshuti Masengesho

Ni indirimbo nshya ya Korali Agape ikorera umurimo w’ivugabutumwa muri ADEPR Nyarugenge.

Iyi korali izwi mu ndirimbo zitandukanye zirimo “Abasirikare”, “Waramamaye”, “Gucungurwa”, “Dawidi”, “Turayisenga ikumva” n’izindi.

Indirimbo yayo nshya “Nshuti Masengesho” yubakiye ku magambo yo kwifuriza abakunzi b’indirimbo zihimbaza Imana ‘guhora basenga’.

Ubwo butumwa bugira buti “Hamwe n’iyi ndirimbo, tubifurije guhora musenga kandi mwongere musenge. Mwuka Wera abashoboze, we utunihira iminiho itavugwa.’’

Komeza icyo ufite

Umunyamakuru wamenyekanye kuri Radiyo Umucyo, mu biganiro bitandukanye, birimo Umucyo Gospel Zoom ( kigaruka ku makuru y’Iyobokamana), Ikiganiro Special Night n’ibindi, wamenyekanye ku izina rya Sam, yashyize hanze indirimbo yise, “Komeza icyo ufite’’ ikangurira abantu bamenye Yesu Kirisitu kumugumaho.

Iyi ndirimbo yanditswe mu 2021. Ubutumwa buyikubiyemo yabutekerejeho nyuma yo kubona hari abantu benshi bitewe n’ibibazo bya Covid-19 bagiye barambika hasi iby’agakiza.

Yesu Ni Muzima

Ni indirimbo nshya y’umuhanzi Job Batatu. Ni umuhanzi umaze igihe mu muziki uhimbaza Imana ariko akagira umwihariko wo kuririmba anacuranga cyane ko azi gucuranga piano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .