Nyuma yo kuva muri Rockhill ya The Ben, Shaffy yashyize hanze indirimbo nshya

Yanditswe na Uwiduhaye Theos
Kuya 27 Nzeri 2020 saa 05:30
Yasuwe :
0 0

Umuhanzi Kalisa Uzabumwana Sharif umaze kwamamara nka Shaffy, nyuma yo kuva muri Rockhill ya The Ben, yashyize hanze indirimbo ye nshya yise ‘Worth It’.

Indirimbo nshya y’uyu muhanzi yakozwe mu buryo bw’amajwi na Lick Lick, naho amashusho yayo atunganywa na One Shot.

Ivuga ku musore wihebeye umukobwa, kandi udahwema kubimwereka mu byo akora byose. Hari nk’aho avuga ati “Iyo turi kumwe amasaha aba iminota”.

Agakomeza avuga ko yifata nk’aho ariwe wenyine ukunda uyu mukobwa, agereranya n’igitangaza mu buzima bwe, ati ‘Nagutekereje ntarakumenya, mbona uzansaza!’

Mu bitekerezo byatanzwe kuri iyi ndirimbo ku rubuga rwa Youtube, benshi bagaragaje ko ibyo bari biteze kuri uyu musore aribyo yakoze muri iyi ndirimbo ye nshya kuko ‘atajya abatenguha’.

Kuva mu 2019, umuhanzi Shaffy ukorera umuziki we muri Leta Zunze Ubumwe za Amerika ari naho atuye, yasinye amasezerano yo gukorera muri Rockhill, sosiyete yashinzwe na The Ben igamije gufasha abahanzi bakizamuka.

Ku wa 22 Nzeri 2020 nibwo amakuru yageze hanze ko uyu muhanzi yamaze gusesa amasezerano. Mu gihe kirenga umwaka amaze asinye muri Rockhill, Shaffy wamenyekanye mu ndirimbo ‘Akabanga’, yakoze indi imwe gusa yise ’Sukuma’; zose zakunzwe cyane.

Asezera yahishuye ko ubuyobozi bwa Rockhill atari bwo bwamubuzaga gusohora ibihangano bishya, ahubwo ibibazo byari hagati yabo aribyo byadindije umuvuduko we.
Abinyujije ku rukuta rwe rwa Instagram, Shaffy yagize ati "Ndashaka kubamenyesha ko nasezeye muri Rockhill. Ni icyemezo nafashe kugira ngo ndusheho guteza imbere impano yanjye, kuri ubu ndi kwikorana. Ibi ntacyo biri bwice ku mubano wanjye na The Ben. Aracyari umuvandimwe kandi ni umunyabigwi ukiriho."

Mu kiganiro na IGIHE, Shaffy yahishuye ko nyuma yo kwinjira muri Rockhill yagiye agira ibintu atumvikanaho n’ubuyobozi, bikadindiza ibikorwa bye. Yavuze ko nubwo ibi bibazo byakemutse, yaje gufata umwanzuro wo gutangira kwikorana kuko yasanze aribyo byamufasha.

Ibi bibazo Shaffy yirinze kubyinjiramo, gusa ahamya ko habayeho kutumvikana ku murongo ngenderwaho w’ibikorwa bye, ariko ko nta kibazo agiye afitanye na The Ben.

Nyuma yo kuva muri Rockhill ya The Ben, Shaffy yashyize hanze indirimbo nshya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .