00:00:00 IGIHE NETWORK KN KINYARWANDA EN ENGLISH FR FRANCAIS

Abanyamideli bato bacanye umucyo muri ‘Supra Model Competition’ (Amafoto)

Yanditswe na Mahoro Vainqueur
Kuya 11 September 2022 saa 08:19
Yasuwe :

Irushanwa ‘‘SupraModel Competition’’ rigamije guteza imbere abari mu ruganda rw’imideli no kumenyekanisha ubukerarugendo bw’imbere mu gihugu ryamuritse abanyamideli 20 biganjemo abakiri bato bageze muri ½ cyaryo.

Abakomeje bavuye muri 30 bari bahatanye muri iri rushanwa ryahurije abakunzi b’imideli muri Century Park Nyarutarama mu ijoro ryo ku wa 10 Nzeri 2022.

Wari umugoroba w’abazi ibijyanye n’imideli wabonaga bishimiye ibi birori cyane aho buri wese yinjiraga anyuze ku itapi itukura agana mu byicaro bye byari bigabanyijemo ibyiciro bitatu. Byayobowe n’umunyamakuru Cyuzuzo Jeanne d’Arc ukora kuri Kiss FM.

Umuririmbyi JP Zed watsinze mu Irushanwa Supra Voice ni we waririmbye muri ibi birori yifashishije umuziki wa “live”, aririmba anicurangira indirimbo zirimo iz’abahanzi b’Abanyarwanda n’abanyamahanga zanyuze benshi.

Abanyamideli bahatanye banyuraga imbere y’akanama nkemurampaka kagizwe n’abafite izina mu mideli barimo Kabano Franco, Nyambo Masamara na Trevor Ntabwoba.

Mu kubaha amanota harebwaga ibirimo igihagararo bafite, imiterere yabo, uko batambuka, uko bifotoza n’uko bamurika umwambaro.

Kabano mu gushimangira ibyagenderwagaho yavuze ko ubusanzwe nta “munyamideli utoranya umwambaro, icyo baguhaye cyose umenya uko ucyerekana cyangwa ukimurika, ni bwo buhanga. Niba baguhaye umwambaro muremure ugutega umenya uko uwugendamo.”

Buri mwambaro bawumaranye iminota itarenga 10 bawumurikira abari bitabiriye ibi birori mu ngendo zabo zihariye zitabasha kwiganwa n’ubonetse wese. Hagendaga haza umunyamideli umwe, ubundi bagasoza batambukira rimwe bakurikiranye ku murongo baherekejwe n’uwahanze imyambaro baserukanye.

Abitabiriye ibi birori banyuzagamo bagakoma amashyi bitewe n’umunyamideli bishimiye, banafotora uwo babonye wambaye umwambaro ubakurura, ugashima ku marangamutima yabo.

Aberekanye imideli bakomeje muri ½ barimo abahungu 10: Ngarambe Prince, Tuyishimire Danny, Rujugiro Rubera Gilbert, Kayitare Eric, Kabano Honore, Kayumba Abdoul Karim, Tuyishimire Danny , Ishya Songa Beni, Iyizire Bruce na Dushime Charles.

Mu bakobwa 10 bakomeje harimo Mutesi Ruth, Zaninka Emelyne, Iwacu Gretta, Furaha Gisele, Ineza Flora, Ishimwe Huguette, Semana Cynthia, Batamuriza Phiona, Karenzi Marie Annette na Tuyisenge Ruth.

Aba bose bazongerwaho abandi batanu bazaba bagize amajwi menshi y’ababatoye binyuze ku rubuga supra.rw.

Abamuritse imideli bari bambitswe n’ibigo bitandukanye birimo 3FD , Shema Gaetan Designer, Inkingi Designer, Inkanda House, Bone Clothing na Matheo Designer.

Umunyamideli Franko Kabano yabwiye IGIHE ko mu banyamideli biyekerekanye yabonyemo babiri bakorana mu kumurika imideli ku rwego mpuzamahanga.

Ati “Ubu mfite babiri ntahanye nshobora kwigisha cyangwa nkabashakira isoko, iyo mbonye umwana ufite impano ndamwegera tukaganira nkamusaba niba twakorana.”

“Nta we umurika imideli adafite imyaka 18 keretse iyo ari kumwe n’umuhagarariye cyangwa umubyeyi we, naho ku ruhando mpuzamahanga bareba ufite imyaka 21 naho ufite imyaka 23 bisaba ko yaba afite impano idasanzwe.”

Franco Kabano wari mu bagize akana nkemurampaka yatunguriwe muri ibi birori yifurizwa isabukuru nziza y’amavuko.

Supra Model Competition itegurwa na SupraFamily Ltd muri gahunda yo kuzamura impano z’abakiri bato. Abanyamideli 20 bageze muri ½ bazahatana ku wa 1 Ukwakira hatoranywa abazagera mu cyiciro cya nyuma kizaba ku wa ku wa 29 Ukwakira 2022.

Uzahiga abandi azahabwa ibihembo birimo amafaranga, yishyurirwe urugendo i Dubai n’ikigo cyo muri Nigeria gitembereza ba mukerarugendo Wizygbe Tours, kizamufasha gutembera no kumuhuza n’abanyamideli bubatse izina.

Ikindi ni ukuzamushakirwa ikigo mpuzamahanga kizamufasha kwagura impano ye kinamuhuze n’inzu mpuzamahanga z’imideli zitandukanye.

Usibye aba banyamideli ku munsi wa nyuma w’irushanwa hazatangwa ibihembo bya Supra Model Awards bigamije gushimira abagize uruhare mu iterambere ry’imideli.

Nirere Shanel yitabiriye aya marushanwa y'abanyamideli
Buri wese yari yakoze ku mudeli we
Imideli yaserukanywe yari mu buryo butandukanye
Hari imyambaro itandukanye imenywa n'abantu bazi iyo gusohokana mu birori nk'ibi cyangwa ibijyanye nabyo
Buri wese yabanzaga guca ku itapi itukura agafata ifoto y'urwibutso
Abasore b'ibigango ntibatanzwe muri iri rushanwa
Wari umugoroba w'abazi ibijyanye n'imideli no kuyimurika
Uyu musore yatunguye benshi muri ibi birori kubera umudeli yaserukanye
Uyu mwambaro watunguye benshi mu bari bitabiriye ibi birori
Umwambaro wa 3FD wanyuze benshi
Uyu mwambaro uri mu yatangariwe cyane na benshi
Umunyamideli w'umuhanga amenya no kwifotoza
Umunyamideli Kabano Franco yashimiye abamwifurije kugira isabukuru nziza y'amavuko
Berekanye ko uruganda rw'imideli rumaze gushinga imizi
Umunyamakuru wa Kiss FM, Cyuzuzo Jeanne d'Arc, ni we wari uyoboye ibi birori. Yanyuzagamo agatebya asaba abamurika imideli kumwenyurira ababareba
Imyambaro yamuritswe yari ikoze mu buryo bwihariye
Kabano Franco yanyuzagamo akanabyina mu kanya gato k'akaruhuko kabaga katanzwe
Imyambaro yamuritswe yajyanwa no mu iserukiramuco mpuzamahanga
Hari imyambaro y'ubwoko butandukanye
Hari imyambaro y'ubwoko butandukanye
Buri wese yari afite intambuko ye yihariye
Buri wese yabyinaga uko abishoboye
Buri mu nyamideli wese amenya uko amurika umwenda wose yahawe
Abanyamideli 20 ni bo bakomeje mu cyiciro gikurikiraho cya /12
Abamuritse imideli bari biganjemo abakiri bato urebeye inyuma
Abakiri bato bari bahawe umwanya wo kugaragaza impano yabo mu kumurika imideli
Abakiri bato bagaragaje ubuhanga bwabo mu kumurika imideli
Ababishoboye bahawe umwanya wo kwisanzura bakabyina bananura amaguru
Ababishoboye banyuzagamo bakabyina mu kanya k'akaruhuko
Umunyamodeli Kabano Franco yatunguriwe muri ibi birori byahuriranye n'Umunsi yizihizaho Isabukuru y'Amavuko
Byari ibihe by'akanyamuneza
Abitabiriye na bo baserutse bambaye mu buryo budasanzwe
Bamwe mu bitabiriye bahisemo gutungura umunyamideli Kabano Franco bamwifuriza kugira isabukuru nziza y'amavuko

Amafoto: Prince Munyakuri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .