Mwafashe abahanzi bugwate! KNC yatsembeye Sosiyete y’Abahanzi ku byo kwishyura ibihangano

Yanditswe na Nsengiyumva Emmy
Kuya 20 Ukwakira 2020 saa 09:09
Yasuwe :
0 0

Muri iyi minsi impaka ni zose hagati y’abahanzi n’abafite ibitangazamakuru ku ngingo ijyanye no kwishyura ibihangano by’abahanzi.

Sosiyete Nyarwanda y’Abahanzi (RSAU) ivuga ko ibitangazamakuru bikwiye kwishyura umuziki bicuranga kuko ari umwe mu bituma bikorera amafaranga menshi.

Iyi ngingo yaganiriweho mu kiganiro Amahumbezi gitambuka kuri Radio Rwanda aho
Sosiyete y’Abahanzi Nyarwanda yari ihagarariwe na Charles Kwitonda mu gihe Ihuriro ry’Abayobozi b’Ibitangazamakuru ryaserukiwe na Kakoza Nkuliza Charles uzwi nka KNC.

Iki kiganiro cyari cyatumiwemo Platini nk’umuhanzi na Alain Mukuralinda nk’umunyamategeko akaba n’umuhanzi ufite n’inzu ifasha abanda bahanzi.

RSAU yiteguye kujyana mu mategeko ibitangazamakuru bidashaka kwishyura abahanzi

Sosiyete y’Abahanzi Nyarwanda ifite abakora umuziki barenga 400 bafitanye amasezerano, akaba aribo baharanira inyungu zabo.

Uru rwego rwagaragaje ko ba nyiri ibitangazamakuru bakomeje guterera agati mu ryinyo bakanga kwishyura ibihangano bakoresha. Nubwo bimeze gutyo ariko hari ibigo bitanu bamaze kumvikana ndetse na kimwe cyamaze kubahiriza ibisabwa.

Kwitonda yibukije ubuyobozi bw’ibitangazamakuru ko biteguye kuyoboka iy’amategeko mu gihe ubwumvikane bwaba bukomeje kunanirana.

Yavuze ko kwishyura ibihangano by’abahanzi bikoreshwa n’ibitangazamakuru atari amahitamo ahubwo ari ukubahiriza ibisabwa n’amategeko.

Alain Muku yavuze ko itegeko risobanutse

Alain Muku yavuze ko itegeko risobanutse kuko rigena ko umuhanzi ariwe ufite uburenganzira ku gihangano cye, bikamuha n’ububasha bwo kugena uburyo bwo kukibyaza umusaruro.

Uyu mugabo wanabaye umunyamategeko yagaragaje ko yaba umuhanzi cyangwa sosiyete yahaye uburenganzira bafite ubushobozi bwo gukurikirana inyungu zabo mu gihe hari izo batabona.

Alain Muku yavuze ko itegeko rigomba gukurikizwa mu gihe rigihari bityo ko abayobozi b’ibitangazamakuru badakwiye gukomeza kwirengagiza ibyo basabwa nkana.

Nubwo ariko abayobozi b’ibinyamakuru bafite mu nshingano kubahiriza amategeko, Alain Muku yibukije ubuyobozi bwa Sosiyete y’Abahanzi ko bukwiye kwegera abo bahagarariye bakabaganiriza, bakabereka uburyo baharanira inyungu zabo bityo impande zombi zikemeranya imikoranire ihamye.

Aha ariko yanasobanuye ko abahanzi bafite uburenganzira busesuye ku bihangano byabo bityo bakaba banagira ubwo kubiha ibitangazamakuru mu rwego rwo kubimenyekanisha.

Nemeye Platini na we yavuze ko nk’umwe mu bahanzi abizi neza ko bagomba kumenyekanisha ibihangano byabo ariko bakaba banakeneye amafaranga.

Aha uyu muhanzi yagaragaje ko kuba Sosiyete y’abahanzi itaragaragariza umuhanzi inyungu azakura mu kumwishyuriza ibihangano, ngo hagaragazwe neza uko azishyurwa amafaranga bituma hari abakomeza gucurangirwa ibihangano byabo byibuza ngo bimenyekane bicire inzira z’ejo.

Yagaragaje ko abahanzi ari abafatanyabikorwa n’amaradiyo bityo ko bagikeneye kumenyekanisha ibyo bakora binyuze mu bitangazamakuru, nubwo hakenewe n’amafaranga bwose.

Uyu muhanzi yagaragaje ko uwakoze igihangano ariwe uba ugifiteho uburenganzira ijana ku ijana bityo ariwe ugomba kugena uko ibihangano bye bikoreshwa.

KNC yatsembye ahakana ibyo kwishyura ibihangano

KNC wavugaga nk’umuyobozi w’igitangazamakuru akaba n’uw’ihuriro rya ba nyiri ibitangazamakuru yahakanye ibyo kwishyura abahanzi.

Yavuze ko yaba we ndetse n’abandi ahagarariye bafashe ingamba zo guhagarika gucuranga indirimbo z’abahanzi badafitanye amasezerano.

Aha yagaragaje ko hari abahanzi begereye ibitangazamakuru by’umwihariko icyo ayobora babaha uburenganzira bwo gucuranga ibihangano byabo.

Uyu mugabo yagaragaje ko ibitangazamakuru byo mu Rwanda bikoresha ibihangano by’abahanzi mu buryo bwo kubimenyekanisha aho kubikoresha mu bw’ubucuruzi.

Aha niho ashingira ko abahanzi bumvikanye babaha uburenganzira bwo gucuranga ibihangano byabo nta kiguzi.

KNC yabwiye uwari uhagarariye Sosiyete y’Abahanzi ko bashaka kwitwaza itegeko bagafata abahanzi bugwate mu bintu bitabafitiye inyungu n’imwe.

Ati "Ndabafata nk’abantu baje gufata abahanzi bugwate, batwereke lisite y’abahanzi bahagarariye bityo tumenye abo tuzishyura. Nta gitangazamakuru kizabishyura mu gihe mutagaragaza urutonde rw’abahanzi muhagarariye kuko abenshi mufite ni abashushanya n’abandi tutazi aho mwabakuye.”

KNC yakomeje agaragaza ko nta gitangazamakuru kirasinyana amasezerano na Sosiyete y’Abahanzi Nyarwanda kuko ikorera mu kavuyo.

Yavuze ko we n’abo ahagarariye batajya bangiza uburenganzira bw’umuhanzi kuko abo bacuranga baba babibahereye uburenganzira.

Ibitangazamakuru byashyizeho abanyamategeko bari kwigana umushinga wo gusaba ko itegeko rirebana n’iby’abahanzi rihinduka.

Ibi ngo batangiye kubitekerezaho kuko babonaga ko Sosiyete y’Abahanzi Nyarwanda ishobora kuba yitwaza itegeko ishaka gutera ubwoba ba nyiri ibitangazamakuru bityo bagasanga badakwiye kwifashisha itegeko nk’igikoresho cy’iterabwoba.

Umurindi wa Sosiyete y’abahanzi nyarwanda wazamutse nyuma y’aho Urwego Ngenzuramikorere (RURA) rwibukije ibigo by’itangazamakuru ko bigomba kwita ku kwishyura amafaranga y’ibihangano bakoresha umunsi ku wundi.

Bimwe mu bitangazamakuru byahise bifata ingamba zo kudacuranga indirimbo z’abahanzi badafitanye amasezerano.

Umuhanzi ushaka gucurangwa kuri ibi bitangazamakuru byamaze gufata izi ngamba, asabwa kwegera ubuyobozi bwabyo agasinyana amasezerano abaha uburenganzira busesuye bwo gucuranga igihangano cye.

Umva ikiganiro cyahuriyemo aba bagabo

KNC yavuze ko ibitangazamakuru bititeguye kwishyura abahanzi mu gihe Sosiyete ibishyuriza itagaragaza abo bakorana
Platini nk'umuhanzi yavuze ko bakeneye kumenyekanisha ibihangano byabo ariko bakeneye n'amafaranga. Yavuze ko bisaba ko sosiyete ibishyuriza isabwa kubanza kubereka inyungu bazakura mu bitangazamakuru zatuma babyambura ibihangano byabo
Charles Kwitonda (Uri ibumoso) wari uhagarariye RSAU, yavuze ko abayobozi b'ibitangazamakuru bakwiye gukurikiza itegeko kuko rihari kandi risobanutse
Alain Muku yibukije KNC ko igihe itegeko ritarahindurwa ryubahirizwa uko riri! yasabye ubuyobozi bwa RSAU kwegera abahanzi bakabereka inyungu bazakura mu bihangano byabo bazabishyuriza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .