Umunyu wabunze witwa ivu- Rutangarwamaboko avuga ku baserukanye ’bikini’ muri Miss Africa Calabar

Yanditswe na Umutoni Rosine
Kuya 31 Ukwakira 2020 saa 02:54
Yasuwe :
0 0

Umupfumu Rutangarwamaboko yanenze abakobwa baserukanye ‘bikini’ muri Miss Africa Calabar, ubwo hatoranywaga abakobwa bagomba kuvamo uzaserukira u Rwanda.

Ni nyuma y’aho abantu batandukanye bagaragaje ko batanejejwe n’uko abakobwa b’abanyarwandakazi, baserutse muri ubu buryo muri iri rushanwa ritegurwa n’Abanya-Nigeria.

Nk’Umuyobozi w’Umuryango Urwanya ruswa n’Akarengane, Transparency International Rwanda, Ingabire Marie Immaculée, yakomoje ku bakobwa biyerekanye mu mwambaro wa ’bikini’ muri Miss Africa Calabar, ashimangira ko ubwiza bw’umwari budakwiye gushingira mu kwiyambika ubusa.

Umupfumu Rutangarwamaboko ubusanzwe witwa Nzayisenga Modeste, nawe yanditse kuri Twitter agaragaza ko atashimishijwe no kubona abakobwa bambaye ubusa ku karubanda.

Ati “Umunyu wabunze witwa ivu. Harya nk’aya mahano tuzayiyama kugeza ryari koko Benimana? Sinumva ukuntu ibintu nk’ibi bihabwa urubuga mu gihugu cyihaye intego yo kubakira ku muco no kwisubiza agaciro nk’uko Umukuru yabivuze kandi bigahagarikirwa n’abitwa Abayobozi, byasiga murage ki se?”

Mu batanze ibitekerezo kuri ubu butumwa bwa Rutangarwamaboko hari abavuze ko nta gikuba cyacitse, ariko abandi bagaragaza ko bitari bikwiye ku mwari w’u Rwanda.

Abakobwa batanu barimo bane bitabiriye Miss Rwanda nibo babonye itike mu gushakisha umukobwa uzahagararira u Rwanda muri Miss Africa Calabar mu 2020 izabera muri Nigeria mu mpera za 2020.

Barimo Murebwayire Irène witabiriye Miss Rwanda mu 2019 ndetse na Uwihirwe Yasipi Casmir wabaye Igisonga cya Mbere cya Miss Rwanda mu 2019. Biyongeraho Kirezi Rutaremara Brune na Uwase Aisha nabo bari muri 20 bitabiriye umwiherero wa Miss Rwanda mu 2020.

Undi mukobwa wabashije gutsinda muri iri jonjora rya Miss Africa Calabar ni uwitwa Gacukuzi Belyse usanzwe ari umunyamideli.

Aba bakobwa batoranyijwe mu bagera ku munani bashakishwagamo uzahagararira u Rwanda muri iri rushanwa.

Buri mukobwa yanyuze imbere y’akanama nkemurampaka abazwa ibibazo bitandukanye birimo ibijyanye n’ibidukikije, ingaruka Coronavirus yagize mu buzima bwa muntu, impano afite n’ibindi.

Abakobwa batambutse imbere y’akanama nkemurampaka inshuro ebyiri, ubwa mbere bari bambaye amapantalo n’imipira mu gihe ku yindi nshuro biyerekanye mu mwambaro wa ’bikini’ ukunze kuvugisha benshi mu Rwanda.

Iri rushanwa ribera muri “Cross River State” imwe muri Leta zigize Nigeria. Mu mwaka ushize ryegukanywe na Irene Ng’endo Mukii wari uhagarariye Kenya. Umukobwa wegukana iri rushanwa ahabwa 35000$ (asaga miliyoni 34 Frw) n’imodoka nshya yo mu bwoko bwa Ford SUV.

Rutangarwamaboko asanzwe ari umushakashatsi, umwigisha w’ubuzima bushingiye ku muco akaba n’inzobere mu by’umuco, amateka, imbonezabitekerezo (Filosofiya) n’ubuzima bwa muntu bushingiye ku myizerere, imyumvire, imitekerereze, imyitwarire ndetse n’imigirire.

Ni umugabo w’abana babiri yabyaranye na Umuziranenge Sana Cynthia, barimo imfura yabo bise Umugiramana n’ubuheta bise Benimana. Izina Rutangarwamaboko arikomora kuri sekuruza wari umukuru w’imandwa.

Rutangarwamaboko yagereranyije abakobwa bambaye bikini muri Africa Calabar n'umunyu wabunze
Abakobwa umunani bahatanye bose ubwo bari bagiye kwiyerekana muri bikini, ibintu byaje kuvugisha benshi
Aba bakobwa babanje kwiyerekana bambaye amapantalo, imipira n'inkweto ndende

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .