Asinah ararega Riderman guhohotera abagore

Yanditswe na Munyengabe Murungi Sabin
Kuya 23 Kamena 2016 saa 02:08
Yasuwe :
0 0

Umuhanzi Asinah uririmba injyana ya Dancehal arasaba ko leta yakurikirana umuraperi Gatsinzi Emery [Riderman] kubera amashusho y’indirimbo nshya yise ‘Get Out Of My Soul’ aherutse gusohora.

Muri iyi ndirimbo Riderman aba aririmba umukobwa udashobotse uba warananiye umugabo akamusenda. Ni imwe mu ndirimbo zigize album nshya yise ‘Ukuri’ ashaka gushyira hanze.

‘Get Out Of My Soul’ iri mu njyana ya Reggae, yumvikanamo amagambo y’Igifaransa, Icyongereza ndetse n’Ikinyarwanda. Riderman yasobanuriye IGIHE ko yayihimbye agendeye kuri filime y’urukundo yarebye avanamo isomo yifuje gusangiza abakundana.

Ati “Umuhanzi akura inganzo ahantu hatandukanye, mu kuyandika byaturutse kuri filime y’urukundo narebye nsangamo isomo numva nifuje kurisangiza abandi. Ni umukobwa wakundanaga n’umusore, byari bibabaje cyane, yari yarananiye umukunzi we bigera aho yica umusore.”

Yongeyeho ati “Nibajije impamvu abantu bakundana, bakabana mu buzima bw’ibibazo bimeze gutyo kugeza ubwo bicana kandi bishoboka ko bafata umwanzuro bagatandukana.”

Ku ruhande rwa Asinah, avuga ko umuhanzi waririmbye G.O.O.M.S akwiye gukurikiranwa ndetse agafatirwa imyanzuro ngo kuko yakoze amashusho ashishikariza abantu guhohotera abagore.

Yanditse kuri Instagram avuga ko Minisiteri y’Uburinganire n’Iterambere ikwiye kugira icyo ikora kuri Riderman wasohoye indirimbo irimo ubutumwa avuga ko bubiba ihohotera ry’abagore.

Yagize ati “Uyu munsi hari video y’umuhanzi nyarwanda nabonye binyereka ko hari abagikangurira abandi guhohotera umwari n’umutegarugori. Ntabwo byari bikwiye nk’abahanzi kujya dukora video scripts nka ziriya (G.O.O.M.S) ya Riderman cyane ko tuzi ko bikunze kubaho mu gihugu cyacu aho usanga abana b’abakobwa cyangwa abagore bakubitwa bikomeye n’abobita abakunzi cyangwa abagabo babo.

Asoza agira ati “Icyitonderwa MIGEPROFE na PROFEMME bakwiye kugira icyo bakora gifatika kuri videos zimeze gutya. Murakoze!”

Asinah yakundanye na Riderman imyaka umunani batandukana bitunguranye mu ntangiriro za 2015 ndetse uyu muraperi ahita ashinga urugo n’undi mukobwa witwa Miss Agasaro Nadia.

Nyuma yo gutandukana na Riderman, Asinah yinjiye mu muziki, ubu aririmba mu njyana ya Dancehall ndetse ngo yiteguye gushyira hanze album ya mbere uyu mwaka.

Asinah na Riderman bakundanye imyaka umunani batandukana batarushinze
Asinah ari mu gisibo cy'ukwezi gutagatifu kwa Ramadhan

Get Out Of My Soul [G.O.O.M.S] by Riderman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza