Uko Naason yisanze ari icyamamare bimugwiririye kubera Kamichi na Ally Soudy

Yanditswe na Nsengiyumva Emmy
Kuya 28 Gicurasi 2020 saa 11:56
Yasuwe :
0 0

Umuntu wakunze muzika nyarwanda, ntazibagirwa mu myaka icumi ishize igihe injyanya ya R&B n’utundi turirimbo dutuje twari ku isonga, aricyo kirango cy’umuntu wese ushaka gutereta.

Ku bari mu mashuri yisumbuye, ni bake wasanga batarandikiye inshuti zabo ngo hanyuma bashyiremo n’uturirimbo tw’urukundo twuzuyemo imitoma imwe wumva ugasesa urumeza, nka “Mfite amatsiko” n’izindi.

Nshimiyimana “Naason” ni umwe mu bafashije benshi kubaka urukundo rugakomera kubera akajwi ke keza, gaherekejwe n’utugambo dusize umunyu tw’urukundo, two gutaka kuva hasi kugera hejuru umukobwa.

Uyu musore yatangiye muzika mu buryo butandukanye n’ubw’abandi kuko we igihe kinini cye yari mu bikorwa byo gukora indirimbo, akaririmba inshuro nke. Kuri Radio zari zigezweho icyo gihe, wumvagaho indirimbo nyinshi yagizemo uruhare, iyo atacuranzemo Piano, akaba yarayitanzeho ibindi bitekerezo.

Mu kiganiro na IGIHE uyu muhanzi yahamije ko yinjiye mu muziki yifuza kuba utunganya indirimbo z’abandi (Producer) kuruta kuririmba. Ibyo gukora indirimbo ze ngo ni ibintu byamugwiririye kubera kotswa igitutu n’abanyamakuru Kamichi wakoraga ku Voice of Africa na Ally Soudy wari ikirangirire kuri Radio Salus.

Ati “Natangiye niga gukora indirimbo, icyakora kenshi wasangaga nikorera izanjye nkiyigiraho kugira ngo ningira uwo nkorera mbe maze kugira aho ngera.”

Naason avuga ko yatangiye gukora umuziki yiga mu mashuri yisumbuye bityo mu mpera z’icyumweru akaba aribwo ajya muri ibyo. Uyu muhanzi avuga ko mu gihe yabaga arangije gukora indirimbo kenshi yazijyanaga ku ishuri akazumvisha abo biganaga.

Umunsi umwe mu 2010, uyu musore wigaga muri APACE yahuye na Kamichi afite indirimbo ‘Mfite amatsiko’ yari yikoreye arayimwaka ayijyana kuri radiyo birangira imenyekanye cyane.

Ati “Numvaga nyine ntarashaka kuririmba, mvuye kwihugura muri korali, Kamichi twaje guhura kuko yari anzi ku ma studio aho nakoreraga ansaba ko nazaririmba nanjye mwumvisha indirimbo nshya nari nikoreye, amaze kuyumva yahise ayitwara, nyuma y’icyumweru kimwe nashidutse indirimbo yamenyekanye hose kuko yari yayihaye n’abandi banyamakuru.”

Naason avuga ko indirimbo ye ya kabiri “Nyigisha” nayo yasohowe na Ally Soudy, ati “Yaraje arambwira ngo ibi bintu ntukomeze kubikinisha.”

Uyu muhanzi avuga ko yinjiye mu muziki neza nawe akabyiyumvamo ubwo yakoraga indirimbo yise “Ab’Isi” yari iya kane ariko ko hari igihe cyageze umuziki ukamurusha imbaraga bituma asubira inyuma gutyo.

Ati “Nageze aho mu 2013-2014 umuziki undusha imbaraga z’ubushobozi, warahindutse uba ikintu kinini byari bigoye ko nkora njye nyine nta bantu bamfasha nk’uko mbere nakoraga. Nagerageje gukora ariko imbaraga nari mfite ntabwo zari zihagije.”

Naason yatangiye ibijyanye no gukora indirimbo mu 2005-2006, icyakora ahamya ko yabigiyemo neza mu 2010 ubwo yasohoraga indirimbo ye ya mbere ari nabwo yari atangiye kubimenya neza.

Kuri ubu uyu muhanzi ahamya ko nyuma yo kwiga isoko akabona abantu bamufasha ari uburyo bwiza bwe bwo gukora cyane bityo akaba yarenga aho yari ahagaze.

Naason aherutse gusohora indirimbo nshya yise “Ubufindo” yakoranye na Social Mula, iya kabiri kuva atangiye gukorana na DJ Theo nk’umujyanama we mushya.
Naason yasabye abafana b’umuziki nyarwanda kumushyigikira no gukunda indirimbo ze bityo bakaba bamuteye imbaraga mu rugendo rwe rwa muzika.

Ikiganiro na Naason wemeza ko yagarutse mu muziki wese

Reba indirimbo nshya "Ubufindo" yakoranye na Social Mula

Nyigisha ni imwe mu ndirimbo za Naason zakunzwe cyane

Naason avuga ko yubuye iby'umuziki n'imbaraga nyinshi kuko afite ikipe imufasha
Kamichi ni umwe mu bashimirwa na Naason kuba yaramufashije mu ntangiriro
Ally Soudy nawe ni umwe mu bo Naason ashimira kuba baramufashije mu gutangira urugendo rwe mu muziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .