00:00:00 IGIHE NETWORK KN KINYARWANDA EN ENGLISH FR FRANCAIS

Massamba na Ruti Joël batanze ibyishimo mu gitaramo cyahuje aba-diaspora i Kigali (Amafoto)

Yanditswe na Mahoro Vainqueur
Kuya 31 Ukuboza 2022 saa 09:13
Yasuwe :

Abanya-Kigali n’inshuti zabo ziba muri Diaspora bagiriye ibihe byiza mu gitaramo bahuriyemo n’abahanzi nka Massamba Intore, Ruti Joël , Kaayi n’abandi.

Iki gitaramo cyabereye kuri Onomo Hotel mu ijoro ryo ku wa 30 Ukuboza 2022 cyateguwe mu rwego rwo gufasha Abanyarwanda baba mu mahanga baje mu biruhuko by’iminsi mikuru isoza umwaka kwishimana n’inshuti cyangwa imiryango yabo.

Ni inshuro ya mbere iki gitaramo cy’ubusabane bw’Abanyarwanda na bene wabo baba mu mahanga cyari kibaye. Cyayobowe n’abanyarwenya Samson Mucyo (Samu) na Shizirungu Seka Seth bibumbiye mu itsinda rya Zuby Comedy.

Aba banyarwenya bayoboye iki gitaramo batera urwenya bigana Aba-diaspora bagera hanze y’u Rwanda nyuma y’iminsi mike itageze no kuri irindwi bakagaruka bavuga ko bibagiwe Ikinyarwanda.

Batebya bagize bati “Ugasanga umuntu amaze iminsi itanu mu Bubiligi akagaruka yivugishwa ngo Ikinyarwanda cyanjye cyabaye (mukenya) aho kuvuga ko yacyibagiwe , ahubwo se acyibagirwa ate ? , baravuga ngo agahugu katagira umuco karacika mujye mubimenya.”

Mu bahanzi bataramye muri iki gitaramo babimburiwe na Kaayi ukunzwe mu ndirimbo yitwa ‘Pali’ akaba umwe mu banyamuziki bari kuzamuneza neza mu ruganda rw’imyidagaduro mu Rwanda.

Yakurikiwe na Ruti Joël wasogongeje abari muri iki gitaramo zimwe mu ndirimbo ziri kuri Album ye ya mbere yitegura kumurika vuba aha.

Ruti Joël wishimiwe cyane yaririmbye zimwe mu ndirimbo ze zakunzwe zirimo , ‘Rasana’, ‘Igikobwa’, ‘Iyizire’ asoreza kuri ‘Sirilatere (Sur la Terre)’ ya Célestin Minani Rwema.

Iyi ndirimbo yahagurukije benshi baririmbanye n’uyu muhanzi wahisemo guhuza umuziki ugezweho n’injyana gakondo.

Mbere y’uko Massamba ajya ku rubyiniro Sam na Seth babanje gutera urwenya bibutsa Abanyarwanda baba mu mahanga ko Nyamirambo itakiri yayindi basize cyangwa baheruka kera.

Bababwiye ko ubu hasigaye hari imihanda irimo amarangi, inzira zagenewe abanyamaguru zirimo kaburimbo n’ibindi.

Massamba umaze igihe kinini muri muzika yaserukanye itsinda rimufasha gucuranga ririmo umuhanzi Victor Rukotana.

Abitabiriye iki gitaramo bakibona Intore Massamba amarangamutima yabarenze bava mu byicaro byabo begura telefone zabo bafatanya nawe kuririmbana ari nako bamufata amashusho.

Buri wese wabonaga afite amatsiko yo kureba Massamba abaririmbira dore ko abenshi baba batanamuherutse.

Uyu muhanzi wari ufite akanyamuneza yaririmbye indirimbo zitandukanye zirimo; Uzabatashye, Agasaza , Arihe, Nyaruguru, Kanjogera, Rwagihuta, n’izindi yaririmbanye n’abamukurikiye kuva atangiye kugeza asoje.

Uyu muhanzi wamaze amasaha atatu n’iminota 50 ku rubyiniro yanyuzagamo akajya kuramukanya n’abari bamukirikiye abasanga mu byicaro byabo.

Marina na Yvan Muzik batunguranye muri iki gitaramo

Massamba yageze hagati yereka abari bamurikiye abahanzi yishimira gukorana nabo barimo, Ruti Joël ,Victor Rukotana, Marina na Yvan Muziki.

Yagize ati “Hari ibintu biri kunezeza muri iyi minsi, ngira ngo mwabonye aho Ruti Joël ageze, ubu noneho uyu nawe araje (avuga Victor Rukotana), aba bana bari gushaka gutera ikirenge mu cyanjye.”

Victor Rukotana yahise aririmba indirimbo yise ‘Warumagaye’ nyuma Massamba ahita yakira Marina na Yvan Muzik baririmbana indirimbo ‘Urugo ruhire’ yazamuye amaranga mutima ya benshi batangira gucinya akadiho.

Victor Rukotana na Yvan Muziki baririmbye indirimbo ‘Gusaakaara’ ya Yvan Buravan, Massamba asaba abari aho guha icyubahiro uyu muhanzi avuga ko yakoze ibikomeye.

Umurishyo wanyuma w’iki gitaramo wakomwe ku isaha ya saa Sita z’ijoro, gusa wabonaga benshi badashaka gutaha bagikineye Massamba akomeza kubataramira.

Bakoze uko bashoboye ngo bafate ifoto ya Massamba Intore
Bitewe n'akanyamuneza buri wese yabyinaga ibyo ashoboye agerageza kujyania na Massamba
Buri wese yavuye mu byicaro bye arahaguruka aririmbana na Massamba
Iki gitaramo cyitabiriwe n'Abanyarwanda baba mu mahanga n'inshuti zabo ndetse n'abo mu miryango yabo
Sam na Seth bahuriye mu itsinda rya Zuby Comedy nibo bayoboye iki gitaramo
Ubishoboye yafashe agafoto kazahora kamwibutsa ibi bihe
Umuhanzikazi Marina wari ukubutse i Dubai yatunguranye muri iki gitaramo
Akanyamuneza kari kose ku bitabiriye iki gitaramo

Amafoto: Prince Munyakuri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .