00:00:00 IGIHE NETWORK KN KINYARWANDA EN ENGLISH FR FRANCAIS

Uruganda H&M rwakuye ku isoko imyambaro rwakoreye Justin Bieber

Yanditswe na Mahoro Vainqueur
Kuya 23 Ukuboza 2022 saa 08:39
Yasuwe :

Nyuma y’iminsi ibiri Justin Bieber abujije abafana be kugura imyambaro ya H&M akavuga ko yasohowe nta burenganzira atanze, iyi sosiyete yahise ikura ku isoko imyambaro yose yakoreye uyu muhanzi imushinja agasuzuguro.

Ku wa 20 Ukuboza 2022 nibwo Justin Bieber yanyarukiye kuri Instagram aho akurikirwa na miliyoni 270, abwira abakunzi be kutagura imyambaro y’uruganda rwo muri Suède rwa Hennes & Mauritz AB nyuma y’amasaha abiri ruyishyize ku isoko.

Uyu muhanzi w’imyaka 28 yari yanditse agira ati “Ntabwo nigeze nemeza amwe mu masezerano y’ubucuruzi yashyizwe hanze na H&M, byose babikoze nta burenganzira mbahaye, mbaye ndimwe sinabigura.”

Yakomeje agira ati “Ibi bicuruzwa H&M yankoreye ni umwanda, sinigeze mbigiramo uruhare , ntimubigure rwose.”

Nyuma y’ubu butumwa umuvugizi w’uru ruganda yumvikanye mu bitangazamakuru avuga ko bari barakurikije inzira zemewe basohora iyi myambaro, ariko ubu bahisemo gukura ku isoko imyambaro yose bakoranye na Justin Bieber nyuma y’icyo bise agasuzuguro ke.

Yagize ati “Nyuma yo kugaragaza agasuzuguro mu bufatanye twagiranye na Justin Bieber, twahisemo gukura ku isoko iyi myambaro n’ibindi twakoranye mu maduka yacu yose udasize ari kuri internet.”

Indi myambaro yakuwe ku isoko ni iyo uru ruganda rwakoze iriho amwe mu magambo ari mu ndirimbo ya Justin Bieber yise ’Ghost’.

Ibicuruzwa byari byakozwe n’uru ruganda birimo, imipira y’amaboko, ibikapu, n’ibigize telefone biriho amafoto ya Justin Bieber.

Kugeza ubu ntiharatangazwa agaciro k’amafaranga yaba yarashowe muri ubu bufatanye bw’uruganda na Justin Bieber dore ko aba bombi bigeze gukorana mu 2001.

Si ubwa mbere uru ruganda rw’imideli rukoranye n’abahanzi b’ibyamamare dore ko rwigeze gukorana n’abarimo Ariana Grande na Billie Eilish.

Imyambaro yariho ifoto ya Justin Bieber yakuwe ku isoko
Imipira yari yakozwe na H&M ikamaganwa na Justin Bieber
Justin Biber yikomye uru ruganda arushinja gusohora imyambaro atabahaye uburenganzira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .