Televiziyo y’icyerekezo! Uko Isibo TV yahembuye benshi biganjemo urubyiruko

Yanditswe na Uwiduhaye Theos
Kuya 22 Nyakanga 2020 saa 03:53
Yasuwe :
0 0

Umunyarwanda yarateruye ati “Abajya inama Imana irabasanga”. Ni ijambo rigaragaza ishusho y’uko abashyize hamwe nta kibananira kandi bagera kuri byinshi byiza mu gihe gito.

Ibi byashimangirwa n’uburyo mu minsi ishize Bruce Melodie n’Umujyanama we Kabanda Jean de Dieu baherutse gutangiza Televiziyo bise ‘Isibo Tv’ none ikaba iri mu zigezweho kandi zikunzwe mu Rwanda.

Ni televiziyo ikataje! Mu gihe cy’amezi arindwi imaze itangiye yirahirwa na benshi bakunze kuvuga ko ibashimira aho amaboko yabo atageraga mu kuryoherwa n’ibiganiro bitandukanye byiganjemo ibyibanda ku myidagaduro.

Bitandukanye n’izindi nyinshi, yo yihaye umurongo wo gushimisha urubyiruko binyuze mu biganiro by’imyidagaduro n’ibindi bijyanye n’ibyifuzo byarwo ariko na none n’abakuru ntiyabigirwa kuko hari byinshi byiza ifite nabo bisangamo kandi bishimira.

Ifite abanyamakuru b’intyoza mu kuvuga byagera ku gushimisha ababakurikiye byo bagasya batanzitse. Bafite ubunyamwuga, ubunararibonye n’ubwamamare mu ruhando rw’itangazamakuru mu Rwanda.

Uhereye kuri Phil Peter na M. Irene batangiranye nayo mu kiganiro The Choice gitambuka buri munsi ndetse n’abandi bagiye baza nyuma yabo nta n’umwe woroshye. IGIHE yasuye iyi televiziyo aho ikorera i Gikondo mu karere ka Kicukiro.

Kugeza ubu Isibo TV (I TV) igaragara mu gihugu hose kuko yashyizwe ku rutonde rwa televiziyo nke zo mu Rwanda zigaragara kuri televiziyo zigezweho mu buryo bwa Digital (Digital TV).

Umuyobozi w’iyi televiziyo akaba n’Umujyanama wa Bruce Melodie, Kabanda Jean de Dieu, avuga ko n’ubwo bishimira ibyiza bamaze kugeraho mu gihe gito, bafite intumbero yo kuba televiziyo ya mbere ikunzwe kurusha izindi.

Ati “Tujya gutangiza iyi televiziyo twabikuye ku gitekerezo cy’uko urubyiruko rwahabwaga umwanya muto kuri televiziyo. Ikindi twashakaga gushakisha impano ziba zitaragara, tukazimurika. Twari dufite intego yo gukora mu mwaka umwe cyangwa ibiri tukareba uko bizaba bimeze. Mu gihe gito tumaze twabonye abakiliya batugana. Dufitanye amasezerano na sosiyete. Twamenyekanye birenze uko twabitekerezaga.”

Yakomeje avuga ko bagitangira,abantu batangiye kubasaba ibiganiro birenze ibyo bateganyaga kubera umurongo udasanzwe watumye ikundwa na benshi.

Ati “Twatangiranye ikiganiro cya mbere (The Choice) twumva ko tuzajya tunyuzaho imiziki ibindi bikazaza nyuma ariko dutungurwa n’uko abantu batwakiranye ubwuza bagatangira kudusaba ibindi biganiro, duhita tubitangiza. N’ubu turi gusabwa byinshi kuko dufite abadukurikira benshi.”

“Umusaruro wa mbere twifuzaga ni imyidagaduro mu rubyiruko no kuzamura impano ndetse no kwigisha. Hari abana bari barabuze uko babona amahirwe mu itangazamakuru twe twabahaye amahirwe.”

Buri kiganiro gica ku ISIBO TV gifite umwihariko nk’icyitwa ‘Take Over’ gikorwa na MC Buryohe, Bianca na DJ Diallo cyahawe umwihariko wo guteza imbere abahanzi bakizamuka. Ikiganiro The Choice cya Phil Peter cyo cyibanda ku bantu bazwi. Icyo iyi televiziyo ishimirwa ni uko mu myidagaduro itibanda ku muziki gusa ahubwo ijya no mu zindi mfuruka.

Hari ibindi biganiro abantu batandukanye yaba abakuru n’abato bisangamo nka Chapa Chapa n’ibindi.

Umuyobozi wa ISIBO TV, Kabanda Jean de Dieu

Abanyamakuru bakorera ISIBO TV bakabije inzozi…

Emmalito ukorana ikiganiro Chapa Chapa na Ketty, yavuze ko yakabije inzozi yari afite ati “Ku Isibo TV nahaje nshaka gukomeza gukora itangazamakuru ry’umwuga kuri njye indoto zabaye impamo. Umurongo ikinyamakuru kigenderamo nibyo ndi gukora ndabona bimeze neza.”

Na Ketty avuga ko ibyo yateganyaga kubona ku ISIBO TV yasanze birenze, ati “Ibyo natekerezaga kuri iyi televiziyo nasanze birenze. Ahazaza hayo ni heza. Natangajwe n’uburyo ari televiziyo nziza kandi itera imbere byihuse. Mu minsi iri imbere izaba iri mu zikomeye muri Afurika y’Uburasirazuba.”

MC Phil Peter ni umwe mu batangiranye na ISIBO TV ndetse asiga televiziyo ikomeye aza gukora kuri iyi yari nshya. Yavuze ko gufata iki cyemezo bitigeze bimugora kuko yari ifite umurongo w’imikorere ujyanye n’uwo yifuzaga.

Ati “Bafite icyerekezo kizima kijyanye n’ibyo nifuzaga. Nari maze igihe kinini nkorera ahantu hamwe ariko nari nkeneye kugerageza ibintu bishya no gukorana n’abantu bafite imyumvire mishya.”

Avuga ko ari iby’agaciro kuri we kuba ikiganiro cye aricyo cyamuritswe kuri televiziyo bwa mbere, yemeza ko ariko na none bimuha umukoro wo gukora iki kiganiro mu buryo bunoze bugaragaza ko aricyo mfura kuriyo.

Yishimira umusanzu amaze gutanga mu gihe amaze atangiye gukorera ISIBO TV kuko hari abahanzi benshi yabereye ikiraro mu muziki ndetse hakaba hari ibindi bikorwa byagiye bigira ingaruka nziza ku ruganda rw’imyidagaduro.

Kugeza ubu ISIBO TV ifite ibiganiro icyenda birimo icya AM kiba ku wa Mbere kugeza ku wa Gatanu guhera saa tatu kugeza saa yine n’igice za mu gitondo. Gikorwa na Moses Iradukunda ndetse na Bambe Eza Gisele.

Hari Take Over cyibanda ku myidagaduro ariko cyane cyane impano zikizamuka, gikorwa mu minsi y’imibyiza guhera saa munani n’igice kugeza saa kumi n’igice z’umugoroba. Gikorwa na Uwamwezi Daphne (Bianca), Ntakirutimana Halifa (MC Buryohe) ndetse na Mutabazi Diallo uzwi mu kuvanga imiziki nka Dj Diallo.

Chapa Chapa nacyo kiri mu biganiro bya ISIBO TV bikundwa cyane, gikorwa mu minsi y’ibiharwe buri cyumweru guhera saa moya n’igice kugeza saa tatu z’ijoro. Gikorwa na Murenzi Emmanuel (Emmalito) ndetse na Mohoro Ketia (Ketty). Umuziki uba uvangwa na Shema Christian cyangwa se DJ Cee.

Hari ikiganiro The Choice gikundwa na benshi, iki nacyo kiba buri munsi kugeza ku wa Gatanu kuhera saa kumi n’imwe kugeza saa moya z’ijoro. Ku cyumweru kikagira umwihariko wo kwitwa Sunday Choice aho kiba guhera saa mbili kugeza saa sita z’ijoro. Gikorwa na Nizeyimana Philbert (Phil Peter), Murindahabi Irene (M Irene) ndetse Munezero Yassin ( DJ Waxy).

Hari icya Vendredi Mechant gikorwa na DJ Cee, DJ Diallo ndetse na MC Buryohe. Hari n’ibindi biganiro biba rimwe mu Cyumweru birimo The Time is Now gikorwa na Billy Irakoze, kiba ku wa Kane guhera saa mbili z’ijoro kugeza saa tatu z’ijoro.

Icya Ikirezi Fashion Style cyo kiba ku wa Gatandatu guhera saa kumi n’ebyiri kugeza saa tatu z’ijoro. Gikorwa na Uwimbabazi Monique. Bari kwitegura gutangiza ikindi kiganiro gishya ‘The Miss Career Show’ kigamije guteza imbere abakobwa bafite imishinga ifatika. Kizajya gikorwa na Sandrine Munezero.

Billy Jakes ukora ikiganiro cy'iyobokamana
DJ Cee, MC Buryohe na DJ Diallo bakorana muri Vendredi Mechant
DJ Diallo uri mu ba-DJ bakomeye mu Rwanda akorera kuri ISIBO TV mu kiganiro cya Take Over
DJ Waxy ni umu-DJ wamenyekanishijwe na ISIBO TV
DJ Waxy niwe uvanga imiziki muri The Choice
M Irene agaragara muri The Choice
Emmalito na Ketty bakorana muri Chapa Chapa Show
MC Buryohe, Bianca na DJ Diallo bakora ikiganiro Take Over
Moses na Eza bakora ikiganiro cya AM
MC Phil Peter ni umwe mu banyamakuru batangiranye na ISIBO TV
Uko biba byifashe muri studio za ISIBO TV
ISIBO TV ifite umurongo wo kuzamura impano
Uku niko biba byifashe mu kiganiro cya Phil Peter

Amafoto: Muhizi Serge

Video: Mucyo Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .