Dr Jiji yiyemeje kuririmba ku by’ubusambanyi kuko asanga bwugarije abantu

Yanditswe na

Dean Irak

Kuya 7 Werurwe 2014 saa 08:05
Yasuwe :
0 0

Wumvise indirimbo ye ya mbere ushobora gukeka ko amagambo aririmba ari ay’inganzo yamunyereje ikayamutsitazaho yihitira, ariko ukomeje gufata umwanya uhagije ugatega amatwi n’ibindi bihangano bye, wumva ko indirimbo ze zose aziririmbana insanganyamatsiko yihariye kandi igaruka cyane ku bijyanye n’imibonano mpuzabitsina. Ibi akaba abiterwa no kuba asanga ubusambanyi ari kimwe mu byugarije abantu. Uyu ni umuhanzi Dr Jiji, ubusanzwe witwa Janvier Mugabukwari w’imyaka 34, uvuga ko yiyemeje (...)

Wumvise indirimbo ye ya mbere ushobora gukeka ko amagambo aririmba ari ay’inganzo yamunyereje ikayamutsitazaho yihitira, ariko ukomeje gufata umwanya uhagije ugatega amatwi n’ibindi bihangano bye, wumva ko indirimbo ze zose aziririmbana insanganyamatsiko yihariye kandi igaruka cyane ku bijyanye n’imibonano mpuzabitsina. Ibi akaba abiterwa no kuba asanga ubusambanyi ari kimwe mu byugarije abantu.

Uyu ni umuhanzi Dr Jiji, ubusanzwe witwa Janvier Mugabukwari w’imyaka 34, uvuga ko yiyemeje kuririmba ku cyo yise “urukundo icyo rurangira rubaye cyo” cyangwa icyo yita “ukuri kw’urukundo” kuko asanga biri muri kimwe mu byeze muri Kigali.

Mu kiganiro kirambuye yagiranye na IGIHE, Dr Jiji washyize hanze indirimbo nshya yise “Super Market” avugamo umukobwa uryamana n’abasore benshi cyane mu gihe gito, avuga ko yasanze iyi ngingo y’ubusambanyi muri Kigali abahanzi bandi baranze kubitoneka.

Yagize ati: “Ndirimba ukuri k’urukundo kandi ni ibintu abantu bakora ariko ntibabiririmbe kandi babikora. Urugero nk’iyi ndirimbo nashyize hanze nayise Super Market ni ibintu byabayeho, ni umukobwa nzi wakundanye n’umusore amubwira ko ari isugi kandi ko ngo ari we akunze bwa mbere, ariko mu masaha atarenze nk’atatu yari amaze kuryamana n’abasore barenze batatu, mpita mbibona ko uwo mukobwa ari nka super market aho buri wese ku bushobozi bwe aza akaryamana nawe nka self servise [kwiha icyo ushatse kijyanye n’amafaranga yawe watanze]”.

Uyu mugabo ngo aririmba ibintu abantu bakora

Yongeraho ko ubusambanyi hagati y’abantu babwirana ko bakundana ari ingeso yeze cyane i Kigali. Agashimangira ko yahisemo kuririmba ukuri kw’ibiri kubera i Kigali, afatiye ahanini ku ngero z’imiziki n’imyandikire y’indirimbo ku bahanzi bo mu bihugu yatembereyemo nka Uganda, Kenya n’ahandi.

Yagize ati: “Birahari, ahubwo se umuntu utabibona ni nde? Njyewe rero ndabivuga kuko urukundo ni ubuzima tubamo wabihisha, wabiceceka n’abatabigaragaza biba bibarimo babikora buri munsi. Urugero natanga ni uko niba abantu bafite igaraje bakora imodoka barazikora nta kindi. Njyewe niko mbibona nkurikije muzika n’aho nagiye mbona hatari hano mu Rwanda mu muzika uvuga ukuri kw’ibintu biriho.”

Uyu muhanzi Dr Jiji, arubatse, yarangije Kaminuza mu Burundi mu bijyanye n’ubuganga. Ubu ari kwiga iyakure mu bijyanye n’ubuganga i Sydney. Kuri ubu amaze gusohora indirimbo nka Sweety Sweety, Itangazo, Super Market, Antere Ibuye ari kumwe na Ama-G The Black na Bruce Melody n’izindi.

Ku bijyanye no kuba we afite umugore akaba yariyemeje kuririmba kuri iyi ngingo idakunze kuvugwaho rumwe na benshi, we agira ati:

“Kugira umugore bituma ndirimba cyangwa nkavuga ibyo nzi, ibyo rero byatandukana n’umuntu uvuga ibyo atazi. Njyewe ndirimba ibyo nzi nshobora kugereranya n’ubuzima bwo kuba ufite cyangwa udafite umugore kuko bwombi nabubayemo. Ibyo rero bituma mbona ikintu gifatika cyo kuririmba ni ubuhanzi bugaragara kandi bushingiye ku bintu bigaragara.”

Dr Jiji asobanura ariko ko abantu bumva ibyo aririmba badakwiye guhita batekereza ko ari ko ateye, ahubwo bakumva neza ko ari inganzo n’umusanzu we mu kugira inama abanyarwanda mu bijyanye n’urukundo.

Ati “Abantu kandi nagira ngo bajye batandukanya ibintu; niba narahisemo kuririmba kuri iyi ngingo ntibihura n’imico mfite. Ushobora kumva baranyise Lady’s Lover [ukunda abakobwa/abagore cyane] ugakeka uti ‘buriya ndajarajara mu bakobwa’ ariko ibyo sibyo, biriya ni inganzo ishingiye cyane ku byo mba mbona.”

Dr Jiji ni umwe mu bahanzi bashyize hanze indirimbo zirimo “Antere Ibuye” byakunze kuvugwa kenshi ko igaragaza abakobwa bambayemo hafi ubusa. Avuga ku cyemezo giheruka gufatirwa Urban Boyz ku ihagarikwa n’icibwa r’indirimbo yabo “Ansilla” bitewe n’amashusho ateye isoni nk’ayo Jiji yavuze ko asanga ari urwego rw’umuco u Rwanda rukiriho, yumvikanisha ko afite icyizere ko mu gihe kizaza zizaba zicurangwa hose.

Ati: “Hari indirimbo bataca ubu ngubu ariko mu myaka 20 ishize bari guca. Uyu munsi ku rwego rw’umuco wacu mu Rwanda ntabwo turiyumvisha ko indirimbo nk’iriya yacurangwa ariko iz’abandi bo hanze zo barazicuranga tukanazireba ku mateleviziyo abantu barazitunze muri mudasobwa zabo birirwabazireba bakazica ariko bari no kuzireba, njye mbona ari urwego umuco wacu ukiriho ariko ejo cyangwa ejo bundi wenda zizajya zicurangwa.”

Bimwe mu byo Dr Jiji akora mu ndirirmbo 'Antere ibuye'

Reba indirimbo ’Antere ibuye’:


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .