Muri iyi baruwa yashyizweho umukono na Noteri, IGIHE ifitiye kopi, The Ben yagize ati “Njyewe Mugisha Ben uzwi nka The Ben, nandikiye Urukiko rw’Ibanze rwa Kicukiro ndumenyesha ko ntanze imbabazi ku makosa yankoreye, nkaba nsaba ko Sengabo Jean Bosco yarekurwa.”

Ni ibaruwa bigaragara ko The Ben yanditse ku wa 5 Ugushyingo 2024, ikaba yarabanjirije amagambo uyu muhanzi yari yanditse ku mbuga nkoranyambaga ku wa 6 Ugushyingo 2024 agaragaza ko yababariye Fatakumavuta.

Aya magambo icyakora ntabwo yari yahawe agaciro nk’uko umunyamategeko wa Fatakumavuta yabivuze kuko yavugaga ko bisaba ko uyu muhanzi yandikira Urukiko na rwo rukiga ku mbabazi rukaba rwazishingiraho rumubabarira.

The Ben ahaye imbabazi Fatakumavuta mu gihe Urukiko rw’Ibanze rwa Kicukiro rwo rwamaze gufata icyemezo cyo kumufunga iminsi 30 y’agateganyo mu gihe Ubushinjacyaha bugikomeje iperereza.

Nk’uko byagaragaye muri dosiye irega Fatakumavuta, si The Ben gusa wamureze kuko yarezwe n’abandi barimo Meddy, Bahati na Muyoboke Alex.

The Ben yandikiye Urukiko asabira imbabazi Fatakumavuta asaba ko yarekurwa