00:00:00 IGIHE NETWORK KN KINYARWANDA EN ENGLISH FR FRANCAIS

Makanyaga agiye gukora ibitaramo byo kwizihiza imyaka 50 amaze mu muziki

Yanditswe na Nsengiyumva Emmy
Kuya 16 September 2022 saa 04:02
Yasuwe :

Makanyaga Abdul w’imyaka 75 y’amavuko ni umuhanzi n’umucuranzi mu myaka isaga 50 ishize, akaba afite amateka akungahaye mu muziki w’u Rwanda.

Uyu musaza uri mu bamaranye imyaka myinshi igikundiro mu muziki w’u Rwanda, ari mu myiteguro yo kwizihiza imyaka 50 amaze mu muziki.

Inyandiko iteguza abantu ibitaramo bizazenguruka Igihugu hizihizwa imyaka 50 amaze mu muziki, irerekana ko azaririmbira mu Mijyi ya Musanze, Rubavu , Huye , Rusizi ndetse no mu Mujyi wa Kigali.

Ibi bitaramo byitezwe ko azabiririmbamo indirimbo ze zakunzwe nka ‘Nshatse inshuti’, ‘Rubanda’ n’izindi nyinshi zabiciye bigacika kuva mu myaka ya za 1970 kuzamura.

Byitezwe ko ibi bitaramo bizatangira mu Ukwakira 2022 bikazarangira mu Ukuboza 2022.

Amateka ya Makanyaga Abdul

Makanyaga wituriye mu misozi ya Nyamirambo mu Karere ka Nyarugenge, aba yitegeye i Biryogo aho yakuriye kuva mu bwana bwe.

Iyo muganiriye, Makanyaga avuga ko yavukiye i Huye mu Ntara y’Amajyepfo tariki 27 Nzeri 1947, icyakora bitewe n’uko se yakoreraga abazungu baje kwimukira i Bujumbura biba ngombwa ko yimukana n’umuryango we.

Aha ni naho yigiye amashuri abiri abanza i Bujumbura, ku bw’amahirwe make se aza kwitaba Imana bituma nyina abagarura mu Rwanda.

Mu gutaha mu rw’imisozi igihumbi, nyina yerekeje i Kigali ahingukira i Nyamirambo aba ariho afata ikibanza.

Makanyaga wakuriye i Nyamirambo ni naho yatuye mu busore bwe, aha byari nyuma yo kurangiza uwa gatandatu w’amashuri abanza akajya kwiga imyuga ku Kicukiro gusa kubera ubushobozi buke biza kurangira rimunaniye ayoboka iy’ubucurizi.

Ku myaka 19 nibwo Makanyaga yatangiye gutekereza ibya muzika, nyuma yo kubona gitari y’umunyeshuri wigaga muri Collège Saint André bari baturanye.

Iki gihe nibwo Makanyaga wari ufite amafaranga yakuye mu bucuruzi yakoraga yashatse uko agura gitari yo kwigiraho gucuranga abifashijwemo n’umusaza witwa Habineza Shabani.

Nyuma y’igihe Habineza na Makanyaga bafatanyije na Sebanani André biyemeje gukora Orchestre ‘Rita Jazz’.

Nyuma y’igihe bacurangana muri Rita Jazz, Makanyaga yagiye muri Orchestre Les Copains yabarizwaga muri Camp Kigali.

Urugendo rwe muri Orchestre Les Copains rwagizwemo uruhare na Condo Gedeon wamuranze nk’umuririmbyi mwiza.

Nyuma y’igihe babarizwa muri Orchestre Les Copains, Makanyaga na bagenzi be baje kuyivamo bapfuye ko bari banze kubagurira ibikoresho bishya.

Bakiva muri Orchestre Les Copains, Makanyaga na bagenzi be bakoze indi bise Jaguar ariko iyi ntiyamara kabiri kuko ari bafite ikibazo cy’amikoro.

Kubura ubushobozi kwa Orchestre Jaguar byatumye Habineza Shaban bari baziranye kuva cyera amusaba gusubira muri Rita Jazz yari yamutanye.

Icyakora ayisubiyemo bayihinduriye izina bayita “Abamararungu” bashaka abakobwa b’abahanga babyina ku buryo yabaye Orchestre ikomeye.

Bitewe n’uko “Abamararungu” yari yagizwe Orchestre ya Komini kubera ko Habineza Shabani yari umuyobozi muri komini ariko ikaba nta mafaranga babonaga avuye muri Komini, bamwe bahisemo kuvamo bashinga indi bise “Inkumburwa”.

Orchestre Inkumburwa yabayeho kuva muri 1981 kugeza mu 1991 ubwo Makanyaga na bagenzi be bafataga icyemezo cyo kuba bahagaritse umuziki bitewe n’uko mu gihugu hatari umutekano uhagije.

Mu 1996, nyuma ya Jenoside yakorewe Abatutsi habaye inama i Nyamirambo bityo Minisiteri y’Urubyiruko isaba abari abahanzi mbere kongera gukora umuziki kuko byasaga nk’ibyapfuye.

Mu 1997 nibwo Makanyaga yahuje Sibomana Jef, Ngabonziza Augustin wacurangaga muri Les Citadins, Kaliwanjenje wabaga mu Impala, Deo Santos n’abana ba Makanyaga bakora Orchestre nshya.

Iki gihe bakoze ibitaramo Abanyarwanda babereka urukundo rukomeye cyane ko batari baherutse kubona ahantu habereye igitaramo.

Kuva 1997 kugeza mu 2000 bakoraga ibitaramo ariko bataremeza uburyo iyi Orchestre izabaho, kugeza ubwo babonye aho gukorera hahamye kwa Lando i Remera.

Aha niho bitiye Orchestre yabo “Irangira” nayo yasenyutse hagati ya 2006-2007 bitewe n’ikibazo yagiranye na Ngabonziza Augustin wigwijeho umutungo wa Album bari bafashijwe n’abagiraneza akazigurisha batabizi, birababaza bituma batandukana gutyo.

Nyuma y’uko batandukanye, Makanyaga yakoze itsinda ry’abacuranzi be yise “Makanyaga Band” ari nayo kugeza ubu ari gukorana nayo.

Kuri ubu Makanyaga yinjiye muri kompanyi nshya yitwa “Indongozi Muzika” atekereza ko izamufasha gukora ibindi bihangano ndetse no kuvugurura ibyo yari asanganywe.

Makanyaga kugeza ubu ni umugabo washatse abagore babiri, uwa mbere yashatse afite imyaka 18 babyaranye abana babiri, icyakora bitewe n’uko bari bakiri bato kubaka byarabananiye bahitamo gutandukana.

Agize imyaka 26 yaje gushaka undi mugore babyaranye abana barindwi gusa babiri bitabye Imana. Makanyaga avuga ko mu bana be harimo abagaragaza impano y’umuziki.

Makanyaga Abdul agiye gukora ibitaramo byo kwizihiza Yubile y’imyaka 50

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .