Masamba yujuje imyaka 49 urungano rumwibutsa ibigwi bye muri ruhago

Yanditswe na Munyengabe Murungi Sabin
Kuya 16 Kanama 2016 saa 11:11
Yasuwe :
0 0

Intore Masamba yizihije imyaka 49 amaze abonye izuba, abiganjemo urungano n’abo yabyirukanye na bo batuye mu mahanga bamwibukije byinshi yakoze mu buto by’umwihariko ‘ibigwi yakoze muri ruhago akiri mu buhunzi’.

- Masamba akibyiruka yari umunyaturingushyo
- Yari azwiho urwenya no gutera akanyabugabo bagenzi be
- Muri ruhago yakinaga ku 10….Iyo yafataga umupira nta wamukurikiraga
- Yakuranye impano yo kuririmba bikamwongerera igikundiro mu rungano
- Yujuje imyaka 49, yibukijwe ibyiza n’ibibi yaciyemo…

Masamba umuhungu wa Sentore Athanase yavutse ku itariki ya 15 Kanama 1967. Kuri uyu wa Mbere yizihije imyaka 49 amaze avutse bimufasha gusubiza amaso inyuma yibuka ibihe byiganjemo ibyo yagize akiri ingimbi kugeza abaye umusore w’imbaraga.

Yagize ati “Uyu munsi urakomeye mu buzima bwanjye, nibutse ibihe nanyuzemo nkiri umwana muto, harimo ibyiza, ibibi, ni byose. Nibutse ubuzima nanyuzemo mu buhunzi, uko natangiye kuririmba […] Inshuti zanjye zanyibukije byinshi.”

Yabwiye IGIHE ko mu bikomeye urungano rwe rwamwibukije harimo ukuntu yari umukinnyi w’umuhanga muri ruhago n’ukuntu yahoranaga inzozi zo kuzaba umukinnyi w’igitangaza gusa bikarangira abaye umuririmbyi w’umwuga.

Ati “Nkiri muto buriya nateraga umupira, nari umuhanga cyane. Nakinaga ku 10, nari umukinnyi ukomeye iyo nafataga umupira nta wankurikiraga. Abo b’inshuti zanjye bari hanze muri Amerika, u Burayi na Canada babinyibukije…”

Masamba akibana n’umuryango we mu Burundi ngo yiyumvamo cyane inzozi zo kuzaba umukinnyi ukomeye wa ruhago gusa impano yo kuririmba yaramuganje areka umupira akora ubuhanzi gusa.

Ati “Nakinaga numva mbikunze ariko naje kubireka ndaririmba gusa, mukuru wanjye ni we wabikomeje yanakiniye Vital’O y’i Burundi […] Nishimira cyane ko mu myaka maze ngenda nkura mu buhanzi, impano igenda irushaho kuba nziza ikanaryohera abantu.”

Akiri muto, Masamba yakinaga ku 10 muri ruhago

Masamba yavuze ko mu byo yishimira cyane kuri uyu munsi w’amavuko ku isonga “ni uko navutse ku munsi nyina wa jambo yasubiye mu ijuru kandi ndamukunda cyane”. Yongeraho ati “Mu bikomeye nibuka ni ukuntu nari inshuti ya Papa [Sentore], yarankundaga cyane, yankoreraga isabukuru ugasanga indi minsi y’abana tuvukana yarayibagiwe.”

Mu mwaka wa 2017, Masamba azakora ibirori bya Yubile y’imyaka 50 y’amavuko anizihize imyaka 30 azaba amaze akora ubuhanzi. Mu gihe amaze aririmba yakoze album zigera ku icumi zigizwe n’indirimbo ziganjemo izifite umudiho wa Kinyarwanda zakunzwe bikomeye.

Masamba yiteguye kwizihiza Yubile y'imyaka 50 mu birori bizaba bikomatanye no kwishimira imyaka 30 amaze aririmba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza