00:00:00 IGIHE NETWORK KN KINYARWANDA EN ENGLISH FR FRANCAIS

Uko isoni zayoboye Niz Beatz ku buhangange mu gukora indirimbo ziri kubica bigacika

Yanditswe na Nsengiyumva Emmy
Kuya 10 June 2022 saa 11:09
Yasuwe :

Ni umusore ukiri muto mu maso, utuje cyane ndetse udakunda kuvuga menshi akagira isoni cyane ariko ufite ibiganza byakoze indirimbo zaryoheye amatwi ya benshi bakunda umuziki w’u Rwanda.

Yitwa Nizar Ashraf Niyonkuru cyangwa se Niz Beatz nkuko yamenyekanye. Ni umusore wize ibijyanye n’Ubukerarugendo nubwo byarangiye yihebeye umuziki.

Uyu musore wakuranye impano y’umuziki, yavuze ko mbere yatekerezaga ko azavamo umuhanzi uririmba ariko isoni ze no gutinya kugaragara kuri camera bigenda bituma ajya kure y’inzozi ze.

Mu kiganiro cyihariye yahaye IGIHE, Niz Beatz yavuze ko yinjiye mu gutunganya umuziki atari zo nzozi ze, nubwo byamuhiriye kuri ubu adashobora kubivamo.

Mu mwaka wa 2015 nibwo Niz Beatz yinjiye bya nyabyo mu gukora indirimbo z’abahanzi.
Ati “Kuva mu 2013 nakundaga umuziki nkanaririmba, ariko ibijyanye no kugaragara kuri camera nkumva byangora. Icyo gihe nibwo natangiye kujya nkora indirimbo mbona birashoboka.”

Niz Beatz yatangiye kujya akorana n’abahanzi b’i Rusizi iwabo, aza kumenyana na Producer Mastola uri mu bamwongereye ubumenyi anamukura i Rusizi amugeza muri Kigali.

Nyuma y’uko Mastola agiye muri Kenya guturayo, Niz Beatz yahise yiyambazwa muri Country Records ya Noopja wari usanzwe amuzi kuva i Rusizi.

Aha ntabwo Niz Beatz yahatinze kuko mu 2018 yashinze studio ye bwite kugeza mu 2020 ubwo yegukanaga iyahoze ari Touch Records kuri ubu yamaze kwitwa One Touch Records.

Intego za Niz Beatz ni ugukomeza kwagura impano ye, agakora indirimbo nyinshi kandi zikunzwe, umuziki nyarwanda ukaguka.

Mu ndirimbo zikomeye Niz Beatz amaze kurambikaho ibiganza harimo Agatunda ya Afrique, Say my name ya Kenny Sol, Setu ya Alyn Sano, Igikwe ya Gabiro Guitar afatanyije na Confy, Wankaniye ya Kevin Kade, Mali ya Confy n’izindi.

Hari kandi n’izindi ndirimbo nshya ziri gusohoka muri iyi minsi nka Forget ya Kenny Sol,Akanyenga ya Afrique, Kigali Ngari ya Kid Gaju na Juno Kizigenza.

Niz Beatz ni umwe mu ba 'Producers' uri mu bari gukora indirimbo zikunzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .