Maylo yasohoye indirimbo yakoranye na Bull Dogg, yizeza abahanzi bo mu ntara kubabera urufunguzo rubinjiza i Kigali

Yanditswe na Nsengiyumva Emmy
Kuya 22 Nzeri 2020 saa 10:14
Yasuwe :
0 0

Umuraperi Hirwa Maylo umaze imyaka ikabakaba icumi akorera umuziki hanze ya Kigali, nyuma yo gusohora indirimbo nshya ’Inyenyeri’ aherutse gukorana na Bull Dogg, yijeje abahanzi bo mu ntara kubabera urufunguzo ruzabinjiza mu Mujyi wa Kigali.

Ubaye warakurikiranye umuziki nyarwanda kuva mu myaka ya 2010, ukareba ibitaramo abahanzi bakomeye bakoreye mu karere ka Musanze, waba warigeze kumva izina Maylo.

Uyu muraperi w’umuhanga ariko utaragize amahirwe y’uko izina rye ryakwamamara mu rwego rw’igihugu, yavuze ko nyuma y’igihe ashyira ibintu bye ku murongo, asanga akwiye gukora kugeza yinjiye muri Kigali. Ibintu na we ubwe ahamya ko bizafasha n’abandi bahanzi bo mu ntara bafite impano.

Ati ”Ubu ngiye kugerageza kwamamaza ibihangano byanjye mbigeze n’i Kigali. Ngiye gufungurira abantu b’i Kigali babone ko no mu ntara hari impano.”

Uyu mugabo yamenyekanye mu ndirimbo zinyuranye zirimo Mureke agende, Ishavu, Inkovu z’ibihe n’izindi. Mu mvugo ye ntiyerura ngo ahamye ko kuba akorera umuziki mu karere ka Musanze biri mu byadindije ukumenyekana kw’izina rye ku rwego rw’Igihugu, ariko abigaragaza nk’ikibazo gikomeye.

Nubwo yanyuze muri ibi byose ariko, ngo ntabwo yigeze acika intege. Ati ”Sinjya ncika intege kuko ngiye kuzuza imyaka 10 nkora umuziki, n’ubu ndacyakora uko nshoboye. Ngiye gukora uko nshoboye namamaze ibihangano byanjye, nereke Abanyakigali ko bakwiye kuyirenza amaso bakareba no mu ntara, ko hari impano.”

Nyuma yo gukora ubukwe akanibaruka imfura ye mu minsi ishize, Maylo avuga ko yahagurukiye kongera gukora umuziki, anasaba abakunzi b’umuziki kwitega imikorere itandukanye n’iya mbere.

Ati ”Habanje gahunda zo kubaka urugo, mpita mba umubyeyi, ntabwo byari byoroshye ariko ubu nagarutse neza mu muziki kandi nizeye ko urwego rwiza ndugeraho bidatinze.”

Indirimbo nshya yakoranye na Bull Dogg mu buryo bw’amajwi yakozwe na Trackslayer, mu gihe amashusho yayo yo yafashwe anatunganywa na Mici.

Iyi kimwe n’izindi ndirimbo uyu muraperi agiye gusohora muri iyi minsi, ahamya ko agiye kuzisunika zikaba zanamenyekana ku rwego rw’igihugu, aho kuba mu karere ka Musanze aho asanzwe azwi cyane.

Ikiganiro na Maylo, umuhanzi wo mu karere ka Musanze

Indirimbo "Inyenyeri" Maylo yakoranye na Bull Dogg


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .