Marina yavuze ku ndirimbo ebyiri yakoreye i Burayi

Yanditswe na Nsengiyumva Emmy
Kuya 6 Werurwe 2020 saa 10:23
Yasuwe :
0 0

Umuhanzikazi Marina yahishuye ko yavuye ku mugabane w’u Burayi ahafatiye amashusho y’indirimbo ebyiri, zirimo imwe yakoranye na Social Mula n’indi yakoze wenyine.

Mu mpera za Gashyantare nibwo Marina yari yagiye i Burayi yitabiriye igitaramo yatumiwemo we n’abandi bahanzi nka Riderman na Social Mula.

Mu gihe gito yamaze ku mugabane w’u Burayi yahafatiye amashusho y’indirimbo yakoranye na Social Mula bise “King&Queen” n’indi yise “Wolokoso”.

Kwita indirimbo “Wolokoso” yavuze ko atari igitekerezo cye ndetse atazi neza ururimi iri jambo rikomokamo, ahubwo ko ari ibitekerezo byaje ari muri studio.

Ati “Ni imvugo ikoreshwa mu rubyiruko iyo bashatse kuvuga umuntu ugira amagambo, twari muri studio ndi gutekereza izina ry’iyi ndirimbo Producer Hollybeat arambwira ngo gabanya Walokoso dushake izina ryiza. Nanjye nahise numva izina ryayo.”

Ubusanzwe mu rurimi rw’Ikigande, Wolokoso bisobanurwa nk’ibintu by’umwanda, bidakwiriye.

Marina yakomeje avuga ko iyi ndirimbo aba avugamo abantu bagira amagambo menshi. Ibijyanye n’uburyo izi ndirimbo zizajya hanze ndetse n’igihe zizasohokera, yavuze ko byose bizagenwa n’ikipe isanzwe imufasha ya The Mane.

Izi ndirimbo amashusho yazo yafashwe anatunganywa n’umusore umaze kumenyekana nka Julien ukunze gufasha abahanzi batuye i Burayi.

Bwari ubwa mbere Marina agiye ku mugabane w’u Burayi, iyo aganira ku rugendo rwe avuga ko yasanze nta kintu kidasanzwe kihaba ku buryo atafata inzira ngo ajye guturayo asize u Rwanda.

Ati “Si ahantu najya gutura, umuntu yatemberayo no guhahayo ariko u Rwanda ni rwiza. Ikirere cyaho, akavuyo mu mihanda rwose u Rwanda ni rwiza hariya sinajya guturayo.”

Marina yavuze ko ibiryo byo mu Bubiligi byamugoye kugeza ubwo yabonye aho ajya kurira muri Restaurant y’Abanyarwanda ihaba nubwo rwose ibiciro byaho byihagazeho.

Reba ikiganiro kirambuye twagiranye na Marina


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza