00:00:00 IGIHE NETWORK KN KINYARWANDA EN ENGLISH FR FRANCAIS

Rev. Antoine Rutayisire yasabye abakobwa bari muri Miss Rwanda 2022 kwirinda ‘ababakoresha’ (Amafoto)

Yanditswe na Uwiduhaye Theos
Kuya 12 March 2022 saa 04:16
Yasuwe :

Umushumba w’Itorero Anglican mu Rwanda, Paruwasi ya Remera, Rev. Dr Canon Rutayisire Antoine, yaganirije abakobwa bari mu mwiherero wa Miss Rwanda abagira inama z’uburyo bakwiye kwitwara mu buzima banyuramo.

Iki kiganiro cyari gifite intego yo kwigisha abakobwa ku “Buzima bw’umwana w’umukobwa wubaha Imana”. Aba bakobwa bagaragarijwe ko bakwiriye kwitwara neza bakarenga ubuzima bwo kuba buri wese “ubifuje ababona” kandi bakubaha Imana kuko byose biza iyo umuntu afite imitekerereze yo kuyubaha.

Yabwiye aba bakobwa ko bataremewe kuba Nyampinga w’u Rwanda ariko umwiherero uzabafasha kwitekerezaho.

Ati “Imana ikurema ntiyakuremeye kuba Miss Rwanda kuko n’iyo wahabwa iryo kamba uzarimarana umwaka umwe. Uyu mwiherero uzabafasha kwitekerezaho ku buryo uzava hano ufite intego y’ubuzima irenze kuba Miss Rwanda. Nimutangira kubitekereza muzabibona. Iri kamba ni kamwe mu bintu bizaba mu buzima bwanyu. Irushanwa nirirangira muzasubira mu buzima bwa buri munsi.”

Rev. Rutayisire yabwiye aba bakobwa ko bakwiriye kugira intego mu buzima bwabo kandi ntibabe igikoresho cya buri umwe ubashaka.

Ati “Kuba mwiza ni byiza ariko ubwiza bwawe ntabwo ari wowe ububona wenyine. Burya ubwiza ni nk’itara […] Kuba abantu barabatoranyije ni uko mwari mufite ubwiza n’ubwenge. Ubwiza bwawe hari abantu beza n’ababi babubonye. Ubwiza bwawe bugomba kugira intego ariko ntabwo bugomba kuba igikoresho cya buri wese. Umukobwa wavukiye i Kigali buri wese aba ashaka kumwigondera.”

Yakomeje abwira aba bakobwa ko bakwiriye no kubaha Imana no mu gihe nta muntu ubareba. Yatanze urugero rw’ukuntu yagiye muri Thailand umukobwa akaza ku rugi rw’icyumba yari kuraramo ashaka ko bararana ariko akabyanga kubera kubaha Imana.

Rev. Rutayisire yavuze ko kuganira n’aba bakobwa ari amahirwe yagize kuko yaganiriye n’ahazaza h’igihugu.

Yakomeje ati “Aya ni amahirwe yo kuvugana n’ahazaza. Muri ababyeyi b’ejo, abayobozi b’ejo muri make muri ibyiringiro by’igihugu. Ikindi nababwira ni uguca bugufi.”

Rev. Rutayisire ni umubyeyi wa Isimbi Deborah Abiella wabaye Nyampinga w’iyahoze ari Kaminuza Nkuru y’u Rwanda (NUR) mu 2012, akanitabira Miss Rwanda uwo mwaka. Yavuze ko abakobwa bakwiriye kujya bitabira amarushanwa y’ubwiza ariko bakibuka ko bafite imiryango ibagirira amakenga.

Ati “Abagore bo bagira impungenge kurushaho, kugira umuturishe umwumvishe ko utagiye kuba ugomba kugira ikinyabupfura. Ugomba kumwumvisha ko utazaba ikirara. Niba uri umukobwa ukajya utaha saa Tanu z’ijoro dutangira kugira impungenge. Uko uca imbere ya camera ni ko abantu bakubona kandi abakubona si abantu beza.”

Irushanwa rya Miss Rwanda rizasozwa ku wa 19 Werurwe 2022 mu birori bizabera ku Intare Conference Arena. Kwinjira bizaba ari 10.000 Frw, VIP 200.000 Frw na 300.000 Frw.

Rev. Antoine Rutayisire yaganirije abakobwa bahatanye muri Miss Rwanda
Aba bakobwa bari bafite inyota yo kuganirizwa na Rutayisire ndetse ni bo bamwisabiye abategura irushanwa
Abakobwa bahataniye ikamba rya Miss Rwanda 2022 bari bakurikiye bashyize umutima ku kiganiro
Rev. Antoine Rutayisire yasabye abakobwa bari muri Miss Rwanda 2022 kwirinda ababakoresha mu nyungu zabo
Rev. Antoine Rutayisire yasabye abakobwa bari muri Miss Rwanda 2022 kwirinda ababakoresha mu nyungu zabo
Irushanwa rya Miss Rwanda rizasozwa ku wa 19 mu birori bizabera ku Intare Conference Arena
Pasiteri Antoine Rutayisire yabwiye aba bakobwa kwihesha agaciro
Rev Antoine Rutayisire yaganirije ubwo yaganiraga n'abakobwa 19 bahataniye ikamba rya Nyampinga w'u Rwanda
Umuhoza Emma Pascaline ufite nimero 53 muri iri rushanwa yari akurikiye iki kiganiro
Rev Rutayisire aganira n'abakobwa 19 bari mu mwiherero batangiye ku wa 28 Gashyantare 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .