00:00:00 IGIHE NETWORK KN KINYARWANDA EN ENGLISH FR FRANCAIS

Hasobanuwe iby’abaryamana bahuje ibitsina n’ababyaye bifuza kwitabira Miss Rwanda

Yanditswe na Nsengiyumva Emmy
Kuya 24 January 2022 saa 09:51
Yasuwe :

Hashize igihe gito ubuyobozi bwa Miss Rwanda busohoye ingengabihe y’Irushanwa rya Miss Rwanda 2022 n’uko rizagenda, ariko hakomeje kumvikana impaka ku bijyanye n’icyo ubu buyobozi butekereza ku bijyanye n’abaryamana bahuje ibitsina n’ababyaye.

Mu kiganiro na IGIHE, Umuvugizi wa Miss Rwanda, Nimwiza Meghan yagarutse ku bijyanye no kwemerera abaryamana bahuje ibitsina n’ababyaye baryitabira.

Izi mpaka zazamutse mu minsi ishize nyuma y’uko ubuyobozi bw’Irushanwa rya Mr Rwanda butangaje aho buhagaze ku bijyanye n’abaryamana bahuje ibitsina.

Ku ruhande rwa Miss Rwanda, Nimwiza Meghan wabaye Miss mu 2019, yavuze ko ibyo kuba umukobwa aryamana n’uwo bahuje ibitsina, bitagenderwaho mu gutoranya abitabira iri rushanwa.

Aha yagize ati “Mu byo tugenderaho nka Miss Rwanda ntabwo ibyo [kuryamana kw’abahuje ibitsina] birimo, ntabwo iyo tugiye gutora umukobwa twinjira cyane mu buzima bwe, icy’ingenzi ni uko aba yujuje ibisabwa kandi agaragara nk’uwahagararira abandi.”

Ku bijyanye no kuba batabasha kwakira abakobwa babyaye, Miss Nimwiza Meghan yavuze ko batabemerera kuko biri mu mabwiriza agenga Irushanwa.

Ati “Uwegukanye Ikamba aba ari Nyampinga, rero bisaba ko aba ari umukobwa. Uwabyariye mu rugo aba ari umubyeyi ntaba akiri umukobwa. Hari byinshi dukorana bitandukanye ariko Ikamba ryo rihatanirwa n’abakobwa.”

Imyiteguro ya Miss Rwanda 2022 irarimbanyije

Irushanwa rya Miss Rwanda byitezwe ko rizatangira kuri uyu wa Gatandatu tariki 29 Mutarama 2022, ubwo hazatangira ijonjora ry’abazahagararira Intara zabo bahereye mu Amajyaruguru.

Bukeye bwaho, tariki 30 Mutarama, Irushanwa rizakomereza mu Ntara y’Iburengerazuba, hanyuma tariki ya 5 Gashyantare ryerekeze mu Ntara y’Amajyepfo.

Ku itariki ya 6 Gashyantare, iri rushanwa rizerekeza mu Ntara y’Iburasirazuba mbere y’uko risubira mu Mujyi wa Kigali ku wa 13 Gashyantare 2022.

Nyuma y’ijonjora, hazakurikiraho ijonjora ry’ibanze rizatanga abajya mu mwiherero mbere y’uko hamenyekana uzegukana Ikamba rya Miss Rwanda 2022.

Nimwiza Meghan yavuze ko abarenga 350 bamaze kwiyandikisha, asaba n’abandi gukomeza kwiyandikisha bifashishije ikoranabuhanga.

Ati “Ubusanzwe n’ahagiye kubera ijonjora ry’ibanze twajyaga tuhandikira abiyandikishije, ariko kuri iyi nshuro ndabashishikariza kwiyandikishiriza ku rubuga rwa Miss Rwanda, kugira ngo hirindwe n’ikwirakwira rya Covid-19.”

Irushanwa rya Miss Rwanda 2022 ririmo impinduka nyinshi

Kugeza ubu Irushanwa rya Miss Rwanda 2022 riragaragaramo impinduka zirimo abaterankunga ndetse n’ibihembo.

Imwe mu mpinduka ni abaterankunga bamaze kwiyongeramo barimo na Primus, ikinyobwa cyengwa n’uruganda rwa Bralirwa.

Iki kinyobwa kikinjira mu Irushanwa, ku mbuga nkoranyambaga byibajijweho n’abatari bake, bibazaga ukuntu Irushanwa ry’abakobwa rigiye kwamamaza ibisindisha.

Nimwiza Meghan yavuze ko kwinjira mu Irushanwa kwa Primus bidasobanuye ko bagiye kwamamaza inzoga gusa, ahubwo ko hari n’ubutumwa buzatangirwa muri Miss Rwanda.

Ati “Ibintu byose buriya biterwa n’uko amakuru atanzwe, ntabwo twe gahunda yacu ari ukwamamaza Primus byonyine ahubwo hari ubutumwa bwinshi tuzafatanya gutambutsa burimo gukangurira abantu kunywa mu rugero, kwirinda gutwara wanyoye no kudaha inzoga abana bari munsi y’imyaka 18.”

Uretse abaterankunga, indi mpinduka igaragara mu ni ukwiyongera kw’ibihembo bizatangwa.

Usibye amafaranga yongerewe nk’ishimwe ku wegukanye Ikamba, hamaze kongerwa abazahembwa kuko hongewemo uwitwaye neza muri siporo ndetse n’uhiga abandi mu mpano.

Iri rushanwa ntabwo rizongera kuba hifashishijwe ikoranabuhanga nk’uko byagenze ubushize.

Miss Nimwiza Meghan umuvugizi wa Miss Rwanda akaba n'ushinzwe itangazamakuru yakomoje ku bifuza kwitabira iri rushanwa baryamana bahuje ibitsina n'ababyaye
Nimwiza Meghan yavuze ko bafite icyizere ko irushanwa ry'uyu mwaka ritazakorwa hifashishijwe ikoranabuhanga nkuko byagenze umwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .