Uwihirwe wabaye igisonga cya Miss Rwanda mu 2019, yahimbye umuvugo kuri ba ‘Slay Queen’

Yanditswe na Uwiduhaye Theos
Kuya 26 Gicurasi 2020 saa 06:38
Yasuwe :
0 0

Uwihirwe Yasipi Casmir wabaye igisonga cya mbere cya Nyampinga w’u Rwanda mu 2019, yagaragaje ko ba ‘Slay queen’ badakwiye guterwa imijugujugu mu muvugo we mushya yise ‘Slay Queens= Future Mamas’.

‘Slay Queen’, ni izina rihabwa abakobwa barisha ikimero. Abarikoresha baba baninura abakobwa bifashisha imbuga nkoranyambaga mu kugaragaza uburanga bwabo. Abenshi muri bo nta kazi kazwi bagira ariko baba bagaragara nk’abafite agatubutse ku mufuka.

Ba ‘Slay Queen’ basobanurwa nk’inkumi zidatana no kugaragaza imiterere y’imibiri yazo, aho zisohokera, imyambarire igezweho, amafunguro akunzwe, imodoka nziza n’ibindi zikoresheje imbuga nkoranyambaga. Ubuzima bwabo bwose babukubira mu mafoto asakazwa ku karubanda.

Uwihirwe yabwiye IGIHE ko yatekereje gukora umuvugo ubakomozaho, kuko abona abantu benshi bakunze kuvuga ko urubyiruko rw’ubu rwataye umuco byagera ku bitwa ba ‘Slay Queen’ byo bikaba ibindi bindi.

Ati “Muri uyu muvugo nahisemo kuvugira ba ‘Slay Queen’ kuko ibyo bakora ari umusaruro w’imbuto ababyeyi babo bateye. Iyo ugiye kureba usanga abafite umuco mu nshingano bavuga ko urubyiruko rwataye umuco, wagera kuri aba bakobwa nabo bakakubwira ko nta bundi buzima bafite ubwo barimo aribwo buboroheye.”

Yavuze ko impamvu yatekereje uyu muvugo ari uko yabonaga abantu bibasira abakobwa bafite imyitwarire y’aba ‘Slay Queen’ aribo baca inyuma na none bakabasaba amafoto n’ibindi.

Ati “Nari ndi kugaragaza ko abantu bavuga ko ba ‘Slay Queen’ bari gukora ibitari byo, bakwiriye kugaragaza indi nzira ya nyayo igaragaza ibyo bagomba gukora biboneye. Nagize igitekerezo cy’uyu muvugo kuko wasangaga bari gutukwa kandi ugasanga abo babatuka nibo baca inyuma bakabasaba amafoto; bagashyushya urugamba ariko wajya kureba ugasanga nyuma barabihindukanye.”

Uwihirwe Yasipi Casimir asanzwe ari umuhanga mu mivugo yiganje mu rurimi rw’Icyongereza. Yakoze imivugo irimo uwitwa ‘You are The Next Generation’ aho agaragaza ibibazo bihari mu rubyiruko, akerekana uburyo ntacyo abantu babikoraho ahubwo amaso bayiriza ku mbuga nkoranyambaga.

Ku wa 27 Ukwakira 2018 mu irushanwa ryiswe ‘Kigali Itatswe n’Ubusizi’ ryahuzaga abahanga mu busizi baturutse mu mashuri yisumbuye n’abandi bayasoje mu gikorwa gitegurwa n’Umuryango wa TransPoesis, Uwihirwe yahize abandi yegukana umwanya wa mbere.

Umuvugo watumye ahabwa igikombe cyitiriwe Nyirarumaga gifite agaciro k’amadolari 150, anakorerwa amajwi n’amashusho by’umuvugo we.

Uwihirwe Yasipi Casimir ni umuhanga mu buhanzi bw'imivugo
Yasipi Casmir yabaye igisonga cya mbere cya Miss Rwanda mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .