00:00:00 IGIHE NETWORK KN KINYARWANDA EN ENGLISH FR FRANCAIS

Meddy yavuze ku rwibutso mu gutangira umuziki, izingiro ry’urukundo rwe na Mimi, Knowless n’ibindi (Video)

Yanditswe na Muhumuza Simeon, Uwiduhaye Theos
Kuya 3 Nzeri 2019 saa 05:56
Yasuwe :
0 0

Ngabo Médard Jobert [Meddy] ni umwe mu bahanzi bazamuye ibendera ry’umuziki Nyarwanda mu Karere n’Isi yose! Yihariye kugira igikundiro mu bihebeye indirimbo ziganjemo amagambo asembura ibyiyumviro n’amarangamutima hagati y’abakundana.

Uyu musore umaze kwamamara cyane mu bihugu bitandukanye muri Afurika azwi mu ndirimbo zitandukanye zirimo izo yahereyeho nka ‘‘Igipimo’’, ‘‘Amayobera’’ n’izindi.

Ibihangano bye byakunzwe n’Abanyarwanda, binambuka imipaka y’igihugu bigera mu baturanyi aho mu buryo bwihariye byahebuje abo muri Repubulika Iharanira Demokarasi ya Congo; ibitangazamakuru by’amajwi n’amashusho byarabikoreshaga ndetse ababikurikira bagashimangira ko babikunze mu gihe cyo gusaba indirimbo.

Meddy usigaye uba muri Leta Zunze Ubumwe za Amerika, ari mu Rwanda aho yatumiwe mu gitaramo kizaba nyuma y’umuhango wo Kwita Izina, cyanatumiwemo umuhanzi w’icyamamare mu njyana ya R&B, Ne-Yo.

Mu kiganiro kirambuye yagiranye na IGIHE yavuze byinshi ku buzima bwe, uko yatangiye umuziki, imvano y’urukundo rwe na Mimi Mehfira ukomoka muri Ethiopie n’ibindi.

IGIHE: Ni iki cyagutunguye ubwo wageraga mu Rwanda muri Kanama 2019?

Meddy: Ikintu cya mbere naje ntekereza ni Kigali Arena, kuko ngira ngo ku bahanzi ni ikintu gikomeye kugira ahantu nka hariya. Ni n’ikintu cyiza kuri buri Munyarwanda wese ariko nanjye ku giti cyanjye kirakomeye.

IGIHE: Kuba ugiye guhurira mu gitaramo kimwe na Ne-Yo, bivuze iki kuri wowe?

Meddy: Ni nk’undi muryango ukingutse mu buzima kuko turamuzi ni umuhanzi twarebeyeho kuva tukiri bato mu mashuri yisumbuye mu gihe twabyirukaga twumvaga imiziki irimo n’iye. Kuri njyewe ni umuntu wamberaga icyitegererezo kuva nkiri muto, ni ishema rero kuri njye kuba tugiye guhurira mu gitaramo.

IGIHE: Uretse iki gitaramo hari ibindi bikorwa by’umuziki waba uteganya gukorera mu Rwanda ?

Meddy: Birahari. Mfite imishinga myinshi hano ndi no gukora kuri album yanjye nshya ishobora kuzasohoka umwaka utaha. Ndi kureba uburyo nahuriza hamwe abahanzi benshi bashoboka kuri album yanjye.

IGIHE: Iyo album izaba iriho indirimbo zingahe?

Meddy: Ni nk’umwana utaravuka, ngira ngo ndi kubitegura ariko izaba iriho indirimbo zirenze umunani. Inyinshi abantu bazaba batazizi, ni ugukomeza guteza umuziki Nyarwanda kuko ariyo gahunda twiyemeje kandi twihaye.

IGIHE: Uzayimurikira mu Rwanda?

Meddy: Yego! Kuko mu Rwanda ni igihugu cyanjye ni ho umuziki wanjye wavukiye niho amateka yanjye yatangiriye. Uzaba ari umushinga munini.

IGIHE: Hari indirimbo wagiye ukorana n’abahanzi batandukanye bo mu Karere zirimo iya Sauti Sol ariko imishinga ntirangire. Ni izihe mbogamizi zabayemo?

Meddy: Twatangiye kubikoraho, na bo ubabajije bakubwira kuko hari igihe abantu bagira ngo dupfa kuvuga ibintu gusa ariko ibikorwa biba byaratangiye.

Nka ba Diamond twatangiye gukorana indirimbo ariko ntabwo aba ari ibintu byoroshye kugira ngo ubisohore kuko abahanzi bagira gahunda nyinshi cyane. Haba hari ibitaramo, ubuzima bwabo busanzwe ariko gusa gahunda yanjye ni ugusohoza ibyo niyemeje.

IGIHE: Umushinga wo gukorana indirimbo na Diamond watangiye ute?

Meddy: Ngira ngo wenda biterwa n’umuntu wabigiyemo cyangwa abantu muziranye ariko kuri njye nashakaga ni ukwagura umuziki wanjye, cyane ko muri iki gihe umuziki wacu utakiri mu Rwanda gusa ubundi urahava ukajya no mu bindi bihugu.

Ni intambwe ikomeye kandi abahanzi bakoze akazi gakomeye cyane, babize icyuya kugira ngo tube tuwuvuga uyu munsi. Ni muri urwo rwego nashatse gukorana n’abahanzi mpuzamahanga.

Abantu benshi bazi ko ntakunze gukorana n’abahanzi benshi ariko kuri iyi nshuro nashatse gukorana n’abandi ngo mpindure umuziki wanjye mu buryo bwose.

IGIHE: Mu ndirimbo zawe ni iyihe wakoze iturutse mu bitekerezo by’abafana?

Meddy: Indirimbo zanjye zose ziva mu bitekerezo byanjye gusa navuga ko bitewe n’igihe ndimo, umwaka ndimo[…] haba hari indirimbo nkomeza nibandaho bitewe n’igihe kirenga imyaka 10 maze ariko urebye iyangumye ku mutima kuva ku mwaka wa mbere kugeza ku wa gatanu biba bitandukanye.

Meddy yaherukaga gutaramira mu Rwanda mu gitaramo cya East African Party ku nshuro yacyo ya 11, cyabereye muri Parking ya Stade Amahoro ku wa 1 Mutarama 2019

IGIHE: Ni ibihe bintu utajya wibagirwa mu rugendo rwawe rwo gutangira umuziki ?

Meddy: [Yabanje akubita agatwenge] Icyo kintu ni cyiza cyane. Igitaramo cya mbere nakoze nagikoreye muri Black & White, abo twatangiranye ngira ngo barabyibuka, yari kuri Alpha Palace mfite indirimbo imwe. Nari mfite “Amayobera’’ yonyine ariko kubera ko bayicurangaga cyane kuri radiyo numvaga ko maze kumenyekana ku buryo ngize igitaramo abantu baza. Icyo gihe naje gusobanukirwa ko gukundwa kw’indirimbo mu gihe umuhanzi aba akizamuka abantu baba batarakwiyumvamo.

Nakoze igitaramo ngira ngo kizamo abantu 15 cyangwa 20, nacitse intege cyane kuko nigaga muri La Colombière mu mwaka wa Gatandatu dusoza amashuri yisumbuye. Kuri njyewe iyo ndebye uwo munsi ibyo natekerezaga naho ndi mpita mbona ko mu buzima ikibi ari ugucika intege.

Sinigeze na rimwe ntekereza kuzagera ku rwego ndiho uyu munsi mu muziki kubera iryo joro rimwe ryabaye hakaza abantu 15 na bo bazi indirimbo batazi nyirayo.

Abenshi bavugaga ko Meddy ari n’umukobwa ariko iki kintu cyankoze ku mutima kigumana nanjye n’icyo cyamfashije muri uru rugendo rwose rw’umuziki.

IGIHE: Umuziki watekerezaga kuzawukora kuva kera?

Meddy: Umuziki nawutangiye kera nk’uko mubizi mama yagiraga gitari mu rugo yari ishaje cyane ifite imigozi itatu, mu gihe izindi zigira itandatu. Yarayicuranze ntangira kuyiga njya muri korali ariko sinigeze nibona ndi umuhanzi ukomeye.

IGIHE: Ni uruhe rwibutso ufite ku munsi wa mbere wakandagiye muri studio?

Meddy: Byari ibintu bisekeje cyane! Twari dufite itsinda ry’abasore batatu, umwe yitwaga Eddy nanjye nkitwa Meddy; hari n’uwitwaga Benjamin we yari yariyise Benny. Tujya muri Studio dukora indirimbo yo guhimbaza Imana ariko icyo gihe hari hagezweho izigenda nk’inzayirwa natwe n’icyo cyari kiri mu mutwe, twakoraga za seben.

Tujya muri studio, producer turamuririmbira aravuga ati ‘iyi ndirimbo rero biragenda gutya’, abikoze twumva ni ibintu bikomeye cyane by’ibitangaza twumva ko twatangiye umuziki. Ariko ibyaje kuba nyuma byarahindaguritse cyane ku buryo ishusho yabo icyo gihe n’uyu munsi bitandukanye cyane.

IGIHE: Amafaranga ya mbere wakoreye mu muziki yari angahe ?

Meddy: Hari akantu ntari navuze muri cya gitaramo nakoreye muri Alpha Palace baranyambuye gusa bampaye amafaranga ya moto yo gutahaho.

Igitaramo cya kabiri rero ni icyo nari najyanye na Urban Boyz, icyo gihe ngira ngo na King James yari ahari, muri za 2008 cyangwa 2007 irangira.

Amafaranga nakoreye ubanza yari nka 3 000 Frw ariko kuri njyewe byari ibintu bikomeye cyane kuko bwari ubwa mbere nari mpembwe n’umuziki.

Naravuze nti ibi bintu bishobora kuba birimo akaryo nta wamenya. Igitaramo kirangiye twafashe bisi ziva i Butare twerekeza i Kigali tuganira. Nta n’umwe wari wamenye ko harimo abahanzi, bakajya bashyiramo indirimbo zacu tukumva baratuvuze kuko kera nabaga ndi nko muri taxi nkumva bakinnye indirimbo yanjye bamwe bati ariko umuhanzi witwa Meddy muramuzi kandi nicaye aho nkarinda mvamo ntawe umenye. Urwo rugendo ni ibintu biguma ku mutima w’umuntu, urabyibuka ugaseka.

IGIHE: Ni iyihe ndirimbo wandikanye agahinda?

Meddy: Ikintu gisekeje, indirimbo zose nanditse muri kiriya gihe byari ibintu nahimbaga. Nka ‘‘Amayobera’’ ntabwo nakubwira ngo iby’urukundo nari mbizi ku myaka 17 cyangwa 18 ariko kubera ko iyo uri umwanditsi cyangwa se impano ugira umuntu akaba yagira ngo ni nk’umuntu w’umusaza cyangwa se ukuze.

Ibyo byose nandikaga hari abavugaga bati ese uyu mwana ibyo yandika abikura he? Uyu munsi iyo mpindukiye nkareba ziriya ndirimbo nandikaga nanjye birantungura ariko buriya ni impano ntabwo ari ikintu umuntu yihingamo, kiba gihari.

Meddy ari mu bahanzi bakomeye cyane bakomoka mu Rwanda

IGIHE: Knowless yigeze kutubwira yaririmbye bwa mbere mu gitaramo cyawe, byagenze bite?

Meddy: Knowless ntituziranye cyane ariko ndamukurikirana. Ni uwo mu gisekuru cyanjye wenda n’ubwo ashobora kuba yaraje nyuma gatoya ariko nubaha umuziki we kandi ndawukunda. Ari mu bakobwa bahagarariye neza u Rwanda nizera ko nzahura na we umunsi umwe tukaganira.

IGIHE: Muri iyi minsi uri kugaragara ufatanye agatoki ku kandi na Mimi muri mu rukundo, mwamenyanye mute?

Meddy: Mimi twahuye nshaka umukobwa wo kujya mu mashusho ya ‘‘Nta wamusimbura’’. Nari mfite umuhungu w’inshuti yanjye muri Dallas ambwira ko hari umukobwa azi ariko atamenya niba yakwemera kujya mu mashusho y’indirimbo. Naramubwiye nti reka mvugane na we ndabizi nimuvugisha ndareba uburyo mbimwumvisha ku buryo azabyemera.

Yampaye gahunda y’uko duhurira ahandi hantu kure y’iwabo ngezeyo arambwira ati ‘nari nziko ugiye kuza nk’umusazi’ kuko yari azi ko abahanzi bose baba bajagaraye.

Ndamusobanurira mubwira ko nta kintu kibi kizakorwamo ariko muri njyewe hari ikintu navugaga nti ‘ndabona uyu mukobwa ariwe ukwiriye kujya muri video’. Byamaze nk’amezi ane kugeza igihe yaje kuvuga ati noneho tujye gukora iyo video.

Yambwiye ko ari ubwa mbere agiye gukora ibintu by’imiziki ndetse ko iyo mu Rwanda atayizi ariko anyemerera kumfasha ambwira ko yabonye ndi umwana mwiza.

Yaje kugira urugendo muri Ethiopie amara amezi nk’abiri kugeza naho producer yambwiye gushaka abandi ariko mu mutima nkavuga nti uriya mukobwa ndumva ariwe nshaka ko ajya mu ndirimbo yanjye.

Icyantangaje ni ukuntu yakinnyemo, nari nzi ko ngiye kumwigisha ibintu byose tugeze aho twari gukorera twaramubwiraga tuti gira gutya agahita abikora ndavuga nti ‘uriya mukobwa ntiyambeshye?’ Ndamubaza nti ‘Ni ubwa mbere koko?’, ansubiza ko atigeze abitekereza na rimwe. Biza guhwaniramo neza tunaba inshuti biturutse kuri ayo mashusho. Yambwiye ko ayo mashusho ninyereka ababyeyi bazanyica ndamubwira nti ariko nta kibi kirimo ku buryo twanayinonsoye ahari tukamwereka.

Byari ibintu birebire ku buryo amashusho yamaze amezi atandatu atarajya hanze. Dutangira kumenyana tuba inshuti naho byahereye, ntabwo yigeze atekereza ko azakundana n’umuririmbyi, nanjye sinari nziko tuzakundana.

IGIHE: Ni ryari watoboye ukamubwira ijambo “Ndagukunda’’?

Meddy: Ni ibintu navuga ko byikoze. Twabaye inshuti, ubucuti burakura cyane tuza kwisanga twatangiye gukundana. Ha handi bwakwira utavuganye n’umuntu ukagira amarangamutima.

IGIHE: Ni ikihe kintu ukundira Mimi?

Meddy: Ni umukobwa w’umukozi kandi witonda. Ninkubwira gutyo umenye ko yitanga, akitangira umuryango we, aruhuka amasaha make. Nanjye ubwanjye antera imbaraga hari ibintu byinshi mwigiraho ntari mfite. Twebwe kubera kuba mu buzima bwa gisitari hari ibyo uba utazi, ngira ngo ni we muntu ubikuraho nkaba umuntu usanzwe.

Meddy na Mehfira Mimi bamaze igihe bakundana, avuga ko uyu mukobwa yihariye kubera umurava we
Meddy yeretse abafana be b’i Kigali umukunzi we Mimi mu gitaramo cya East African Party cyabereye muri Parking ya Stade Amahoro ku wa 1 Mutarama 2019

IGIHE: Mu minsi byavuzwe ko yagiye kukwerekana mu rugo iwabo muri Ethiopie?

Meddy: Ntiyigeze ajya kunyerekana mu rugo iwabo kandi nanjye sinigize mbikora. Nagiye muri Ethiopie kuhasura, mu muco Nyarwanda cyangwa wa Kinyafurika umuntu agira igihe akajya kwerekana uwo bakundana ariko kubera ko byabaye mu buryo tutiteguye icyo kintu ntabwo cyabayeho muri ubwo buryo.

Aza mu Rwanda yari aje kureba uko hameze ahita ahura n’umuryango wanjye nanjye ajya kunyerekana iwabo.

IGIHE: Umwereka mama wawe yakubwiye iki ?

Meddy: Aramukunda cyane. Mama wanjye ni umuntu ucishije make cyane nta kintu gitangaje yavuze ariko yaravuze ati ‘ni umwana mwiza’.

Meddy avuga ko umukunzi we yerekanwe mu buryo batateguye. Aha yari i Kigali aho yakiriwe na nyina w'uyu muhanzi

IGIHE: Akenshi ukunze kuvuga mama wawe nk’umubyeyi w’intwari cyane, ni iki mujya muganira cyane kuri WhatsApp?

Meddy: Iyo anyandikiye simusubize, ahita anyandikira ubutumwa burebure cyane, ni ukuvuga ko ngomba kumuvugisha buri gihe kugira ngo adahangayika. Ni igihe twatangiraga umuziki yandwaniraga ishyaka akumva nta munyamakuru ugomba kumvuga nabi bigatuma nshaka kumurinda ko ajya mu Isi y’imyidagaduro. Ikindi ni umubyeyi ugira urukundo cyane, ntakunda kugaragara n’iyo mfashe ifoto na we arambwira ngo sinyishyire hanze.

IGIHE: Iyo wumvise bakugereranya na The Ben ubivugaho iki?

Meddy: Ni byiza guhiganwa, biba ahantu hose ari icya mbere ni uko mubanye. The Ben agize ikintu kimusubiza inyuma mu buzima cyangwa se mu muziki nanjye byangiraho ingaruka kuko ni umuntu twakuranye ni umuntu wishimira ko hari icyo nageraho nanjye bikaba uko.

Hagize nk’ikintu nkeneye cyangwa akeneye namufasha. Abo bafana bo ntabwo wabamagana, ni byiza ariko ku mutima ni inshuti yanjye cyane.

Meddy avuga ko n'ubwo abafana bakunze kumugereranya na The Ben ari inshuti ye magara

IGIHE: Nyuma y’indirimbo “Downtown” abantu bitege iki?

Meddy: Ni byinshi mfite imishinga myinshi ndi gukoraho ngira ngo mu bintu byanzanye hano nabyo birimo, ngo mfatanye n’abandi bahanzi kuzamura umuziki. Bitegure ibintu byinshi bishya n’abahanzi ba hano n’abo hanze.

IGIHE: Mu minsi ishize watumiwe mu bitaramo mu Burundi ntiwabyitabira bizamura amagambo menshi. Byarangiye bite?

Meddy: Urabizi muri showbiz haba ibintu byinshi bitandukanye, ugira amasezerano n’umuntu hanyuma ibyo ushaka bitajyamo cyangwa se ibyo ashaka bitajyamo mukagirana akabazo. Icya mbere ni ukwicara nk’abagabo mukabikemura. Biraza bikagenda, ni kimwe mu bintu niyemeje kubana nabyo mu muziki.

IGIHE: Uherutse kugira isabukuru y’amavuko y’imyaka 30, uteganya kurushinga ryari ?

Meddy: Kurushinga kuri njye ntabwo ari icyangombwa cyane mu buzima, kuko hari abantu bumva ko uriga, ukarangiza, ugashaka akazi wamara kukabona ukabyara ariko kuri njye si uko bimeze.

Njyewe nkurikiza ubuzima aho numvise ko ari ngombwa nkabikora cyangwa se icyo numvise ko kitari ngombwa nkategereza nta ngengabihe mfite ngomba gukurikiza. Icya mbere ni ukureba ko ndi gutera imbere, ubuzima bwa bagenzi banjye n’umuryango. Ntabwo uwo munsi uragera ariko Imana nimfasha nzabigeraho.

IGIHE: Mukigera muri Amerika wowe n’abandi bahanzi b’Abanyarwanda mwibumbiye muri Press One Entertainment, ibyayo byarangiye bite?

Meddy: Press One ntiyarangiye mu mitima yacu ahubwo ni ibyo twakoraga byatandukanye. Mushobora gutangira muri abantu batatu mukagera ahantu mwese buri umwe agafata iye nzira ariko turi inshuti cyane tuba tuvugana buri munota. Nta kintu na kimwe cyahindutse usibye mu mikorere.

Meddy avuga ko Press One batatandukanye ahubwo buri wese yatangiye ubuzima bushya, ariko ubu bakaba ari inshuti bakunze no kuvugana cyane
Meddy yakoreye indirimbo muri Wasafi zirimo iya Diamond Platnumz, Mboso n'iya Dj Rommy (bari kumwe ku ifoto)
Diamond Platnumz uri mu bakunzwe mu Karere uheruka gutaramira mu Rwanda ku wa 18 Kanama 2019, ari mu bahanzi bakoranye na Meddy indirimbo nubwo itarajya hanze
Meddy avuga ko gukora umuziki akamamara ku rwego agezeho ari ibintu byamutunguye
Mu ndirimbo Meddy yakoreye muri Wasafi harimo iye na Mbosso
Meddy na Mimi bamaze igihe bari mu munyenga w'urukundo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .