Umugore wa John Legend yakuyemo inda

Yanditswe na Uwiduhaye Theos
Kuya 1 Ukwakira 2020 saa 05:39
Yasuwe :
0 0

Nyuma yo kujyanwa mu bitaro ikubagahu ku Cyumweru tariki 27 Nzeri 2020, umunyamideli akaba n’umugore wa John Legend, Chrissy Teigen, kubera kuva amaraso menshi, byarangiye inda y’umwana we wa gatatu yari atwite ivuyemo mu buryo butunguranye.

Ni inkuru Chrissy Teigen yatangaje yifashishije imbuga nkoranyambaga, aho yanditse kuri Instagram agaragaza ko umwana we wa gatatu w’umuhungu yari atwite atabashije gukomeza ubuzima bwe mu nda mpaka avutse. Uyu mugore yari yatangaje ko umwana wabo bari bamwise Jack.

Mu butumwa yashyize ku mbuga nkoranyambaga, yagaragaje afite agahinda gakomeye. Yakomeje avuga ko ubundi batajyaga bita amazina abana bataravuka, ariko uyu bikaba byabaye ngombwa ko barimushakira.

Ati “Ntabwo tujya duhitamo amazina y’abana bacu kugeza ku bihe bishoboka bya nyuma, bakimara kuvuka, mbere yo kuva mu bitaro. Ariko twe, ku mpamvu runaka, twari twatangiye kwita aka kana Jack. Azahora ari ko yitwa kuri twe. Jack yakoze ibishoboka byose ngo abe umwe mu bagize umuryango wacu muto, kandi azahoramo iteka.”

Nubwo atamwumva, yakomeje yihanganisha uyu muhungu we witabye Imana amubwira ko nawe yababajwe n’ibihe yanyuzemo bikomeye, ndetse bakaba batabashije kumugeza mu rugo aho yari gusanga abavandimwe be. Arangije ati “Tuzahora tugukunda.”

Yashimiye abakomeje kubafata mu mugongo n’ababahundagajeho amasengesho.

Mu bundi butumwa yashyize ku rukuta rwe rwa Twitter, yashyizeho amagambo avuga ati “Dusubiye mu rugo tuva mu bitaro nta mwana. Ni gute ibi bintu byaba ari ukuri?”

Tariki 28 Nzeri, nibwo uyu mugore yari yatangaje ko yajyanywe mu bitaro igitaraganya, ariko avuga ko ubuzima bwe n’ubw’umwana bumeze neza nta kibazo na gito gihari.
Ati “Umwana ameze neza kurusha Luna cyangwa Miles [aba ni abana be ba mbere]. Ari gukina mu nda kurusha uko bo babikoze. Ndamwishimiye. Arakomeye.”

Nibwo bwa mbere yari agiye kubasha kubyara, none nabyo biranze

We na John Legend bakoze ubukwe ku wa 10 Nzeri 2013, mu Mujyi wa New York.

Kuva mu 2013 bategereje kubyara imyaka irenga ibiri baraheba nyuma nibwo bagiye kwa muganga babagira inama yo kwifashisha uburyo bwo guhuza intanga zabo, bakabyara hifashishijwe ikoranabuhanga mu buryo buzwi nka ‘In vitro fertilization (IVF)’ mu rurimi rw’Icyongereza, kubera ko Teigen yari afite ikibazo muri nyababyeyi.

Ku wa 14 Mata 2016 babonye umwana wabo wa mbere w’umukobwa bise Luna. Nyuma y’indi myaka ibiri ku wa 17 Gicurasi 2018 bongera kubona undi mwana w’umuhungu bise Miles. Aba bana bose bababyaye hifashishijwe IVF.

Mu 2017, John Legend yabwiye Cosmopolitan Magazine ko kuba barabanje kubura urubyaro ari kimwe mu bintu byakomeje urukundo rwabo.

Uyu mwana ni we wa mbere Teigen yari yabashije gutwita mu buryo busanzwe ndetse haburaga igihe gito ngo amwibaruke, none nawe ubuzima bwe bumuciye mu myanya y’intoki.

John Legend afite imyaka 41 mu gihe umugore we afite 34. John Legend aherutse gushyira hanze album nshya yise ’Bigger Love’.

Chrissy na John Legend ntabwo biyumvishaga uko babuze umwana wabo
Ibihe bya nyuma basangiye n'umwana wabo witabye Imana akivuka
John Legend na Chrissy Teigen bafitanye abana babiri bose bavutse hifashishijwe uburyo bwo guhuza intanga
Mu 2013 byari ibyishimo ubwo aba bombi bakoraga ubukwe
John Legend n'umugore we bamaranye imyaka 13
John Legend n'umugore we bamaranye imyaka 13
John Legend n'umugore we bari bategereje kwibaruka umwana wa gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .