Meddy n’ikigo cyamureze mu nkiko bemeranyije kumvikana mbere y’inzira y’amategeko

Yanditswe na Muvunyi Arsène
Kuya 14 Werurwe 2019 saa 10:55
Yasuwe :
0 0

Umuhanzi Ngabo Medard [Meddy], n’Ikigo cyitwa Kagi Rwanda Ltd cyamutumiye mu gitaramo ariko ntiyitabire, bemeranyije kumvikana bagakemura ikibazo byananirana bakabona kwitabaza inkiko.

Kuri uyu wa 14 Werurwe 2018 mu Rukiko rw’Ubucuruzi ku Kimuhurura nibwo habaye Inama ntegurarubanza Ikigo cyitwa Kagi Rwanda Ltd cyarezemo umuhanzi Ngabo Medard kubera kutitabira igitaramo yari yatumiwemo mu Bubiligi mu gihe hari amafaranga yari yishyuwe.

Ubusanzwe inama ntegurarubanza iba mbere y’uko urubanza nyir’izina rutangira igahuza urega n’uregwa imbere umwanditsi y’urukiko aho aba agenzura niba imihango yose ijyanye n’itegurwa ry’urubanza yarubahirijwe.

Meddy uba muri Leta Zunze Ubumwe za Amerika ntabwo yari ahari ariko yari ahagarariwe n’umwunganizi we mu mategeko. Ku rundi ruhande, Kagi Rwanda Ltd yari yunganiwe ndetse n’umuyobozi wayo yari ahari.

Iki kigo kirega Meddy kuba cyaramutumiye mu gitaramo mu Bubiligi ndetse akishyurwa ibihumbi 10 by’amadolari ariko ntajye kuririmba ndetse cyamusaba no gusubiza amafaranga ntabikore.

Muri iyi nama, uruhande rwa Meddy rwasabye ko habaho ubwumvikane n’iki kigo ikibazo kigakemuka mu bwumvikane byananirana bakaba bakomeza inzira zindi z’amategeko.

Umwanditsi w’urukiko yabahaye icyumweru cyo kuba bamaze gufata umwanzuro mu gihe kumvikana byananirana urubanza rukazakomeza tariki 22 Werurwe 2019.

Bivugwa ko impamvu yatumye Meddy atitabira kiriya gitaramo ari uko yabuze ibyangombwa by’inzira (Visa) byagombaga kumufasha kwinjira mu Bubiligi.

Uretse Kagi Rwanda Lt, Meddy arishyuzwa amafaranga yahawe na Crystal Event y’i Burundi yamutumiye mu mpera z’umwaka ushize ariko ntajyeyo kubera impamvu z’umutekano. Biteganyijwe ko ibiganiro byabo nibyanga nabo bazamurega.

Meddy yasabye ko ikibazo cye n'abari kumurega cyakemurwa mu bwumvikane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza