Kayirebwa uri mu ndirimbo ‘Ikinyafu’, yahishuye uko yiyandikishije muri Miss Rwanda 2021 yikandagira

Yanditswe na Nsengiyumva Emmy
Kuya 4 Werurwe 2021 saa 10:13
Yasuwe :
0 0

Kayirebwa Marie Paul, umwe mu bakobwa 37 bari guhatanira ikamba rya Miss Rwanda 2021, yahishuye uko yagiye kwiyandikisha afite ubwoba bw’uko batazamwemerera gukomeza mu kindi cyiciro kubera ko yagaragaye mu mashusho y’indirimbo z’abahanzi batandukanye.

Uyu mukobwa witabiriye irushanwa rya Miss Rwanda bwa kabiri, yagaragaye mu ndirimbo zinyuranye nka ‘We Don’t Care’ ya Rj The Dj na Meddy & Rayvanny, ‘Ikinyafu’ ya Bruce Melodie na Kenny Sol na ‘Niko yaje’ ya Chris Hat.

Ubwo yatekerezaga kongera kwiyandikisha muri iri rushanwa yaherukaga guhatanamo mu 2018, Kayirebwa yabanje kugira umutima uhagaze atekereza ko batazamwemerera kuryitabira.

Yiyandikisha ubwoba bwari bwose, yaba ubwamuturukagaho n’ubwo yaterwaga n’inshuti ze zamucaga intege, zimwumvisha ko badashobora kumwakira.

Yagize ati “Ubwoba bwo kwiyandikisha bwo bwari bwinshi, hari abantu bakundaga kumbwira ko batazanyakira kuko nagiye mu mashusho y’indirimbo, nanjye rimwe na rimwe nkabyishyiramo.”

Kayirebwa avuga ko kuba abategura Irushanwa rya Miss Rwanda baramwakiriye, atari uko bari bayobewe ko yagiye mu mashusho y’indirimbo kuko ari abantu bakurikira, ahubwo ku bwe asanga barahaye agaciro impano ye.

Ati ”Kuba baranyemereye nkaba ngeze aha, ni uko kujya mu mashusho y’indirimbo nta kibazo biteye. Uyu ni umurimo uturuka ku mpano yanjye nkuko n’abandi bantu bafite izindi.”

Mu kiganiro yagiranye na IGIHE, Kayirebwa yavuze ko irushanwa rya Miss Rwanda yatangiye kurikurikira akiri umwana, icyakora aza gufata icyemezo cyo kuryitabira mu 2018.

Iki gihe ntabwo Kayirebwa byamuhiriye ngo arenge icyiciro cya Pre-selection, kuko yahise asezererwa.

Nyuma yo kwiha umwanya uhagije akitegura birenzeho, muri uyu mwaka Kayirebwa yiyemeje gusubira muri iri rushanwa bwa kabiri.

Aramutse yegukanye ikamba rya Miss Rwanda, Kayirebwa avuga ko afite umushinga wo gufasha abana batagize amahirwe yo gukomeza amashuri.

Ati “Nzafasha abana bacikirije amashuri […] si uko Leta itabafasha kwiga, ahubwo ni ikibazo cy’amikoro muri imwe mu miryango itabasha kubona ubushobozi bwo kunganira inkunga ya Leta.”

Kayirebwa Marie Paul w’imyaka 24 y’amavuko ni umwe mu bahagarariye Umujyi wa Kigali. Ni nimero 13 mu irushanwa rya Miss Rwanda 2021, akaba yararangije amashuri yisumbuye mu bijyanye n’Ubukerarugendo muri College Baptiste St Sylvestre de Kinigi.

Kayirebwa yiyandikishije mu irushanwa rya Miss Rwanda umutima udiha, atizeye kwemererwa ko azatoranywa
Kayirebwa avuga ko naramuka yegukanye ikamba azita ku bakiri bato bacikirije amashuri
Kayirebwa afite nimero 13 mu irushanwa rya Miss Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .