Miss Rwanda: Umunyamuziki yatsinzwe, uwiga itangazamakuru aza mu bakomeje i Huye

Yanditswe na Nsengiyumva Emmy
Kuya 5 Mutarama 2020 saa 11:24
Yasuwe :
0 0

Kuri uyu wa Gatandatu, tariki ya 4 Mutarama 2020, ijonjora ryo guhitamo Nyampinga w’u Rwanda 2020 ryakomereje mu Karere ka Huye ahatoranyirijwe abakobwa barindwi bazahagararira Intara y’Amajyepfo. Aha hiyamamarije umwe mu bakobwa biga itangazamakuru muri Kaminuza y’u Rwanda ndetse n’uwiga umuziki mu ishuri ry’igisha umuziki rya Nyundo.

Iri jonjora ryabereye muri Credo Hotel hafi ya Kaminuza y’u Rwanda, Ishami rya Huye ahazwi nk’i Ruhande.

Hiyandikishije abakobwa 79 bagombaga guhagararira iyi ntara, icyakora 28 nibo babashije kugera aho irushanwa ryabereye. Muri bo, 17 nibo bujuje ibisabwa bibemerera guhatanira guhagararira Intara y’Amajyepfo muri Miss Rwanda 2020.

Mu bakobwa 17 babashije gukomeza harimo umwe wiga umuziki mu ishuri rya Nyundo ndetse n’undi wiga Itangazamakuru muri Kaminuza y’u Rwanda i Butare.

Munyaneza wiga umuziki ntiyabashije kurenga umutaru

Munyaneza Yvette wiga mu ishuri rya muzika rya Nyundo mu mwaka wa gatatu aho agiye kwimukira mu wa kane wari wambaye nimero gatanu akigera imbere y’akanama nkemurampaka yavuze ko yiyumvamo icyizere no kuba ashoboye.

Ati “Nzumvisha urubyiruko ko rushoboye, rushoboye kuyobora. Bizatuma bagira ibitekerezo bikomeye kandi barusheho kwiteza imbere birushijeho.

Yavuze ko azagendera ku ngero z’abakobwa bafashijwe na Madamu Jeannette Kagame.

Nk’umwe mu biga umuziki, abagize akanama nkemurampaka yasoje ibibazo yabazwaga asabwe kuririmba atera indirimbo itaka ibyiza by’u Rwanda.

Uyu mukobwa ntabwo yahiriwe n’irushanwa dore ko atabashije kurenga umutaru, kuko atabashije gutoranywa muri barindwi bazahagararira Intara y’Amajyepfo.

Umutoniwase wiga itangazamakuru yahanyuranye umucyo

Umutoniwase Nadia wari wambaye nimero 10 wiga Itangazamakuru n’Itumanaho muri Kaminuza y’u Rwanda, Ishami rya Huye, na we yitabiriye irushanwa.

Yashimye ko Ikinyarwanda cyahawe intebe mu ndimi zikoreshwa mu irushanwa ndetse igaha abakobwa umwanya wo kugaragaza uruhare rwabo mu iterambere.

Yavuze ko Akarere ka Kamonyi avukamo azagafasha kuganiriza urubyiruko no kureba icyaruteza imbere.

Ati “Nzaganiriza urubyiruko ku kwirinda ibiyobyabwenge, inda zitateganyijwe.’’

Mu butumwa bwe yagize ati “Nabinyuza mu biganiro n’inama zibera mu midugudu no mu itangazamakuru ndetse no ku mbuga nkoranyambaga.’’

Uyu mukobwa akimara kwinjira mu bazahagararira Intara y’Amajyepfo muri Miss Rwanda yavuze ko ashaka kuba umunyamakuru wanegukanye ikamba.

Ati “Bizahura kuko kuba umunyamakuru ndetse no kuba Nyampinga n’itangazamakuru hose ni ahantu ujya ukavugira abantu benshi yaba abakugezaho ibibazo n’ibitekerezo.”

Uyu mukobwa yahishuye ko ubwo yajyaga kwiyamamaza yabihishe abo bigana ndetse n’inshuti ze kugira ngo azabatungure mu gihe azaba atahanye inkuru nziza.

Urugendo rwo guhitamo Nyampinga w’u Rwanda rwatangiriye mu Karere ka Rubavu kuwa 21 Ukuboza 2019, ahatoranyirijwe abakobwa batandatu; umunsi waryo wa kabiri ryagiye i Musanze mu Majyaruguru y’u Rwanda na ho hatorwa abakobwa batandatu ku wa 28 Ukuboza 2019.

Kuri uyu wa Gatandatu, tariki ya 4 Mutarama 2020 ijonjora ryo guhitamo Nyampinga w’u Rwanda 2020 ryakomereje mu Karere ka Huye ahatoranyirijwe abakobwa barindwi bazahagararira Intara y’Amajyepfo.

Abakobwa batoranyirijwe guhagararira Amajyepfo muri Miss Rwanda 2020:

1. Imanishimwe Hope Joy (No 12)

2. Musana Teta Hense (No 4)

3. Umwaliwase Claudette (No 1)

4. Igihozo Diane (No 16)

5. Ingabire Jolie Ange (No 3)

6. Umutoniwase Nadia (No 10)

7. Mumporeze Josiane (No 6)

Reba ubwiza bw’abakobwa biyamamarije guhagararira Intara y’Amajyepfo muri Miss Rwanda 2020

Ibyishimo by’abatsindiye guhagararira Intara y’Amajyepfo muri Miss Rwanda 2020

Uwiga itangazamakuru muri UR HUYE ashaka kuba Nyampinga w’u Rwanda

Munyaneza Yvette wiga mu ishuri rya muzika rya Nyundo ntiyabashije kurenga umutaru muri Miss Rwanda 2020
Umutoniwase Nadia wiga Itangazamakuru n’Itumanaho muri Kaminuza y’u Rwanda, Ishami rya Huye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .