Ntawe uzataha imbokoboko! Ibirambuye ku bihembo by’abakobwa bazatsindira amakamba muri Miss Rwanda ya 2021

Yanditswe na Uwiduhaye Theos
Kuya 11 Ukuboza 2020 saa 04:45
Yasuwe :
0 0

Urugamba ruratangiye! Abakobwa batandukanye mu gihugu bagiye gutangira urugendo ruzasiga hamenyekanye, ugiye kwambikwa ikamba rya Nyampinga w’u Rwanda mu 2021, uzaba asimbuye Nishimwe Naomie.

Guhera kuri uyu wa Gatandatu saa sita z’ijoro abakobwa baratangira kwiyandikisha ku buryo ab’inkwakuzi ejo bazarara bari ku rubuga rwa Miss Rwanda.

Tariki 09 Mutarama 2021 mu Karere ka Rubavu ruzaba rwambikanye hatoranywa abazahagararira Intara y’Uburengerazuba bw’u Rwanda, tariki 16 Mutarama 2021, igikorwa gikomereze mu Ntara y’Amajyaruguru mu Karere ka Musanze n’aho tariki 23 Mutarama 2021 berekeze mu Ntara y’Amajyepfo mu Karere ka Huye.

Tariki 30 Mutarama 2021 ijonjora rizabera mu Ntara y’Iburasirazuba mu Karere ka Kayonza naho tariki 06 Gashyantare 2021 hatorwe abo mu Mujyi wa Kigali.

Tariki 20 Gashyantare 2021 nibwo hazatorwa abakobwa 20 bazajya mu mwiherero uzabera i Nyamata kuva tariki 07 Werurwe kugera tariki 19 Werurwe 2021.

Tariki 20 Werurwe 2021 nibwo hazaba umuhango wo kwambika ikamba Nyampinga w’u Rwanda wa 2021 n’ibisonga bye. Ni ibirori bizabera ku Intare Conference Arena.

Ibyagenderwagaho birimo uburebure ubu muri uyu mwaka byakuweho ndetse buri mukobwa yahawe ikaze muri iri rushanwa rikunze kuvugisha benshi mu gihugu hose.

Umukobwa uzahabwa ikamba rya Miss Rwanda 2021, azasinyishwa amasezerano yo gukorera Miss Rwanda Organization nk’umukozi mu gihe cy’umwaka.
Bitandukanye n’indi myaka abakobwa bose bazabasha kwambikwa ikamba ndetse n’abandi bazagera mu cyiciro cya nyuma hari ibyo bagenewe ku buryo nta gutaha imbokoboko kuri bo.

Miss Rwanda azajya aba afite umushinga wamuteguriwe!

Umuyobozi Mukuru wa Miss Rwanda Organization, Ishimwe Dieudonne, wamenyekanye nka Prince Kid yabwiye IGIHE ko uyu mwaka hazaba hari umushinga wateguriwe umukobwa uzatwara ikamba.

Ati “Urumva akenshi umukobwa yazaga nta mushinga afite ubu noneho Miss Rwanda azajya atorwa asange hari umushinga, ufite ingengo y’imari, warizwe neza n’ibindi byose byatewe inkunga na Africa Improved Food. Ubu uyu mwaka Miss Rwanda afatanyije na bagenzi be bazaremera amatungo magufi abakorerabushake b’ubuzima.”

Imiterere y’ibihembo bizatangwa

-  Uzegukana ikamba rya Miss Rwanda 2021

• Imodoka nshya ya Hyundai Creta 2021 izatangwa na Hyundai Rwanda

• Azajya ahembwa ibihumbi 800 Frw ku kwezi azatangwa na Miss Rwanda Organization. Ni ukuvuga ko mu mwaka azamarana ikamba azahabwa 9.600.000 Frw

• Bourse yo kwiga muri Kaminuza ya Kigali

• Umushinga we uzaterwa inkunga na Africa Improved Food

• Lisansi umwaka wose izatangwa na Merez Petroleum

• Internet y’umwaka wose azahabwa TruConnect Rwanda

• Gutunganywa umusatsi mu gihe cy’umwaka bizakorwa na Keza Salon

• Yemerewe kuba mu mpera z’icyumweru we n’umuryango batemberera muri Golden Tulip La Palisse i Nyamata mu gihe cy’umwaka wose

• Yemere kurya mu gihe cy’umwaka wose muri Cafe Camellia

• Azahabwa telefoni igezweho azahabwa na MTN Rwanda

Hyundai Cretta ya 2021 ni uku iteye

-  Igisonga cya mbere

• Azahembwa 1.800.000 Frw azatangwa na Bella Flowers
• Bourse na Kaminuza ya Kigali
• Yemererwe kuba mu minsi y’impera z’icyumweru yajya asohokera muri Golden Tulip La Palisse i Nyamata mu gihe cy’amezi atandatu

-  Igisonga cya kabiri

• Azahembwa 1.800.000 Frw azatangwa na Volcano Express
• Ahabwe Bourse na Kaminuza ya Kigali
• Yemererwe kuba mu minsi y’impera z’icyumweru yajya asohokera muri Golden Tulip La Palisse i Nyamata mu gihe cy’amezi atatu

-  Umushinga urimo agashya

• Azajya ahabwa 500.000 Frw buri kwezi bingana na 6.000.000 Frw mu gihe cy’umwaka. Azatangwa na Banki ya Kigali
• Umushinga uzakurikiranwa anahabwe n’ubufasha mu by’imari na Banki ya Kigali
• Bourse yo kwiga muri Kaminuza ya Kigali

-  Nyampinga w’umurage (Miss Heritage)

• Azahembwa 1.800.000 Frw azatangwa na IGIHE Ltd
• Bourse ya Kaminuza ya Kigali
• Azanafashwa na IGIHE mu bukangurambaga bwo kumenyekanisha umuco nyarwanda n’indangagaciro zawo

-  Nyampinga wagize igikundiro kurusha abandi (Miss Popularity)

• Azahabwa 1.800.000 Frw azatangwa na MTN Rwanda
• Telefoni ya iPhone 10 Plus izatangwa na MTN Rwanda
• Internet y’umwaka wose izatangwa na MTN Rwanda
• Azajya ahamagara ku buntu nabyo bizatangwa na MTN Rwanda
• Bourse yo kwiga muri Kaminuza ya Kigali

-  Miss Congeniality (uwabanye neza na bagenzi be)

• Azahembwa 1.800.000 Frw azatangwa na Peters Bakers
• Bourse ya Kaminuza ya Kigali

-  Miss Photogenic (uberwa n’amafoto)

• Azahabwa 1.800.000 Frw [umuterankunga ntaramenyekana]
• Bourse yo kwiga muri Kaminuza ya Kigali

-  Talent Winner (uwagaragaje impano yihariye)

• Azahabwa 1.800.000 Frw azatangwa na HDI Rwanda
• Bourse yo kwiga muri kaminuza ya Kigali

Abakobwa 20 bazagera mu cyiciro cya nyuma bazafashwa gukomeza amashuri y’icyiciro buri wese yari agiye kujyamo. Ni ukuvuga ko uwarangije amashuri yisumbuye azarihirwa kaminuza mu gihe uwasoje kaminuza afashwa kwiga mu cyiciro cya gatatu n’abandi bigende gutyo.

Miss Mutesi Jolly niwe uhagarariye Akanama Nkemurampaka muri iri rushanwa
Wibabara Gisele ukora muri serivisi z'iyamamazabikorwa muri MTN Rwanda ubwo yatangazaga ibihembo bazatanga muri iri rushanwa
Abanyamakuru benshi bari bitabiriye iki kiganiro cyatangarijwemo imiterere y'iri rushanwa
Miss Nimwiza Meghan niwe muvugizi wa Miss Rwanda
Aretha Mutumwinka wari uhagarariye Africa Improved Foods

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .