Munyanshoza Dieudonné yahawe inka ebyiri z’ishimwe

Yanditswe na Munyengabe Murungi Sabin
Kuya 19 Nyakanga 2016 saa 08:17
Yasuwe :
0 0

Umuririmbyi Munyanshoza Dieudonné wamamaye nka Mibirizi yahawe inka ebyiri z’ishimwe nyuma y’iminsi mike asezerewe mu gisirikare cy’u Rwanda akajya mu kiruhuko cy’izabukuru.

Kuwa Gatandatu tariki ya 16 Nyakanga 2016, inshuti za Munyanshoza zamushyikirije inka ebyiri z’imishishe nk’ikimenyetso cy’uko bazirikanye akazi yakoze banamushimira ineza yabagiriye mu minsi yatambutse.

Munyanshoza Dieudonné yabwiye IGIHE ko inka imwe yayihawe n’inshuti ye magara yitwa Bazatsinda Fred usanzwe ari muramu we, indi ayihabwa n’umuryango w’abana yagiriye neza agafasha umuvandimwe wabo wacumbikaga iwe yiga amashuri ya Kaminuza i Mudende.

Yagize ati “Izo nka ebyiri bampaye, bose babikoze bashaka kunshimira, umwe nafashije barumuna be babaga iwanjye kugira ngo bige. Ni umuryango w’abana bavuka hamwe biteranyije bagura inka barayimpa, bahagarariwe na mukuru wabo witwa Kayisire Bienvenu.”

Yongeraho ati “Inka ya kabiri nayihawe na muramu wanjye witwa Bazatsinda Fred, asanzwe ari inshuti yanjye magara ku buryo kumpa inka byahamije ubumwe dufitanye.”

Inka Munyanshoza yahawe ziyongereye ku zindi enye yari asanzwe yoroye, bityo ko nizitangira kororoka akarenza inka icumi azahita ava mu cyiciro cy’aborozi [abafite inka ziri munsi y’icumi] yinjira mu cyiciro cy’abatunzi[abatunze inka zirenze icumi].

Ati “Umuntu yitwa umworozi iyo afite byibuze inka icumi, izo sindazigeza ubu nanjye ndacyari umworozi. Nizeye neza ko izi nka zizororoka vuba ngahita njya mu bitwa abatunzi, ni ibintu byanshimishije cyane. Mu by’ukuri ndashimira abavandimwe bampaye inka, ni ikimenyetso gikomeye.”

Inka Munyanshoza yahawe, zahuriranye n’ibirori byo kubatirisha umuhererezi we n’imfura ye yabyaye atarashaka umugore. Ni ibirori yashyigikiwemo n’abahanzi b’inshuti ze za hafi barimo Senderi Hit, Bonhomme n’abagize Orchestre Impala asanzwe acurangamo.

Nyuma yo kuva mu gisirikare, Munyansoza ati “Hari ibihangano bishya ngiye gusohora. Ndashaka kwibanda cyane ku muziki w’indirimbo zitari izo kwibuka gusa , hari izari muri studio n’izindi nshyashya ngiye gukora.”

Yongeyeho ati “Ngiye gusohora ibihangano bitandukanye n’uko bari basanzwe banzi mu cyunamo, ariko ntabwo bivuze ko nzivuyeho burundu. Ubu mbonye umwanya uhagije ku buryo ngiye kwigaragaza nk’umuhanzi utabibangikanya n’akandi kazi. Nagiye mu kiruhuko, navuga ko akazi nakoraga mu gisirikare kantwaraga umwanya munini nkorera igihugu, ubwo ndi mu kiruhuko bizanyorohereza gukora umuziki mfite umwanya uhagije.”

Yinjiye mu ngabo z’u Rwanda muri Gicurasi 1993. Yageze mu gisirikare afite imyaka 17, mu gihe yari amazemo ngo aterwa ishema no kuba yararwaniye igihugu kikava muri Jenoside yakorewe Abatutsi ubu kikaba gitangiye kwiyubaka.

Yasezerewe mu mpera za Kanama 2016, ubu aravuga ko agiye gushyira imbaraga mu muziki we no gukora ivugurura muri Orchestre Impala asigaye acurangamo.

Munyanshoza n'abana be, harimo imfura yabyaye atarashaka, n'abandi babiri yabyaranye n'umugore we
Abahanzi Bonhomme na Senderi Hit bitabiriye ibi birori
Uyu muryango wahaye Munyanshoza inka umushimira ko yafashije umuvandimwe wabo
Undi muryango wahaye Munyanshoza inka
Munyanshoza n'umugore we
Abagize Orchestre Impala baririmbye muri ibi birori

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza