USA: Umugabo wa Aurore Kayibanda yabonye akazi mu Kigo kimaze imyaka 34 gikora iby’itangazamakuru

Yanditswe na Uwiduhaye Theos
Kuya 11 Nzeri 2020 saa 09:51
Yasuwe :
0 0

Umugabo wa Aurore Kayibanda, Mbabazi Egide [Egide Fox] ufite ubuhanga mu gufotora no gufata amashusho yabonye akazi mu Kigo cy’Itangazamakuru cyo muri Amerika cyitwa Portland Media Center, kimaze imyaka 34 gikora ibikorwa bijyanye n’itangazamakuru.

Portland Media Center ibinyujije ku rubuga rwayo yahaye ikaze bamwe mu bakozi bashya bayo barimo n’Umunyarwanda Mbabazi Egide.

Iki kigo cyagize kiti “Twishimiye kubereka abakozi bacu bashya barimo Egide Mbabazi na Alan Levi. Egide asanzwe ari Umunyarwanda wize ibijyanye no gutunganya amajwi n’amashusho n’amafoto ndetse anafite sosiyete ikora amafoto n’amashusho.”

Cyakomeje kivuga ko cyizeye ko azatanga umusanzu ukomeye mu gukomeza kucyubakira ubudahangarwa no kugaragaza impinduka zizatanga umusaruro mwiza muri sosiyete yabo.

Mbabazi azajya akorera iki kigo yibanda mu bijyanye no gufotora no gutunganya amashusho by’umwihariko cyane mu bantu bagiye gutura muri Amerika bavuye mu bindi bihugu.

Yabwiye IGIHE ko yishimiye kuba yaragiriwe icyizere agahabwa akazi ndetse ngo yizeye ko hari ubumenyi bundi buziyongera ku bwo yari asanganywe azungukira muri iki kigo.

Mbabazi Egide ni umuhanga mu bijyanye no gufata amafoto n’amashusho. Yavukiye mu Rwanda, ahiga n’amashuri yisumbuye ariko aza kuhava afite imyaka 14 ajya gukomereza amasomo ye muri Leta Zunze Ubumwe za Amerika.

Akigera muri Amerika yatangiye kwiga ibijyanye no gufotora ahitwa The Hallmark Institute of Photography. Nyuma nibwo yaje gufungura kompanyi ye yitwa Egide Images atangira kujya yerekana ibikorwa bye abinyujije ku mbuga nkoranyambaga.

Iki kigo cyamuhaye akazi cyatangiye gukora mu 1986 gishingwa n’umuryango utagamije inyungu witwaga Maine Medical Center ufatanyije na University of Southern Maine n’Umujyi wa Portland.

Bitewe n’iterambere kimwe n’imihindagurikire y’ikoranabuhanga ngo byatumye izina rihindurwa ryitwa Portland Media Center. Ubu ni ikigo gikora ibikorwa binyuranye mu itangazamakuru birimo na Televiziyo.

Mbabazi yatangiye kumenyekana mu mpera za 2014 ubwo byatangiraga kuvugwa ko Miss Mutesi Aurore ari mu rukundo na we.

Icyo gihe ntibigeze babihakana cyangwa ngo bihishire kuko akenshi wasangaga amafoto yabo ku mbuga nkoranyambaga bari kumwe, barebana akana ko mu jisho ndetse banabwirana amagambo meza y’urukundo.

Ku wa 1 Werurwe 2018 hagiye hanze amakuru yemeza ko Mutesi wabaye Nyampinga w’u Rwanda mu 2012 yambitswe impeta y’urukundo na Egide Mbabazi bari bamaze igihe kirekire bakundana, amusaba kumubera umugore bakinjira mu buzima bazabanamo akaramata.

Aba bombi bahanye isezerano imbere y’amategeko ku wa 29 Nyakanga 2018 ku nkombe z’Inyanja mu Mujyi wa Portland wo muri Leta ya Maine, bemeranya kubana ubudahemukirana haba mu byiza no mu makuba.

Mbabazi asanzwe afite ubuhanga buhambaye mu gufata amashusho n'amafoto
Mbabazi, umugabo wa Aurore Kayibanda amaze imyaka myinshi akora akazi ko gufotora muri Amerika no muri Canada
Egide asanzwe ari umugabo wa Aurore Kayibanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .