00:00:00 IGIHE NETWORK KN KINYARWANDA EN ENGLISH FR FRANCAIS

Umuzi w’indwara y’agahinda gakabije yibasiye ibyamamare, igasya itanzitse mu Rwanda

Yanditswe na Mahoro Vainqueur
Kuya 20 Mutarama 2023 saa 09:42
Yasuwe :

Ubushakashatsi bwakozwe n’urubuga rwa Billboard bwagaragaje ko abahanzi benshi bahura n’ibibazo by’ubuzima bwo mu mutwe n’agahinda gakabije “Depression” ku kigero cya 73%.

Nubwo ubushakashatsi bwa Billboard bugaragaza ko iki kibazo cyugarije ibyamamare ku Isi yose, no mu Rwanda hari amaze kugaragaza ko iki kibazo gihari.

Bamwe mu batanze ubuhamya kuri iki kibazo bavuze ko giterwa nuko baba bashaka kwigaragaza nk’ababayeho neza nyamara mu by’ukuri bitandukanye n’ubuzima bwabo bwa buri munsi.

Iyo uganiriye na bamwe mu bakurikira ibikorwa bya benshi mu byamamare bakubwira ko bafata icyamamare nk’umuntu ubayeho neza, uba mu nzu zihenze cyangwa yirirwa mu modoka zihenze.

Ibi birashoboka cyane kuko ntawe uba ushaka kwiyerekana ko abayeho nabi cyangwa ngo yerekane ko atuye ahantu hatameze neza bitewe n’ishusho rubanda bamufiteho.

Hari umunyamuziki umwe twaganiriye avuga ko agiye kuba mu nzu ihenze kugira ngo ajye abona aho yakirira abamugana dore ko aganwa na benshi mu byamamare , abanyamakuru n’abakunda ibikorwa bye ariko mu by’ukuri akavuga ko ikibazo afite ari ukubona ubwishyu bw’iyo nzu kuko nta kandi kazi afite.

Umuziki urahenda ariko inyungu ziwuvamo zibona umugabo zigasiba undi cyane cyane mu bihugu bikiri mu nzira y’amajyambere.

Umuhanzi nka Victor Rukotana avuga kuri iki kibazo, ubwo yaganiraga na shene ya YouTube ya Yago Tv show, yagize ati “Buriya umuziki ni ubucuruzi bikaba n’impano mu buzima busanzwe. Twese ntabwo tugira umurongo ugororotse utuma ahozaho, njye rero ndi umuntu wahuye n’umurongo uvunaguye gusa ubamo n’amasomo menshi.”

“Hari igihe kigera ukareba ukuntu abantu baba bagutekereza cyangwa bagufata ukareba aho uri ubu n’ubuzima urimo, ukumva nturi kubishyikira cyane”

Muri iki kiganiro Victor Rukotana yakomeje avuga ko abizi neza ko abahanzi bari mu bafite indwara y’agahinda gakabije bitewe no gushaka kubaho ubuzima butandukanye n’ubushobozi bwabo.

Ati“Hari abagorwa no kwakira ubu buzima babayemo, niba ukunze umuhanzi buriya nubona abuze atakigaragara ujye ushaka uko umuvugisha kuko aba afite ikibazo gikomeye.”

Rukotana yavuze ko ikindi kintu gitera aka gahinda ari ukubona warigeze kugira indirimbo ikunzwe ariko muri icyo gihe iyo ukoze yose idafata, nyamara abo wabonaga ari bato mu muziki cyangwa baje uri icyamamare bo bakomeje guhirwa.

Ati “Mu njye musengera abahanzi, hari igihe ubona abandi bari mu bakunzwe ariko wowe icyo kintu ugiheruka cyera cyangwa se utanazi n’uko bisa kandi ukora. Ukabona abantu mwakuranye cyangwa mwakoranye bari imbere ariko wowe utanabashaka kubahamagara ngo bakwitabe, kandi ubwo ngo uri icyamamare da!”

Umuhanzi Victor Rukotana avuga ko benshi mu bahanzi bagorwa no kwakira ubuzima bw'ukuri babayemo nyamara hanze bafatwa nk'abagize aho bagera

Umuhanzi Kabera Arnold wamamaye nka Sintex nyuma yo kwamamara mu ndirimbo nka ‘Twifunze’ yaje kwemera ko yagize iki kibazo. Mu 2022 ubwo aheruka kuganira na Isibo TV yemeye ko yigeze guhura n’ikibazo cyo kwiheba n’agahinda gakabije.

Icyo gihe yagize ati "Mbere na mbere nabanje kumva ko ibyanshimishaga bitakinshimisha , nkumva nta kintu na kimwe gifite agaciro , nkumva nta kindi kintu nshaka gukora."

Yakomeje agira ati "Uko ukomeza gushaka kuba wenyine niko ukomeza kubabara rimwe na rimwe ukumva ukuntu ubayeho biri kukubangamira, ukumva urashaka kunywa inzoga kugira ngo uryame, ukaba waryama ukabura ibitotsi kandi nta mpamvu, kugera aho utekereza umutwe ukakurya"

Uyu muhanzi avuga ko ibi ahanini byatewe n’inshuti yari afite yizeraga ndetse n’abamufashaga bamutengushye ndetse n’akazi ke k’umuziki kahungabinyijwe na COVID19 , hakiyongeraho gutandukana n’umukunzi we.

Sintex agira inama abahura n’ikibazo nk’iki kubiganiriza abantu wizeye bakagufasha no gushaka ibintu bitandukanye bahugiraho no gushaka inshuti nzima.

Umuhanzikazi Liliane Kabaganza kuri ubu uba mu gihugu cya Kenya, avuga ko yagize igikundiro gikomeye nyamara muri icyo gihe yabaga ari guca mu bihe bikomeye.

Ubwo aheruka kuganira na shene ya Youtube ya Chita Magic yahishuye ko yigeze kuririmbira abantu bagafashwa bakanezerwa cyane nyamara we ari mu bukene butamworoheye.

Yagize ati “ Ndabyibuka nigeze kujya kuririmba hariya Shining New Lights ahitwa kwa Murenzi, ni ibintu bitazamva mu mutwe. Uwo munsi nararirimbye ababyeyi baririra ku birenge byanjye hahandi amarira bayuzuza ibirenge sinjya. Ukobana umuntu afashe imisatsi ye agahanaguza ibirenge byanjye, icyo gihe bamfashe nenda kwitura hasi, mu by’ukuri abantu bari bankunze ariko ndiguca mu buzima bugoye bw’ubukene n’inzara gusa. I cyo navuga ni uko Imana ariyo ihisha umuntu mu mababa yayo abantu ntibamenye akaga ari guhura nako.”

Uyu muhanzikazi avuga ko ubu buhamya yabunyujije mu ndirimbo yise ‘ Yesu Ndakwihaye”. Nubwo yari icyamamare, icyo gihe umugabo we yari ari kwiga muri Kaminuza i Butare, we nta kazi afite uretse kuririmba gusa no gukora umurimo w’Imana.

Iyi ndirimbo iyo ayiririmba ageraho amarira akamuzenga mu maso kubera amagambo ayigize ahura n’ubuzima yari ari kunyuramo muri icyo gihe.

Liliane Kabaganganza mu butuma agenera abari guca mu bihe bikomeye avuga ko hari impamvu Imana yemera ko ibi byose biba ku buzima bwa muntu.

Hari abashakira ubuhungiro mu biyobyabwenge

Hari abahura n’iki kibazo cy’ihungabana rikabije bakishora mu biyobyabwenge bagira ngo biyibagize ibibazo bafite cyangwa se babone uko basinzira.

Tristan Hunt ukurikirana umuziki wa EDM mu kiganiro yagiranye na BBC Radio 1, yavuze ko benshi mu bahanzi bagorwa no kwakira ubuzima barimo n’ubwo bagaragaza ku mbuga nkoranyambaga cyangwa uko abafana babo babafata.

Yatanze urugero kuri Avicii, avuga ko yagowe no kwakira igikundiro yari afite muri rubanda bigatuma akoresha ibiyobyabwenge kugira ngo abashe kubyakira.

Ibi byaje kurangira uyu muhanzi yiyahuriye mu mucyumba cya hotel ubwo yari mu biruhuko muri Oman mu 2018.

Biragoye ko wabona umuhanzi ukwemerera ko yahuye n’ikibazo cy’agahinda gakabije ariko ikigo cyo mu bwongereza HMUK (Help Musicians UK) mu 2017 cyatangaje ko 80% by’abahanzi, abanditsi b’indirimbo, aba Producers n’abandi bahura n’agahinda gakabije.

Sintex avuga ko yamaze igihe kinini adakora umuziki kubera guhura n'ikibazo cyo kwiheba n'agahinda gakabije
Liliane Kabaganza avuga ko yigeze kugira igikundiro gikomeye, agashimisha abantu nyamara we ari guca mu buzima bumukomereye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .