Gisa cy’Inganzo yahishuye ibihombo yatewe n’igihe yataye mu biyobyabwenge

Yanditswe na Nsengiyumva Emmy
Kuya 29 Mata 2020 saa 03:37
Yasuwe :
0 0

Tariki 27 Mata 2020 nibwo Gisa cy’Inganzo yizihizaga isabukuru y’amavuko ye ya 26, uyu munsi ubundi ntiyari asanzwe awuha agaciro ariko kuri iyi nshuro kuwishimira asanga ari ingenzi kuko ari umwaka w’ibitangaza yongeye kuvukamo bundi bushya.

Uyu muhanzi avuga ko yongeye kuvuka bundi bushya nyuma yo kuva mu biyobyabwenge byari byaramugize imbata kuri ubu akaba yaramaze kugaruka mu buzima busanzwe ndetse akaba n’umwe mu bahamya b’uko Imana igira neza ikaba yakura umuntu muri ubwo buzima.

Yagize ati “Uyu mwaka urihariye kuko hari icyo usobanuye cyane kuri njyewe, ni umwaka w’amateka mashya ku buzima bwanjye, Imana yansubije ubuzima bushya nagombaga kuba mfite kuva mu ivuka ryanjye. Urumva hari ubuzima naciyemo busa naho bugoye, impamvu nishimiye uyu cyane ni uko ari wo utangiye amateka mashya kuri njye.”

Gisa cy’Inganzo avuga ko yavukiye mu muryango ukunda Imana bituma ku myaka umunani atangira kuririmba ariko indirimbo zo kuramya no guhimbaza Imana.

Ku myaka 11 bitewe n’uko yitwaraga mu rusengero, impano ye yaje kubonwa n’utunganya indirimbo (Producer) basenganaga amwemerera kumukorera indirimbo.

Nyuma y’iyi ndirimbo kubera ubuhanga bwe hari Ministry yitwa “Umva nshuti” yamwemereye kumukorera album y’indirimbo 10.

Gisa yize HEG [Amateka, ubukungu n’Ubumenyi bw’Isi] mu mashuri yisumbuye aririmba indirimbo zo guhimbaza Imana ariko ageze mu mwaka wa Gatandatu w’amashuri yisumbuye asa n’utannye.

Aha akaba yari amaze gukora indirimbo zinyuranye zirimo “Amarira y’uruhinja” yafatanyije na Ama G the Black n’izindi zamenyekanye.

Gisa cy’Inganzo avuga uko yinjiye mu biyobyawenge, yagize ati” Nashutswe n’urundi rubyiruko, urumva njye nakuriye mu buzima bwo gukunda Imana bituma buri wese wanshukaga mpita nitabira cyane ko ntari nzi n’ibyo ari byo kugeza ubwo nisanze nangiritse.”

Gisa yemeza ko yahindukiye muri gereza ubwo yari asigaje amezi atandatu mu mwaka n’igice yari yakatiwe nibwo yitekerejeho afata icyemezo cyo guhinduka.

Ubu buzima bubi yanyuzemo, Gisa avuga ko bwamuhombeje ibintu byinshi.

Ati” Harimo gutangaza igice cy’indangagaciro, bikudindiriza imikorere n’iterambere ryawe ikindi bigusubiza inyuma. Nk’ubu iyo ndebye nk’abo twatangiranye aho bageze n’imikorere yabo nibwo mpita mbibona neza.”

Gisa avuga ko kugeza ubu yishimira kuba yarahindutse ku buryo asigaye yaragarutse mu muryango nyarwanda neza ariko by’umwihariko iwabo mu rugo.

Ati” Ababyeyi bari barantakarije icyizere bikanambabaza cyane, nkimara no kuvayo baranyishishaga ariko kugeza ubu ndashima Imana ko ntakibazo tubanye neza.”

Uyu muhanzi avuga afite imishinga itandukanye yo gukora indirimbo zirimo n’izarangiye zizasohoka mu minsi ya vuba cyane.

Reba ikiganiro na Gisa cy’inganzo

Gisa Cy'Inganzo yahishuye ibihombo yatewe n’igihe yataye mu biyobyabwenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .