Miss Rwanda 2021: Ibyihariye kuri Teta Cynthia wifuza guteza imbere ubukerarugendo bushingiye ku muco

Yanditswe na Nsengiyumva Emmy
Kuya 28 Gashyantare 2021 saa 07:32
Yasuwe :
0 0

Teta Cynthia ni umwe mu bakobwa 37 bari guhatanira ikamba rya Miss Rwanda 2021, uyu mukobwa uhagarariye Intara y’Iburengerazuba avuga ko naramuka atsindiye ikamba, azaharanira gukangurira urubyiruko kumenya amateka y’Igihugu.

Ibi uyu mukobwa w’imyaka 21 uri kwiga ubukerarugendo muri Kaminuza ya UTB, yabigarutseho ubwo yaganiraga na IGIHE kuri gahunda ze mu irushanwa rya Miss Rwanda.

Ati “Ndamutse negukanye ikamba rya Miss Rwanda 2021, nashishikariza urubyiruko n’Abanyarwanda muri rusange gukora ubukerarugendo bushingiye ku muco n’amateka by’Igihugu cyacu.”

Yavuze ko yahisemo uyu mushinga yifuza gufasha urubyiruko n’Abanyarwanda kumenya amateka n’umuco by’Igihugu.

Ati “Nimba Nyampinga nzabafasha kubona uburyo bwo gusura ahari amateka y’Igihugu cyacu, urubyiruko nitwe Rwanda rw’ejo hazaza nitwe tuzubaka igihugu nitwe babyeyi b’ejo hazaza, abazadukomokaho bagomba kuzagira amahirwe yo kumenya amateka y’Igihugu.”

Irushanwa rya Miss Rwanda ni rimwe mu bifasha abana b’abakobwa kwitinyuka bakagaragaza inzozi zabo.

Buri wese ugize amahirwe yo kuryitabira aba yizeye kuribyaza umusaruro, abenshi baba bizeye ko bashyira mu ngiro imishinga yabo mu gihe baba bagize amahirwe yo kwegukana amakamba.

Kuva ku wa 23 Gashyantare 2021, amatora ya Miss Rwanda yatangiye ku mugaragaro.

Gutora hifashishijwe ubutumwa bugufi ni ukujya ahandikirwa ubutumwa bugufi, ukandika ijambo MISS ugasiga akanya, ugashyiraho nimero y’umukobwa utoye hanyuma ukohereza ku 1525.

Gutora binyuze kuri murandasi (online), bikorerwa ku rubuga rwa IGIHE. Amajwi y’abatoye binyuze kuri SMS afite 70% naho online ni 30%.

Amatora azahagarikwa tariki 6 Werurwe 2021, umunsi uzatangarizwaho abakobwa 20 bazajya mu mwiherero.

Abahatana 20 ba mbere bazagera mu cyiciro cya nyuma, bazajya mu mwiherero uzatangira ku wa 6 Werurwe kugeza kuwa 20 Werurwe. Gusoza irushanwa bizabera muri Kigali Arena kandi bizatambuka kuri Televiziyo y’u Rwanda.

Teta Cynthia afite umushinga uhuye n'ibyo yiga muri kaminuza,ni umunyeshuri mu mwaka wa mbere muri UTB aho akurikirana ubukerarugendo (Ifoto: Muhizi Serge)
Teta Cynthia ari gutorerwa kuri nimero 22
Teta avuga ko naramuka yegukanye ikamba azakangurira urubyiruko kwitabira ubukerarugendo bw'imbere mu gihugu /Ifoto: Miss Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .