Patient Bizimana yasohoye indirimbo yanditswe hagendewe ku buhamya bwa Munyaneza warokotse Jenoside

Yanditswe na Nsengiyumva Emmy
Kuya 23 Nzeri 2020 saa 08:23
Yasuwe :
0 0

Umuramyi Patient Bizimana yasohoye indirimbo yise “Shira impumu” yanditswe hagendewe ku buhamya bw’ubuzima bwa Tom Munyaneza bayikoranye, umugabo warokotse Jenoside yakorewe Abatutsi akiri muto akisanga ari impfubyi, Imana ikamurera ikamukuza ubu akaba ari uwo kuyishimira.

Ni indirimbo yumvikanisha imbaraga zikomeye z’umwami Yesu, uwo abantu bakwiye kwiringira kabone nubwo baba babuze andi mahitamo.

Mu gitero cya mbere cy’iyi ndirimbo, bagira bati “Birashoboka pe, ko umuntu abaho ku Isi akarwana intambara z’ubuzima, bikamuyobera, akabura uko agira, ariko Yesu we nta kimunanira.”

Patient Bizimana mu kiganiro na IGIHE yavuze ko ubwo bandikaga iyi ndirimbo bagendeye ku buhamya bwa Munyaneza.

Ati ”Munyaneza ni umugabo warokotse Jenoside yakorewe Abatutsi mu 1994, yisanga ari impfubyi isigaye yonyine. Ku mugambi w’Imana yarakuze kandi ubu ni umwe mu bo guhamya ko nta cyananira Imana.”

Uyu muramyi yakomeje avuga ko nubwo waba uri kuri zeru, Imana yonyine ishobora kuhagukura ikakwicaranya n’abakomeye, ikaguhindurira amateka. Bityo ahamya ko nubwo yanditswe hagendewe ku buhamya bwa Munyaneza ariko ari iy’abantu bose.

Ati”Nubwo yanditswe hagendewe ku nkuru ya Munyaneza, buri wese ni indirimbo yakwiyumvamo kuko twese ni ubuzima tunyuramo. Usanga wihebye, wumva nta byiringiro usigaranye, nyamara ukirengagiza ko iyo Imana itaravuga ko birangiye nta wundi ukwiye kubivuga.”

Shira impumu, mu buryo bw’amajwi yakozwe na Knoxbeat mu gihe amashusho yayo yo yafashwe akanatunganywa na Fayzo.

Iyi ndirimbo igiye hanze ikurikira iyo Patient Bizimana yise “Ikimenyetso” yaherukaga gusohora mu minsi ishize.

Patient Bizimana, umuhanga mu muziki akagira abakunzi batari bake, ni umwe mu bagezweho mu Rwanda by’umwihariko mu muziki wo kuramya no guhimbaza Imana.

Yamenyekanye cyane kubera ibitaramo ajya ategura byitwa Easter Celebration akunze kwifatanyamo n’abanyarwanda mu kwizihiza umunsi mukuru wa Pasika.

Patient Bizimana na Munyaneza Tom bakoranye indirimbo bise "Shira impumu"

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .