Miss Yasipi Casmir Uwihirwe agiye kujya kwiga muri Amerika

Yanditswe na Nsengiyumva Emmy
Kuya 29 Gicurasi 2020 saa 12:51
Yasuwe :
0 0

Uwihirwe Yasipi Casmir wabaye igisonga cya mbere muri Miss Rwanda 2019 agiye kwiyongera ku bandi bakobwa bahatanye muri iri rushanwa bagize amahirwe yo kujya kongerera ubumenyi hanze y’u Rwanda muri Leta Zunze Ubumwe za Amerika.

Ibi uyu mukobwa yabitangarije IGIHE mu kiganiro cyibanze ku buzima bwe busanzwe n’ubuhanzi cyane ko asanzwe ari n’umusizi uvuga imivugo.

Ubwo yari abajijwe aho ageze ibijyanye n’amasomo, Miss Uwihirwe yavuze ko yakabaye yaratangiye kaminuza muri uyu mwaka wa 2020 ariko byahuriranye n’icyorezo cya Covid-19 cyatumye amasomo asubikwa ahantu henshi.

Yagize ati “Kwiga byagombaga gutangira uyu mwaka, nzatangira muri Kanama 2020. Namaze kwiyandikisha nziga Computer Sciences muri Leta Zunze Ubumwe za Amerika hatagize igihinduka.”

Uwihirwe Yasipi Casmir ni umukobwa w’imyaka 20 yasoje amashuri yisumbuye muri Lycée de Kigali mu ishami ry’Imibare, Ubugenge na Mudasobwa akaba ari n’umwe mu bari barangije bafite amanota meza.

Muri Miss Rwanda yinjiranye umushinga wo guteza imbere impano z’urubyiruko no gukomeza kurushishikariza gutekereza mu buryo bwisumbuye agezemo aza kuwuhindura afata uwo kwita ku bana baba ku muhanda akabasubiza mu mashuri.

Uyu mukobwa ugiye kwiga muri Amerika asanzwe ari umusizi, mu minsi ishize yashyize hanze umuvugo we mushya yise “Slay Queens=Future Mama” aho yashakaga kuvuga uburyo abantu badakwiye guhora bavumira ku gahera abakobwa bafatwa nka Slay Queen kuko aribo babyeyi b’ejo hazaza h’u Rwanda.

Mu mwaka yamaranye ikamba ry’Igisonga cya mbere muri Miss Rwanda 2019, Uwihirwe yavuze ko yishimira kuba yarabashije gushyira mu bikorwa umushinga we wo gufasha abana batishoboye.

Ati “Nishimira cyane kuba narabashije gushyira mu bikorwa umushinga wanjye wo gufasha abana batishoboye ni iby’agaciro gakomeye kandi numva ari ishema kuri njye.”

Uwihirwe yabaye igisonga cya mbere cya Miss Nimwiza Meghan wegukanye ikamba rya Miss Rwanda 2019, naramuka agiye kwiga hanze y’u Rwanda azaba akurikiye abanda bafite amakamba anyuranye muri Miss Rwanda bagiye kwiga ndetse banatuye ku migabane itandukanye.

Bamwe mu bo umuntu yavuga harimo Miss Bahati Grace na Miss Kayibanda Aurore batuye muri Amerika, Miss Akiwacu Colombe utuye mu Bufaransa, Miss Kundwa Doriane utuye muri Canada n’abandi banyuranye bafite amakamba y’ibisonga muri Miss Rwanda.

Ikiganiro na Miss Uwihirwe Yasipi Casmir

Miss Uwihirwe agiye kwiga kaminuza muri Amerika
Miss Uwihirwe yabaye Igisonga cya mbere cya Miss Rwanda 2019
Miss Uwihirwe ubwo yitabiraga Itorero ry'Indangamirwa mu 2019
Muri iri torero ryasojwe na Perezida Kagame, Uwihirwe niwe wasobanuye amasomo y'urugamba batojwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .