Umutoniwase Anastasie yerekeje muri Philippines guhatana muri Miss Earth 2018

Yanditswe na Uwiduhaye Theos
Kuya 12 Ukwakira 2018 saa 07:55
Yasuwe :
0 0

Umutoniwase Anastasie wegukanye itike yo guhagararira u Rwanda muri Miss Earth 2018 iri kubera muri Philippines, yafashe indege agiye guhatana na bagenzi be bagera kuri 89.

Uyu mukobwa w’imyaka 18 yamenyekanye kubera gutega moto ubwo bajyaga aho bahagurukira berekeza mu mwiherero wa Miss Rwanda 2018, bikaza kumugira Miss Populality muri iri rushanwa.

Yahagurutse ku kibuga cy’indege i Kanombe ku gicamunsi cyo kuri uyu wa Gatanu tariki 12 Ukwakira 2018.

Irushanwa rya Miss Earth rizitabirwa n’abagera kuri 90, abandi baryitabiriye batangiye gusesekara muri Philippines kuwa Gatandatu tariki 6 Ukwakira 2018.

Mbere yo gufata indege, Umutoniwase yabwiye IGIHE ko ubukererwe bwatewe n’uko yari akiri mu myiteguro kugira ngo azagende ameze neza, akiri no gushaka ibyangombwa no gushyira ubwenge ku murongo ‘kandi nizeye ko nzagera kure hashoboka’.

Uyu mukobwa yavuze ko kuba abandi bamaze iminsi muri Philipines nta kibazo kirimo kuko yizeye ko nawe nagerayo azitwara neza akazana ikamba i Kigali.

Umubyeyi we [nyina] wari wamuherekeje yanze kuvugana n’itangazamakuru ngo agire icyo avuga ku rugendo rw’umukobwa we, ariko Umutoniwase yavuze ko impanuro ikomeye yamuhaye ari ugusenga.

Ati “Impanuro nyamukuru yampaye ni ugusenga cyane kugira ngo urugendo rwanjye ruzagende neza ndetse anansaba kuzitwara neza nk’umunyarwandakazi nkahesha ishema igihugu cyanjye.”

Uyu mukobwa yerekeje muri iri rushanwa nyuma ya mugenzi we Uwase Hirwa Honorine uzwi nka ‘Igisabo’ wagiyeyo umwaka ushize, bikavugisha benshi ubwo yangaga kwambara bikini. Gusa mugenzi we avuga ko azayambara.

Irushanwa rya Miss Earth yitabiriye rifite intego y’ubukangurambaga mu guhangana n’imihindagurikire y’ikirere ihangayikishije ibihugu byinshi ku Isi. Ubu riri kuba ku nshuro ya 18.

Riba ririmo amatsinda menshi, Umutoniwase yashyizwe mu ryitwa ‘Fire’.

Yavuze ko afite umushinga kurwanya ivangwa ry’imyanda cyane cyane irimo ibikoze muri pulasitiki.

Irushanwa ry’uyu mwaka ryatangiye kuwa 6 Ukwakira, rizasozwa kuwa 3 Ugushyingo ahitwa Mall of Asia Arena mu Mujyi wa Pasay.

Umwaka ushize ikamba ryegukanywe na Karen Ibasco wo muri Philippines wari ku isonga mu basubije neza, ari nacyo cyashingiweho ahigika bagenzi be bari bahatanye.

Umutoniwase yavuze ko yiteguye kuzana ikamba i Kigali
Akanyamuneza kari kose kuri uyu mukobwa uhagarariye u Rwanda
Umubyeyi wa Umutoniwase yari yavuye mu karere ka Muhanga aje kumushyigikira
Fiona uri hagati bari bahanganye muri Miss Rwanda 2018 yari yaje kumuherekeza
Inshuti n'abavandimwe ba Umutoniwase Anastasie bari babukereye baje kumuherekeza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza