Ibyo wamenya ku mapantalo ya ‘’ Boyfriend ‘’ aharawe n’abakobwa muri iki gihe

Yanditswe na Uwase Joie Clarisse
Kuya 16 Gashyantare 2020 saa 09:11
Yasuwe :
0 0

‘Boyfriend’ ni ijambo riri mu rurimi rw’Icyongereza risobanura inshuti y’umuhungu. Ryitiriwe ubwoko bw’amapantalo y’abagore n’abakobwa kubera imiterere yayo, ahanini biturutse ku kuba bamwe barabifataga nk’aho umukobwa cyangwa umugore uyambaye aba yayitiye cyangwa yayibye umuhungu cyangwa umugabo bakundana.

Boyfriend ni ubwoko bw’ipantalo yo mu bwoko bw’ikoboyi, yakomotse ku ikoboyi zo hambere zatangiye kwambarwa mu mwaka wa 1873. Kuva icyo gihe, ipantalo z’ikoboyi zakomeje kwambarwa, kuvugururwa no kongererwa ubwiza kugeza ubwo haje izahawe iri zina rya Boyfriend zabaga zisatuye ku musozo wo hasi kandi ari nini mu maguru.

Ipantalo ya boyfriend ni imwe mu zakunzwe cyane n’ibyamamare byo hambere byari bisobanukiwe cyane ibijyanye n’imyambarire, aha twavugamo nka Marilyn Monroe na Katie Holmes kugeza kuri Current Elliot wazongeyemo umwihariko w’ubuhanzi bw’imideri zikongera kwaduka mu mwaka wa 2008.

Uyu mwambaro wakozwe hagendewe ku ipantalo zisanzwe ari iz’abasore, zizwiho kuba zirekuye uzambaye cyane cyane ku gice cy’amaguru zikaaba zimurekuye .

Urubuga rw’umunyamideri Current Elliot rugaragaza ko abambara Boyfriend jeans bari mu byiciro bibiri birimo abakunda kugaragaraza imiterere yabo ndetse n’abandi usanga bakunze kwambara bakikwiza.

Abakunda kugaragaza imiterere y’umubiri wabo bahitamo izibafashe ku kibuno naho abakunda kwikwiza bo bagakunda izibafata mu rukenyerero, ahandi zirekuye cyane.

Amateka y’uyu mwambaro yatangiye ari nk’impinduramatwara mu myambarire y’abagore bifuzaga kugaragaza impinduka mu myambarire bagendeye ku myambaro y’abagabo ariko bakongeramo umwimerere w’igitsina gore.

Umunyamerikakazi Marilyn Monroe wakunzwe cyane nk’umukinnyi wa filime, umuririmbyi ndetse akaba n’umunyamideli, yagaragaye bwa mbere yambaye Boyfriend jeans mu myaka ya za 1960.

Nk’umugore wari uzwiho uburanga bushimwa na benshi, abamubonaga bavugaga ko yagize ubundi bwiza bwihariye. Imyaka myinshi nyuma yaho, Katie Holmes wari uvuye mu myitozo yo kwerekana imideri y’amakanzu, yagaragaye mu mihanda yo mu mujyi wa New York yambaye ipantalo y’uwahoze ari umugabo we Tom Cruise, icyamamare muri sinema n’uko boyfriend jeans zisakara hirya no hino mu byamamare nka Sarah Jessica Parker, Reese Witherspoon n’abandi.

Imyambarire nk’iyo mu Rwanda ubu iri gutera imbere, ari nako igenda ifata indi sura, nyuma y’uko mu bakobwa n’abagore barushaho kumenya kujyanisha imyambarire yabo, ikimero ndetse n’ikirere.

Abakobwa n’abagore bagendana n’ibigezweho bakunda cyane uyu mwambaro wa Boyfriend ku buryo bimaze no kumenyerwa n’abacuruza amapantalo y’abagore, kubura ‘Boyfriend Jeans, ni igihombo gikomeye.

Umukunzi Emelinne ukunze kwambara izi pantalo, yabwiye IGIHE ko kuva yatangira kuzambara abona zimuhaye amahoro kubera ko ziba zitamwegereye.

Mugwaneza Peter, umwe mu bacuruza aya mapantalo mu Mujyi wa Kigali, we avuga ko iyi myambaro ari bimwe mu bicuruzwa bigurwa na benshi kandi ku bwinshi.

Aganira na IGIHE yagize ati ”Njyewe hari igihe haza abagera muri batanu bose basaba ngo mbahe Boyfriend kuko natwe tuba dushaka amafaranga rero, ubwo umunsi ukurikiyeho ni zo turangura kurusha ibindi twazanaga kuko abakiriya tubazanira ibyo bifuza.”

Akenshi kugira ngo umuntu wambaye Boyfriend jeans agaragare nk’uberewe kuri ubu, bisaba ko ashiraho n’agakapu ko ku mugongo.

Abashakashatsi Marlon Brando na mugenzi we James, mu mwaka wa 1950 batangaje ko kwambara boyfriend jeans ugashyiraho ikote ritari rinini, umupira w’imbere utari muremure, n’ inkweto ngufi ari ntako bisa.

Boyfriend Jeans ni amapantalo aharawe n'abakobwa muri iki gihe
Hari abakobwa cyangwa abagore bambara Boyfriend Jeans bashaka kugaragaza ikimero cyabo
Abakobwa muri iyi minsi bambara Boyfriend Jeans bagaragaza ubwiza bwabo
Boyfriend Jeans ni amapantalo yambarwa haba mu birori no ku bashaka gusohoka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .