Ubuzima bushaririye bwa Izanyibuka wagowe n’amafaranga y’ishuri, akaba uwa mbere mu gihugu

Yanditswe na Nsengiyumva Emmy
Kuya 4 Nzeri 2020 saa 12:54
Yasuwe :
0 0

Izanyibuka Yvette ni umwana wa gatatu mu muryango w’abana batandatu, avuka ku babyeyi bari abarimu, ariko batakundaga guhuza mu buzima bwa buri munsi. Byatumye akurira mu makimbirane yo mu muryango yazahaje ubukungu bw’urugo, bigira ingaruka ku myigire y’abana.

Nubwo ubuzima bwari bumeze gutyo, Izanyibuka w’imyaka 19 mu mwaka ushize yesheje agahigo aba uwa mbere mu Rwanda mu Ishami ry’Imibare, Ubukungu n’Ubumenyi mu bya mudasobwa (MCE), yuzuza ikizami cya Leta.

Uyu mwana yavutse mu 2001, mu Ntara y’Amajyaruguru mu Karere ka Burera. Ubwo yari agize imyaka umunani gusa y’amavuko, umuryango we waje kwimukira mu karere ka Nyagatare, baba ariho batura.

Yakuze abona Se na nyina batumvikana

Izanyibuka avuga ko yakuze abona Se na Nyina batumvikana, kugeza ubwo nyina yahukanye, ava mu rugo ajya kwikodeshereza. Nyina yari umugore wa kabiri muri urwo rugo, kuko uwa mbere se yashatse atabyaye.

Byatumye se akunda abana be cyane. Nubwo bajyanye na nyina, yakomeje gukurikirana ubuzima bwabo, abishyurira ishuri n’ibindi.

Ababyeyi be batandukanye yiga mu mwaka wa gatatu w’amashuri yisumbuye. Mu mwaka wa mbere, ibihembwe bibiri bibanza nibyo byonyine amafaranga y’ishuri yishyuriwe igihe, ubundi yaraburaga, abayobozi b’ishuri bakamuhimisha kudakora ibizamini.

Bitewe nuko yari umuhanga asobanurira bagenzi be amasomo abagoye, ikigo ntabwo cyifuje kumwirukana, yakunze kujya yimurwa atanakoze ibizamini kugera mu wa gatatu urangiza icyiciro rusange cy’amashuri yisumbuye.

Mbere gato ko bakora ikizami cya Leta gisoza icyiciro rusange, uyu mukobwa yaje kwirukanwa, asabwa kujya kuzana amafaranga y’ishuri. Byatumye atitwara neza cyane mu bizami bya Leta, atsindira ku manota make.

Yabonye ishami yiyumvamo, bagenzi be arabanikira

Mu minsi ya nyuma yitegura kujya kwiga mu mwaka wa kane w’amashuri yisumbuye, se yafunzwe bitewe no gushyamirana n’abaturanyi be.

Inzozi z’uyu mukobwa wari usigaye abana na Se zabaye nk’iziyoyoka. Ni we wirirwaga ku Murenge yagiye kugemura no gusura se.

Nyuma y’iminsi mike se baje kumurekura, ahita amujyana kwiga mu wa kane w’amashuri yisumbuye. Imyigire yo ntiyari itandukanye na mba n’uko yize icyiciro rusange, kuko ubukene bwari bukiri bwabundi.

Icyakora kuko yari umuhanga asobanurira abandi bana, no mu kigo gishya yagiyeho (Sancta Maria Karambo i Gicumbi) ntabwo bakunze kumwirukana, baramurekaga akiga. Kuva mu wa Kane w’amashuri yisumbuye, uyu mukobwa yabaga uwa mbere mu ishuri.

Ubwo yiteguraga kurangiza uwa kane w’amashuri yisumbuye, inkuru nziza yamugezeho ko Se na Nyina biyunze, nyuma y’imyaka itari mike batabana.

Ibyishimo ntibyamaze kabiri

Nyuma y’igihe gito cyane amaze abana n’ababyeyi bundi bushya, se yaje kongera gufungwa bitewe n’amakimbirane yo mu muryango we. Agifungurwa, igihe gito se yaje kurwara bitunguranye yitaba Imana, uyu mwana ari ku ishuri.

Ari mu wa gatanu w’amashuri yisumbuye, nibwo se yitabye Imana azize urupfu rutunguranye, cyane ko atarwaye igihe. Iki gihe indoto ze zari zongeye kuyoyoka, icyakora avuga ko yakomejwe na nyina yari asigaranye, wamusabye ko yasubira ku ishuri kandi akitwara neza.

Kubura umubyeyi ntabwo byamuciye intege, yasubiye ku ishuri nk’ibisanzwe yiga ashyizeho umuhate, nabwo akomeza kuba uwa mbere.

Mu kurangiza umwaka wa gatanu, uyu mukobwa yaje kumenya ko umuntu urangije ari uwa mbere ku kigo bahita bamuha akazi. Usibye ibi ariko yabonye bagenzi be bari imbere ye ukuntu bahembwe neza kubera ko bujuje ikizami cya Leta, bimutera ishyaka ryo gukora cyane.

Yaje kuba uwa mbere mu Rwanda

Mu kizamini cya Leta, uyu mukobwa wari usanzwe aba uwa mbere ku ishuri, yirengagije ibibazo byose yanyuzemo arakora cyane.

Akirangiza gukora ikizamini, avuga ko atari yizeye gutsinda neza, ariko yatunguwe no kumva muri Minisiteri bahamagaye umubyeyi we bamubwira ko umwana we yabaye uwa mbere mu gihugu muri MCE, bityo agomba kuzajya gufata igihembo.

Yari yarahawe akazi ko kureberera abakobwa biga muri iki kigo, ariko anashinzwe inzu y’ikoranabuhanga abanyeshuri bigiragamo.

Nguko uko uwari wahawe akazi n’ikigo kuko yabaye uwa mbere mu ishuri, yisanze abaye uwa mbere no mu gihugu, ashyikirizwa mudasobwa nk’igihembo cya Minisiteri. Nubwo ariko yabaye uwa mbere mu gihugu yujuje ikizami cya Leta, yari ataramara kwishyura ikigo amafaranga y’ishuri.

Ibi byatumye adahita ahabwa impamyabumenyi ye, ahubwo ibikwa n’ikigo. Amafaranga yari ari gukorera yari azi ko ariyo azishyuramo akabona kuyihabwa.

Covid-19 yaramuvangiye, akazi karahagarara

Ubwo Covid-19 yageraga mu Rwanda, amashuri yarafunzwe, akazi ke nako karahagarara. Amezi atatu yari amaze ku murimo ntabwo yashoboraga gutuma yishyura amadeni ngo ahabwe impamyabumenyi ye.

Ubwo byari bibaye ngombwa ko ayikeneye kugira ngo yiyandikishe muri kaminuza, avuga ko ikigo cyayimutije akiyandikisha, ariko agahita ayibasubiza.

Izanyibuka, muri ibi bihe bya Covid ntabwo yigeze asubira iwabo mu rugo, ahubwo yagumye ku ishuri aho yakoraga ari naho abarizwa kugeza ubu. Avuga ko yanze gutaha ngo atajya kurushya umubyeyi we uri kwita ku bandi bana ari umwe.

Inzozi ze ni ukwiga akaminuza, akazakina filime y’ubuzima bwe

Uyu mwana w’umukobwa avuga ko yifuza kwiga akaminuza mu bijyanye n’ikoranabuhanga. Icyakora asanga kwiga yajya abifatanya no gukina filime, kuko nabyo abikunda kandi ari ibintu yumva afitemo impano.

Ati ”Iyo mbonye umwanya ndandika, mba numva nazakina filime yitwa Umuryango ngendeye ku byo nabayemo, narayanditse naranayirangije, mbonye uwamfasha kuyandika neza no kuyikina nayimubwira neza kuko ni ibintu byambayeho, ni ubuzima bwanjye.”

Uyu mukobwa avuga ko yakunze filime cyane arebeye kuri Papa Sava ikinwa na Niyitegeka Gratien.

Ati “Nakunze ko akina ubuzima tubamo bwa buri munsi. Henshi uzasanga bavuga ko bakina filime ariko bagendeye ku bitekerezo runaka bihimbano. We nkunda ko akina ubuzima bwa buri munsi.”

Uyu mukobwa asanga ahereye kuri filime y’ubuzima yakuriyemo, yazakomereza no ku zindi mu gihe yaba abonye abamufasha, kuko yabaye mu buzima bwatumye abona inkuru nyinshi zitandukanye.

Agira inama abana bakuriye mu miryango ifite ibibazo, yagize ati ”Kuvuka iwanyu bitameze neza bijye bibaha isomo, bumve ko amahirwe amwe gusa basigaranye ari ukwiga kandi neza, umuntu akazihindurira ubuzima kuko ntawundi waguhindurira ubuzima icyo gihe atari wowe.”

Ikiganiro na zanyibuka Yvette

Izanyibuka wakuriye mu buzima bubi ntibyamubujije kwiga neza akaba uwa mbere mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .