Mu banyamuziki bamurikiye abakunzi babo indirimbo nshya barimo, Marina, Butera Knowless, Memo, Jazi n’abandi.

Vanilla – Marina

Umuhanzikazi Uwase Ingabire Deborah [Marina] nyuma y’amezi 10 amurikiye abakunze be indirimbo yise ‘Shawe’ yagarukanye iyo yise ‘Vanilla’.

Iyi ndirimbo igaragaramo Seyn Muzik na Yuhi Mic yatunganyijwe na Ayoo Rash isozwa na Bob Pro mu buryo bw’amajwi, amashusho yayo yakozwe na John Elarts.

‘Agüita de Coco’- Alex Cuba na Butera Knowless

Alex Cuba ukomoka muri Cuba akagira ubwenegihugu bwa Canada yegereye umuhanzikazi Butera Knowless bakorana indirimbo bise ‘Agüita de Coco’.

Alex Cuba ni umwe mu bahanzi bakomeye muri Cuba yegukanye ibihembo bya Latin Grammy inshuro enye, yanahataniye ibihembo bya Grammy Awards inshuro ebyiri, album yise Mendó yegukanye igihembo cya Best Latin Pop Album muri Grammy Awards 2022.

‘Fiva’ – Jazi

Jazi umusore ubarizwa muri sosiyete ifasha abahanzi ya The Rayan Music Entertainment, yamurikiye abakunzi ba muzika indirimbo ye ya mbere yise ‘Fiva’.

Iyi ndirimbo mu buryo bw’amajwi yatunganyijwe na Ben Pro/To the Hit amashusho yayo yakozwe na Josh Lenzi afatanyije n’abarimo Capslock ndetse na Parfait Rayan washoye imari mu ikorwa ry’iyi ndirimbo.

‘Dayana’ – Memo

Memo umwe mu bahanzi batanga icyizere cy’ejo hazaza muri muzika nyarwanda yamurikiye abanyamuziki indirimbo yise ‘Dayana’ yatunganyijwe na Davydenko afatanyije na Kevin Klein , amashusho yayo yakozwe na 9 (Nine) muri studio yitwa3D Records (C).

‘Oya’ – Vijay na Afrique

Umuririmbyi w'Umuhinde Vijay Kumar Garg yinjiye ku isoko ry’umuziki w’u Rwanda yinjirana indirimbo yise ‘Oya’ yakoranye na Afrique uri mu bakunzwe muri iki gihe.

Iyi ndirimbo y’uyu muhanzi uvuga ko akunda u Rwanda yatunganyijwe na NizBeats amashusho yayo yakozwe na Kingsley.

‘Nyigisha’ – Isaac Mahoro

Umuramyi Mahoro Isaac ubarizwa mu Itorero ry'Abadvantiste b'Umunsi wa Karindwi, mu myaka 17 amaze kuri muzika yamurikiye abakunzi ba muzika amashusho y'indirimbo yise "Nyigisha".

Iyi ndirimbo yakozwe Saul’s Music mu buryo bw’amajwi mu gihe amashusho yayo yakozwe na Jack.

‘Izuba’ – Jimmy Star

Jimmy Star yamurikiye abanyarwanda indirimbo ya kabiri mu zigize EP (Extended Play) ye ya mbere yise ‘Nkunda Abiwacu’.

Iyi ndirimbo ishingiye ku nkuru mpamo ya Jimmy Star igaruka ku mukobwa yakunze bakiri mu mashuri yisumbuye.

‘Izuba’ yakorewe muri Envision Record yatunganyijwe na Manzi R Didier mu buryo bw’amajwi, amashusho yayo yatunganyijwe na Harris.

‘Urugero rw’Ibishoboka’ – Limu

Umuhanzi nyarwanda Mukotanyi Limu abinyujije mu ndirimbo yahaye icyubahiro abana b'intwari biciwe mu kigo cy'amashuri cya Nyange.

Ubutwari bw’abana b’i Nyange, bukomoka mu mutima ukomeye bagaragaje mu ijoro rya tariki 18 Werurwe 1997, ubwo abacengezi babagabagaho igitero bakabasaba kwitandukanya, Abahutu bakajya ukwabo Abatutsi bakajya ukwabo, babasubiza bagira bati "Twese turi Abanyarwanda".

Iyi ndirimbo yanditswe na Limu n'Igihango Band mu buryo bw'amajwi yakozwe n'aba Producer babiri barimo Lily Pro na Nexus.

‘Champion’ – Javanix na Racine

Umuhanzi Javanix wo mu Karere ka Rusizi yahuje imbaraga na Racine bakorana indirimbo bise ‘Champion’, ikozwe mu njyana ya Amapiano avanze na gakondo.

Iyi ndirimbo yakozwe na Logic Hit mu buryo bw'amajwi, amashusho yayo ntarasohoka.

‘Imirimo’ – Elayono Choir ADEPR Remera

Korali Elayono yo muri ADEPR Remera yamurikiye abakunzi b’indirimbo yo kuramya no guhimbaza Imana indirimbo bise ‘Imirimo’ iherekejwe n’ijambo ryanditse mu Abefeso 2:8.

Iyi ndirimbo yatunganyijwe na N. Josue shimwa mu buryo bw’amajwi , amashusho yayo yakorewe muri Bless World Music Pro.

‘Ni Wowe’ – Nkuru Denk

Isaac Nkurunziza wahisemo gukoresha amazina ya Nkuru Denk yatangiranye urugendo rwa muzika indirimbo yise ‘Ni Wowe’ yakozwe na Producer Skeleton.

Iyi ndirimbo igaruka ku musore wihebeye inkumi ayisezeranya ko bazabana ubuziraherezo.

‘Coming Now’ – Jesse Blin

Jesse Blin yamurikiye abakunzi ba muzika indirimbo ye ya kabiri yise ‘Coming now’ nyuma y’amezi ane akoze iyo yise ‘Ndakunditse’.

Iyi ndirimbo yakorewe muri New Road Studio (REVO Record) yatunganyijwe na Ceedoh isozwa na Daytroon amashusho yayo yakozwe na Kjusstin.