The Ben yahishuye byinshi: Igihe ateganya kurushinga, uko yafashijwe na Tom Close n’ibindi

Yanditswe na Uwiduhaye Theos
Kuya 27 Mata 2020 saa 11:55
Yasuwe :
0 0

Mugisha Benjamin [The Ben] ni umwe mu bahanzi bakomeye mu Rwanda; bamaze kubaka izina ku ruhando mpuzamahanga ndetse ukundwa na benshi mu buryo bwihariye, ariko utajya yibagirwa ineza yagiriwe na Tom Close.

Mu kiganiro ‘The Versus’ gica kuri Televiziyo y’u Rwanda gikorwa na Lucky Nzeyimana, yahishuye byinshi ku muziki, ubuzima bwe bwite n’ibindi abantu benshi bibaza kuri uyu musore w’icyamamare, ubusanzwe utuye muri Leta Zunze Ubumwe za Amerika ariko ubu akaba ari mu Rwanda.

The Ben asobanura Tom Close nk’umuntu ukomeye mu buzima bwe ndetse wagize uruhare rukomeye kugira ngo abe hari aho ageze ubu.

Ati “Tom Close dufitanye amateka ateye amatsiko, we nanjye twabaye abavandimwe guhera mu 2007 nkiri mu mashuri yisumbuye we yiga i Butare turanabivuga. Niwe wamfashe akaboko, navuga ko ibyo ngezeho byose ari Imana yamukoresheje ngo mbe ngeze ahangaha. Tom Close avuze ibintu byinshi kuri njye.”

Tom Close nawe wari uri muri iki kiganiro hifashishijwe ikoranabuhanga, yavuze ko yahujwe na The Ben n’umuziki, avuga ko umuntu mumenyana ntacyo muraba cyo mugakomezanya aba ari inshuti magara.

Ati “Twahujwe n’umuziki tuba abavandimwe. Ibyo avuga naba narakoze, navuga ko ari ukumwitura kuko nawe yagize uruhare runini mu kuba naragerageje gukora ibintu byiza bikagera ku rwego rw’uko abantu bamenya kuko yamfashaga mu gutangira ku buryo nanamwingingaga ngo tuvuge ko twafatanyije ariko akabyanga kubera ko yavugaga ko mama we bitamushimisha kuba ari gukora umuziki usanzwe nyamara ari abakirisitu. Kuri njye numva ko yamfashije ikintu kinini.”

“Ubushize ndi mu kiganiro [aha yabwiraga Lucky] wambajije umuhanzi numva nareberera inyungu mvuga Nel Ngabo na The Ben, nabikubwiye bimvuye ku mutima kuko The Ben ni umuhanzi nkunda nk’umuntu udasanzwe w’umunyamuziki, akaba akiri muto, afite byinshi byo kutwereka.”

Yabajijwe ibanga yaba akoresha ngo abe amaze igihe kirenga imyaka 10 ari mu bahanzi bahora mu b’imbere mu Rwanda ndetse agatangira no gucengera hanze y’igihugu, avuga nta banga ryihariye ahubwo ari umugisha w’Imana no kuba akunda ibyo akora.

Yemeza ko atibuka neza igihombo yagize mu muziki ariko akavuga ko byanga bikunze gihari.

Asobanura umuziki nk’ishuri rikomeye ati “Umuziki ni ikintu navuga ko ari ishuri ryigisha umuhanzi uririmo cyangwa undi muntu ku giti cye, uwo muntu cyangwa se umuhanzi ahinduka icyitegererezo. Umuziki ni ikintu kigari, n’ubwo tuvuga ko twandikira abantu ariko natwe hari igihe zigaruka zikadukotaho twe ubwacu.”

Ngo ubu ntakibabazwa n’inkuru mbi zimwandikwaho kuko yamaze kubyakira.

Ati “Kera najyaga mbabazwa nabyo, ariko uko ugenda umara igihe mu gakino ubona ko ntacyo bitwaye. Hari igihe umuntu akubwira inkuru utiyiziho bikakubabaza.”

The Ben yabajijwe igihe ibihe byigeze kumukomerana akaka ideni, avuga ko ari igihe yari ari mu mashuri yisumbuye ubwo yaryakaga umuhanzi uzwi cyane mu ndirimbo zo guhimbaza Imana nka Dominic Ashimwe.

Ati “Nafashe ideni kera nkiri mu mashuri yisumbuye, ryari irya Dominic Ashimwe, sinzi ukuntu namusabye ideni, we yarangurije ariko ntabwo nibuka niba naramwishyuye gusa nibuka ko nyuma twahanye amafaranga. Byahuriyemo hari ibintu twahuriyemo nyuma byarenze ayo mafaranga.”

Abajijwe igihe ateganya kuzarushinga ati “Mu myaka itanu ndemera ko mama wanjye azaba afite umukazana, ashobora kuba afite n’akuzukuru.”

The Ben avuka mu muryango w’abana batandatu akaba umwana wa Gatatu. Yavukiye mu muryango w’abakirisitu cyane ko mama we akunda gusenga cyane.

Uyu muhanzi ngo akunda gusaba umubyeyi kumusengera amusabira igikundiro cy’Imana. Yishimira ko atigeze ababaza umubyeyi we kuko igihe yajyaga mu muziki yumvaga ko agiye kunywa inzoga agakora n’ibindi bitamushimishije ariko akaza kubona ko nta kimwe akora.

The Ben yatangiriye ku ndirimbo yamamaye cyane yitwa ‘Amaso ku maso’. Amaze gukora album ebyiri zirimo ‘Amahirwe ya nyuma ’ ndetse na ‘Ko nahindutse’.

Indirimbo yumva yasubiramo bibaye ngombwa akayikora birushijeho ni ‘Inshuti nyanshuti’. Ubu uyu muhanzi afite studio yitwa Rockhill ikaba na label ifasha abahanzi, ubu ibarizwamo uwitwa Shaffy wamamaye mu ndirimbo zirimo iyitwa ‘Akabanga’.

Reba indirimbo "Sinarinkuzi" The Ben na Tom Close bakoranye

Reba indirimbo "Thank You" The Ben na Tom Close baheruka gukorana

The Ben na Tom Close bari inshuti kuva mu myaka batangiriyeho umuziki
Ubushuti bwabo ntabwo bwigeze buhungabana
The Ben na Tom Close baririmba mu gitaramo cya East African Party mu 2017
Bombi bafitanye amateka akomeye ahera mu minsi ya mbere y'urugendo rwabo rwa muzika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .