Liza Kamikazi yakoze indirimbo ifite umwihariko mu rugendo rw’umuziki amazemo imyaka 15

Yanditswe na Uwiduhaye Theos
Kuya 13 Gicurasi 2020 saa 10:09
Yasuwe :
0 0

Umuhanzikazi Liza Kamikazi yashyize hanze indirimbo nshya yise ‘Sinakwibagiwe’ atangaza ko aribwo bwa mbere mu gihe cy’imyaka 15 amaze mu muziki akoze igihangano gifite umwihariko bitewe n’ubutumwa bukubiyemo.

Umuhire Solange wamenyekanye mu muzika nka Liza Kamikazi, yatangiye umuziki aririmba indirimbo z’urukundo n’izivuga ku buzima busanzwe nka ‘Nkiri muto’, ‘Iyizire ft Mike’, ‘Kirenga’, ‘Rahira yaririmbanye na The Ben’ n’izindi.

Muri Kanama 2016 nibwo Liza yabatijwe mu Itorero New Life Bible church, atangira urugendo rwo kwiyegereza Imana birushijeho nta gusubira inyuma.

Nyuma y’amezi abiri abatijwe, Liza Kamikazi yasohoye indirimbo ya mbere ihimbaza Imana yise ‘Ndaje Data’.

Kuva icyo gihe amaze gusohora indirimbo zitandukanye zirimo n’iye nshya yise ‘Sinakwibagiwe’.

Liza Kamikazi yabwiye IGIHE ko mu gihe cyose amaze akora umuziki aribwo bwa mbere akoze indirimbo ariko irimo ubutumwa adashidikanya ko hari abo butagenewe.

Ati “Mu myaka 15 maze nkora umuziki nibwo bwa mbere nakora indirimbo nzi neza ko itakorewe buri wese kuko ifite abantu b’umwihariko igenewe. Icyo nsaba abantu ni ukuyumva rimwe, wayumva ari wowe igenewe ikomeze igufashe. Nusanga atari wowe igenewe utekereza niba nta muntu yafasha bitewe nibyo ari gucamo hanyuma uyimusangize.”

Yavuze ko iyi ndirimbo igenewe umuntu ufite ibintu bikomeye ari gucamo akaba yibaza niba hari igihe kizagera Imana igasubiza amasengesho ye.

Ati “Indirimbo igenewe ushobora kuba ari guca mu bihe bimugoye yibaza igihe Imana izageraho igasubiza amasengesho ye, ashobora kuba hari ikintu amaze igihe asengera atarasubizwa cyangwa se hari isezerano Imana yamuhaye ariko amaso akaba yaraheze mu kirere. Abandi ni abantu bihebye cyane bumva banakwipfira kuko batakibona impamvu yo kubaho.”

Liza Kamikazi uri mu bahanzi bafite igikundiro mu myaka yatambutse, kuri ubu yafashe inzira y’agakiza aho yashyize imbere indirimbo zo guhumuriza abantu no kubigisha iby’ubwami bw’ijuru kurusha ibindi byose.

Reba indirimbo nshya ya Liza Kamikazi

Liza Kamikazi amaze imyaka irenga 15 mu muziki w'u Rwanda. Ari mu bahanzikazi bagezweho mu muziki uhimbaza Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .