Mani Martin agiye gukora igitaramo azahuriramo na Sauti Sol na JB Mpiana

Yanditswe na Munyengabe Murungi Sabin
Kuya 1 Gashyantare 2017 saa 11:57
Yasuwe :
0 0

Umuririmbyi Mani Martin wo mu Rwanda yatumiwe mu bahanzi b’imena bazitabira iserukiramuco ry’umuziki Amani Festival rigiye kuba ku nshuro ya kane muri Repubulika Iharanira Demokarasi ya Congo.

Ni ku nshuro ya gatatu Mani Martin agiye kwitabira iri serukiramuco nyuma y’iryo yaririmbyemo muri 2013 no mu 2014. Muri uyu mwaka azahahurira n’itsinda rya Kassav’ ryamamaye ku Isi mu njyana ya Zouk, JB Mpiana wo muri Congo n’abacuranzi be, Sauti Sol yo muri Kenya n’abandi bahanzi bakomeye.

Abategura iri serukiramo bavuze ko rizitabirwa n’abaririmbyi bazwi cyane i Goma barimo uwitwa Blackman Bausi, amatsinda y’ababyinnyi arimo iryitwa Umin Robot, Arsenic na Moov.

Umuyobozi wa Amani Festival, Éric de la Motte yabwiye Radio Okapi ko kuri iyi nshuro biteze kwakira abakunzi b’umuziki bagera kuri 36,000; by’umwihariko ngo ni ubwa mbere iri serukiramuco rizaba ryakiriye umubare munini w’abafana kurusha indi myaka yabayeho.

Yanavuze ko abaririmbyi bagize Sauti Sol yo muri Kenya na bo biyongereye mu bandi bahanzi bakomeye mu karere bazaririmba muri Amani Festival. Yagize ati “Sauti Sol ifite amashyushyu yo kuza kubana natwe muri Amani Festival izamara iminsi itatu twizihiza amahoro ku itariki 10,11 na 12 Gashyantare 2017 i Goma. Aba bahanzi bamaze bo muri Kenya baririmbye iyitwa Kuliko Jana bamaze kwemeza ko bazaza muri iri serukiramuco rigiye kuba ku nshuro ya kane.”

Yongeyeho ati “Intego nyamukuru y’iri serukiramuco ni ukwerekana ko mu Burasirazuba(Kivu) ari ahantu hadasanzwe kandi hahishe ubukungu.” Uyu muyobozi yanavuze ko batumira abahanzi bakomeye kugira ngo bagirane ubufatanye n’urubyiruko rwihangiye imirimo mu guhuza imbaraga hagamijwe kuzamura Afurika yose.

Mani Martin yabwiye IGIHE ko ageze kure imyiteguro yo kujya guhagararira u Rwanda mu iserukiramuco mpuzamahanga rya Amani Festival, ngo azakora uko ashoboye aveyo amenyekanishije album ye nshya yise ‘Afro’ ashaka gushyira hanze.

Ati “Ngiye gusubira muri Amani Festival byemejwe, navuga ko ririya serukiramuco narigiriyeho umugisha ukomeye kuko iyi ni inshuro ya gatatu ngiye kurijyamo. Ubu ngiye kuryitabira mu gihe ndi murugendo rwo kumenyekanisha album yanjye nshya Afro, hariya ni ahantu haba hahuriye itangazamakuru mpuzamahanga ndumva nzaboneraho kurikoresha mu kurushaho gukwiza album yanjye Ku Isi.”

Mu bahanzi bakomeye bitezwe mu Mujyi wa Goma harimo umuririmbyi w’icyamamare JB Mpiana , Jean Goublad Kalala, Sauti Sol, Kassav, Mackelsambo Kataka, Robat King, Yewande Austin n’abandi.

Mu mwaka ushize hatumiwe abahanzi barimo Nneka, Ismël Lo, Werrason, Zao, Kode, itsinda rya Ali Keita, Yvonne Mwale na Joel Sebunjo, Angel Mutoni, JC Kibombo, Black Man Bausi, Innoss’B Sango’A n’abandi.

I Goma ibirori byo kwitegura Amani Festival byatangiye

Mani Martin agiye i Goma kumenyekanisha Album yise ’Afro’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .