Phionah Mbabazi yakoze indirimbo iturutse ku mujinya yatewe no gutukwa azizwa kuba Umunyarwanda

Yanditswe na Nsengiyumva Emmy
Kuya 16 Ukwakira 2019 saa 08:04
Yasuwe :
0 0

Phiona Mbabazi yamamaye cyane mu 2014 ubwo yari avuye guserukira u Rwanda mu irushanwa ry’umuziki rya Tusker Project Fame, nyuma yagiye akora indirimbo zakunzwe zirimo ‘Winyibutsa’, ‘Twala’ n’izindi

Kuri ubu uyu mukobwa umaze kugaragaza ubuhanga buhambaye mu kuririmba mu buryo bwa live, yashyize hanze inshya yise “Nzi uwo ndiwe”.

Ni indirimbo yakomoye ku nzika yatewe n’umwana wamututse amuhora ko ari Umunyarwandakazi.

Ngo ibi byabaye ubwo uyu muhanzikazi yabaga muri Uganda aho yavukiye akanakurira mu myaka ye y’ubuto.

Ati “Njyewe navukiye mu kindi gihugu, ahantu twabaga kwitwa Umunyarwanda byabaga ari igisebo gikomeye. Ndibuka niga ku ishuri hari umunyeshuri wantutse ngo ‘wa mushumba we’ ampora aho nkomoka. “

Mbabazi utibuka neza umwaka byabereyemo ahamya ko ari nko mu 1997, icyo gihe umwana biganaga muri Uganda akaba yaramwise umushumba, igitutsi bakundaga gutuka Abanyarwanda bari batuye muri iki gihugu.

Uyu muhanzikazi yavuze ko yakoze iyi ndirimbo nk’Umunyarwanda utewe ishema no kubyitwa, ashimira Perezida Paul Kagame wasubije igihugu agaciro bigahesha ishema abagituye n’abagikomokamo.

Umujinya yatewe n’umwana biganaga wamututse bitewe n’uko ari Umunyarwanda ndetse n’uko ubu asigaye atewe ishema no kuba yarasubijwe agaciro niyo nkomoko y’indirimbo nshya yashyize hanze yise “Nzi uwo ndiwe”.

Yakozwe na Knox Beat muri Monster Record, amashusho yayo yavuze ko yatangiye gukorwaho akazasohoka mu minsi iri imbere.

Mbabazi yari amaze imyaka hafi ibiri adashyira hanze indirimbo, mu kiganiro yagiranye na IGIHE yadutangarije ko yari yihugiyeho, ariko ibyo yakoraga nabyo bifite aho bihurira n’akazi ke ka muzika.

Yahishuye ko ubu amaze kubaka itsinda ry’abacuranzi (Band) bakorana ku buryo ubu ari umwe mu bahanzi bake bari mu Rwanda babafite.

UMVA INDIRIMBO "NZI UWO NDIWE" YA PHIONAH MBABAZI

REBA IKIGANIRO TWAGIRANYE NA PHIONAH MBABAZI

Phionah Mbabazi wari umaze imyaka hafi ibiri adakora indirimbo yashyize hanze inshya yise "Nzi uwo ndiwe"

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza