Niyo Bosco yashimiye Adrien Misigaro wamufashije gukora indirimbo “Ibanga”

Yanditswe na Nsengiyumva Emmy
Kuya 25 Gashyantare 2020 saa 07:52
Yasuwe :
0 0

Niyo Bosco wasohoye indirimbo nshya yise “Ibanga” yashimiye bikomeye Misigaro Adrien wamufashije mu ikorwa ry’iyi ndirimbo.

Uyu muhanzi ukomeje kwigarurira imitima ya benshi mu kiganiro na IGIHE yagize ati” Ndashimira Adrien Misigaro, ku bufasha yampaye mu ikorwa ry’iyi ndirimbo yaramfashije ndamushimira cyane.”

Uyu muhanzi ntabwo nyigeze atangaza ubwoko bw’impano Misigaro yamuhaye.

Niyo Bosco yongeye gusaba Abanyarwanda kumukundira impano afite mu muziki aho kumugirira impuhwe kubera ikibazo afite cyo kuba afite ubumuga bwo kutabona.

Ati” Ndabasaba ko bakumva ibihangano byanjye bagakunda impano yanjye ntibankundire ibindi cyangwa ngo bumve ko bankunze kubera impuhwe z’ikibazo mfite.”

Adrien Misigaro washimiwe cyane na Niyo Bosco ni umuhanzi w’indirimbo zo kuramya no guhimbaza Imana utuye muri Leta Zunze Ubumwe za Amerika.

Indirimbo “Ibanga” ya Niyo Bosco ikubiyemo ubutumwa bukangurira abantu kugira ibanga, agaragazamo ingaruka zikunze kuba ku bantu batarigira.

Mu nyikirizo y’iyi ndirimbo uyu muhanzi agira ati”Ibanga ni igihamya cyemeza ko uri umwizerwa, kugira ibanga nibyo bishimangira ubupfura bwawe. Uko waba uri kose utagira ibanga amagambo uvugwa niyo menshi kurusha ayo avuga! Jya uvuga uziga […].”

Niyokwizerwa Bosco wamenyekanye nka Niyo Bosco ni umusore w’imyaka 20 y’amavuko ukora umuziki ariko afite ubumuga bwo kutabona.

Iyi ndirimbo ye nshya mu buryo w’amajwi yakorewe muri Uno Record ikorwa na Producer witwa Santana mu gihe amashusho yayo yafashwe akanatunganywa na Bagenzi Bernard uri mu bagezweho muri iyi minsi.

Ikiganiro na Niyo Bosco washimiye bikomeye Adrien Misigaro wamufashije mu ndirimbo "Ibanga"

Indirimbo "Ibanga" Niyo Bosco aherutse gushyira hanze

Niyo Bosco umuhanzi ufite ubumuga bwo kutabona ariko w'umuhanga ugezweho muri iyi minsi
Usibye gufasha Niyo Bosco, Adrien Misigaro asanzwe afasha urundi rubyiruko abinyujije mu muryango yashinze yise Melody of New Hope

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza