00:00:00 IGIHE NETWORK KN KINYARWANDA EN ENGLISH FR FRANCAIS

Trevor Noah agiye kuva mu kiganiro ‘The Daily Show’ yari amazemo imyaka irindwi

Yanditswe na Mahoro Vainqueur
Kuya 1 Ukwakira 2022 saa 08:06
Yasuwe :

Umunyarwenya Trevor Noah yasezeye ku bakunzi b’ikiganiro ‘The Daily Show’ nyuma y’imyaka irindwi yari amaze ari umuyobozi wacyo avuga ko agiye kwibanda cyane ku mwuga we wo gusetsa nyuma yo gusanga ari kimwe mu bice by’ubuzima bwe yibagiwe

Uyu munyarwenya w’imyaka 28 uherutse kuyobora umugoroba wo gusangira wahuje abanyamakuru n’abayobozi bo muri White House, ibyo gusezera kwe yabigarutseho mu butumwa yatanze ku wa 28 Nzeri 2022 ari mu kiganiro.

Ati “Namaze imyaka ibiri mu nzu yanjye [mu gihe cya Covid-19], ntagera mu muhanda, icyo gihe gukora ibitaramo by’urwenya byarahagaze, igihe nari maze gusohoka, nasanze hari ikindi gice cy’ubuzima bwanjye nshaka gukomeza kwagura. Nkumbuye kwiga izindi ndimi, kujya mu bindi bihugu no gukora ibitaramo.”

Noah yishimiye ibihe yagiriye muri iki kiganiro kimaze imyaka 27 gica kuri Comedy Central na shene za televiziyo zihuriye muri Paramount Media Networks.

Ati "Kuyobora iki kiganiro narabikunze cyane, nahuriyemo n’ibintu byinshi bikomeye gusa ni kimwe mu byishimo byanjye, nakunze uko nageragezaga gushaka uburyo bwo gusetsa abantu, nubwo inkuru z’aba ari mbi cyangwa bari mu minsi mibi.”

“Twarasetse tunarira turi kumwe ariko nyuma y’imyaka irindwi, ndumva igihe kigeze ngo ngende.”

Trevor Noah yasoje ijambo rye ashimira abamureba muri studio bahagurukiraga rimwe bamukomera amashyi, abasezeranya ko atagiye kubasiga burundu.

Ati “Muhumure ntabwo nzimiye burundu niba ngufitiye umwenda, nzakomeza kukwishyura."

Uyu munyarwenya ukunda Afurika cyane yavukiye Johannesburg, muri Afurika y’ Epfo yimukiye muri Leta Zunze Ubumwe za Amerika mu 2011.

Trevor Noah yinjiye muri iki kiganiro cyiganjemo urwenya rwinshi mu 2015 asimbuye Jon Stewart wari umaze igihe kinini akora iki kiganiro.

Ubuyobozi bw’iki kiganiro The Daily Show nabwo bwashimiye uyu munyarwenya mu gihe bamaranye nubwo batahise batangaza igihe azakora ikiganiro cya nyuma ndetse n’umusimbura we.

Trevor mu buryo bwe yakoraga ikiganiro atanga amakuru ajyanye n’ibibazo bya politiki mpuzamahanga, Amerika, imyidagaduro n’ibindi bitandakanye yibasira abantu bamwe na bamwe ariko abikora mu buryo bwo gushimisha abantu.

Ubutumwa bwa Trevor Noah asezera abakunzi ba The Daily Show

Trevor Noah agiye kuva mu kiganiro ‘The Daily Show’ yari amazemo imyaka irindwi
Trevor Noah yakunze kuvuga ku ngingo zitandukanye zirimo n'ibya Donald Trump, Black Lives Matter n'ibindi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .