00:00:00 IGIHE NETWORK KN KINYARWANDA EN ENGLISH FR FRANCAIS

Melodie na Mbonyi begukanye Isango na Muzika Awards ubugira gatatu- Uko ibirori bya 2022 byagenze (Amafoto na Video)

Yanditswe na Israel Ishimwe, Nsengiyumva Emmy
Kuya 17 Ukuboza 2022 saa 07:37
Yasuwe :

Abahanzi Bruce Melodie na Israel Mbonyi ndetse na Producer Element bahawe ibihembo muri Isango na Muzika Awards 2022 bigenerwa abitwaye neza mu ruganda rw’imyidagaduro mu mwaka.

Ibirori byo gutanga ibi bihembo byabereye muri Park Inn by Radisson Hotel i Kigali ku mugoroba wo ku Cyumweru, tariki ya 17 Ukuboza 2022.

Ibihembo bya Isango na Muzika Awards (IMA) bitegurwa na Radio Isango Star iri mu zatanze umusanzu ufatika mu guteza imbere imyidagaduro y’u Rwanda kuba mu myaka yo hambere. Bihabwa abahanzi n’abo mu ruganda rw’imyidagaduro bahize abandi mu mwaka bitewe n’ibikorwa bagaragaje.

Ni ku nshuro ya gatatu ibi bihembo byatanzwe kuko byatangiye gutegurwa mu 2020. Muri uyu mwaka, ibi bihembo byatanzwe mu byiciro umunani birimo icy’abahanzi bashya mu muziki (Best New Artist); icy’abahanzikazi bahize abandi (Best Female Artist); icy’abahanzi b’abagabo bahize abandi (Best Male Artist); icy’indirimbo ihuriweho nziza (Best collabo); icy’abatunganya amashusho y’indirimbo bahize abandi (Best Video Director); icy’abatunganya indirimbo mu buryo bw’amajwi (Best Audio Producers); icy’indirimbo nziza z’umwaka (Best song of the Year) n’icy’abahanzi bakora umuziki wo kuramya no guhimbaza Imana bahize abandi.

Kuva icyo gihe abahanzi barimo Bruce Melodie, Israel Mbonyi na Element bagiye babyegukana buri mwaka.

Bruce Melodie yatowe nk’umuhanzi w’umwaka mu gihe Israel Mbonyi yagizwe umuramyi w’umwaka. Producer Element yabaye utunganya indirimbo z’amajwi w’umwaka.

UKO ITANGWA RY’IBIHEMBO BYA ISANGO NA MUZIKA AWARDS RYAGENZE:

USHOBORA GUKURIKIRA IBI BIRORI KU MBUGA NKORANYAMBAGA ZA IGIHE

23:06: Umurishyo wa nyuma wakomwe na Cuncraz Band binyuze mu ndirimbo zitandukanye ziganjemo izo mu mahanga no mu Karere ka Afurika y’Iburasirazuba nka "Nakupenda" ya Jay Melody.

  Bruce Melodie yasoje umwaka yemye

22:59: Bruce Melodie ni we muhanzi w’umwaka “Best Male Artist of The Year”. Muri iki cyiciro yahize Kenny Sol, Juno Kizigenza na Christopher bari bahanganye.

Igihembo cy’uyu muhanzikazi uri mu Mujyi wa Kampala aho yitabiriye Igitaramo “Kigakampala” cyakiriwe na mukuru we.

Mu ijambo yavuze, yashimye abakunzi ba Bruce Melodie badahwema kumwereka urukundo.

Ati “Mu izina rya Bruce Melodie ndashimira Isango Star. Ni ibyishimo ku muryango, ni ubwa mbere mpagaze ahantu nk’aha mu mwanya we gusa ndabashimiye cyane.’’

Bruce Melodie uri mu bahanzi bakomeye mu Rwanda muri uyu mwaka yakoze iyo bwabaga akora indirimbo zakunzwe cyane zirimo n’izo yakoranye n’abahanzi barimo Eddy Kenzo wo muri Uganda, Harmonize muri Tanzania, Innoss’B wo muri RDC.

Mu minsi ishize yakoranye n’abasore bagezweho i Burundi Double Jay na Kirikou Akili.

Uretse izo yakoranye n’abandi bahanzi, Bruce Melodie yanasohoye indirimbo ze wenyine kandi nyinshi zanakunzwe mu Rwanda no hanze yarwo.

22:50: Ibigo n’abantu bafashije Isango Star gutegura neza ibirori byo gutanga ibihembo ku babaye indashyikirwa mu ruhando rwa muzika byashimiwe. Ubuyobozi bw’iki gitangazamakuru cyigenga gikorera ku butaka bw’u Rwanda bwabashyikirije ibyemezo by’amashimwe kubera umusanzu wabyo mu migendekere myiza y’igikorwa.

22:48: Ariel Wayz utari uhari ubwo hatangagwa igihembo cy’Umuhanzikazi mwiza w’Umwaka yageze aho byatangiwe, asangiza abitabiriye ibirori akanyamuneza ke.

Ati "Nabacitse nari mfite akazi ariko navuze nti ’reka nze hano.’ Ni igihembo cya mbere mbonye. Ndashima Isango Star. Umwaka ushize sinabonye uko mpagera ariko ntibyakunze. Nakifuje ko nabona umubyeyi wanjye [mama] wanjye ariko nzabikora. Ndabashimira urukundo mwagiye munyereka.’’

Yasoje yifuriza abakunzi b’ibihangano bye Noheli Nziza n’Umwaka Mushya Muhire wa 2023.

22:28: Ariel Wayz yagizwe Umuhanzikazi w’Umwaka. Yari ahatanye na Bwiza, Marina na Alyn Sano.

Igihembo cye cyakiriwe n’Umuramyi Aline Gahongayire uri mu bahagaze neza mu muziki uhimbaza Imana.

Aline Gahongayire ati “Ariel Wazy yari abikwiye, ni umuhanga, afite ijwi ryiza. Igihembo cye ndakimushyikiriza. Ndamukunda kandi mwarakoze kumutora.’’

Umuyobozi ushinzwe Iterambere ry’Umuco muri Minisiteri y’Urubyiruko n’Umuco, Aimable Twahirwa, mbere yo gutanga igihembo yashimye uburyo ibya Isango na Muzika Awards byateguwe neza.

Ati “Abantu bose batsinze uyu munsi ntibiri buzane urusaku, kuko abanyamakuru ba Isango Star n’abandi baricaye baratora.’’

Yasabye Abanyarwanda n’abakunzi b’umuziki, abasaba kujya bitabira ibikorwa nk’ibi kuko biwuha agaciro.

Ati “Ndashimira Isango Star. Turi mu rugendo rumwe. Mwabonye amashusho ari hano, abahanzi bari hano. Ndashimira umubyeyi wa Bwiza waje kumushyigikira. Ndahamagarira ababyeyi bose gushyigikira abana babo, ndahamagarira abaterankunga gushyigikira ibikorwa nk’ibi byiza.’’

Umuhanzikazi Ariel Wayz uri mu bamaze gukomeza izina rye mu muziki w’u Rwanda, kuri ubu afatwa nk’inkingi ya mwamba mu muziki w’abagore mu Rwanda.

Ariel Wayz wize umuziki ku ishuri rya muzika rya Nyundo, yabanje kunyura mu itsinda rya Symphony Band icyakora aza gufata icyemezo cyo kuyisezera atabyira urugendo rwa muzika ku giti cye.

Muri uyu mwaka Ariel Wayz yakoze indirimbo nyinshi zakunzwe, by’umwihariko akaba yaranakoze ibitaramo bitandukanye cyane cyane imbere mu gihugu ndetse akanyuzamo akanasimbukira mu bindi bihugu.

22:19: Element yagizwe Utunganya indirimbo z’amajwi w’umwaka “Best Producer of The Year”. Yari ahatanye na Niz Beatz, Madebeats na Santana.

Igihembo cye yagishyikirijwe na Nzahoyankuye Peace Nicodème ushinzwe Itumanaho n’Iyamamazabikorwa muri Laboratwari y’u Rwanda y’Ibimenyetso bishingiye ku Bumenyi n’Ubuhanga bikoreshwa mu Butabera, RFL (Rwanda Forensic Laboratory).

Mu izina ry’ubuyobozi bwa RFL, yijeje ko izakomeza gukorana n’abahanzi muri gahunda zitandukanye zigamije kubateza imbere.

Element wegukanye igihembo cy’umu Producer w’umwaka ku bw’akazi gakomeye yakoze. Imibare igaragaza ko uyu musore yakoze indirimbo byibuz zirindwi muri 15 z’abanyarwanda zarebwe cyane ku bakoreshereza urubuga rwa Youtube mu Rwanda.

Uyu musore yavuze ko ibanga ryamufashije kwegukana iki gihembo ubugira gatatu ari ugukora cyane.

Ati “Mparanira gukora ibirenze ibyo nakoze. Ni yo mpamvu n’izikurikiraho nzazitwara.’’

22:07: Indirimbo y’Umwaka yagizwe “Inana” ya Chris Eazzy. Yari iri mu cyiciro kimwe na “Muzadukumbura” ya Nel Ngabo na Fireman, “Micasa” ya Christopher, “Kashe” ya Element na “Why” ya The Ben na Diamond.

Inana ya Chris Eazzy iri mu ndirimbo zacuranzwe zinabyinwa bikomeye muri uyu mwaka wa 2022, ibi byatumye ihembwa nk’iyumwaka.

Ni indirimbo yakozwe na Producer Element mu gihe amashusho yayo yafashwe anatunganywa na Chris Eazy nyiri zina.

Chris Eazzy yashimye abagize uruhare mu kumufasha kugera kuri iyi ntambwe.

Ati “Biba bifite ikintu bivuze inini. Ndashima abantu bose, ndabasezeranya ko ntazabatenguha.’’

Bugingo Bony uzwi nka Junior Giti ufasha Chris Eazzy mu muziki yavuze ko indirimbo ari umushinga w’abantu benshi.

Yakomeje ati “Kuba [Element] indirimbo yarayigizemo uruhare, natwe tugomba kumushima. Ndamushima cyane. Ndashimira Element wabigizemo uruhare.”

  Umurishyo w’ingoma wakomwe mu gutangaza indirimbo y’umwaka

22:03: Mbere y’uko Jacques Muligande uzwi nka Mighty Popo, uyobora Ishuri rya Muzika rya Nyundo, atangaza indirimbo y’umwaka, yabanje gusaba abagize Cuncraz Band kuyakira binyuze mu mudiho wa Kinyarwanda w’uruvangitirane rw’ibicurangisho bya kizungu n’ingoma gakondo.

21:57: “Muzadukumbura” ya Nel Ngabo n’Umuraperi Fireman yahembwe nk’indirimbo yahuriyemo abahanzi batandukanye. Yari ihatanye na “Nyoola” ya Bruce Melodie na Eddy Kenzo, “Why” ya The Ben na Diamond na “Quality” ya Kenny Sol na Double Jay.

Muri uyu mwaka wa 2022 imwe mu ndirimbo zabiciye bigacika ni iyitwa ‘Muzadukumbura’ yahuriweho na Nel Ngabo afatanyije na Fireman, iyi ni nayo yatsindiye igihembo cya collabo y’umwaka.

Iyi ndirimbo yakozwe mu buryo bw’amajwi na Ishimwe Clement wo muri Kina Music mu gihe amashusho yayo yo yafashwe anatunganywa na Gad wegukanye igihembo cy’uhiga abandi gukora neza amashusho y’indirimbo.

Abahanzi bayihuriyemo bakimara guhabwa igihembo babanje kuyiririmbaho agace gato.

Mu ijambo rito, Fireman yashimye Uwiteka wabafashije kwegukana igihembo.

Yagize ati “Imana ihabwe icyubahiro.”

  Ibi birori byanyuze kuri Radio Isango Star na Televiziyo

Umuhango wo gutanga ibihembo bya Isango na Muzika Awards byanyuze ku bitangazamakuru bya Isango Star birimo Radio na Televiziyo. Wananyuraga kuri IGIHE n’imbuga nkoranyambaga zitandukanye.

  Igihembo n’impano byagenewe Yvan Buravan byatuwe abakunzi b’ibihangano bye

Umubyeyi wa Yvan Buravan, yavuze ko uyu munsi udasanzwe.

Ati “Ni ibyishimo gusa. Bambwira ngo nzaze hano muri ibi birori, byarantunguye, sinabitekerezaga. Amagambo meza bambwiye hano arashimishije nk’uhagarariye umuryango. Sinari nzi ko yari afitanye ubumwe na Gatare bigeze aha. Birantunguye kandi biranshimishije. Ibihembo mwampaye ndabibashimiye. Ababyeyi turarera ariko ntumenya ingaruka z’ibikorwa by’umwana muri sosiyete. Yikoreraga ibintu bye, kenshi ntiyasakuzaga. Abantu benshi baramushimira natwe bikadutera ishema. Mwakoze kumuzirikana nubwo atakiriho ariko biragaragaza ko yadusigiye inshuti.

Mu bakomeye n’abaciriritse yari umwana w’igitangaza, ibi byose byerekana ko ari umwana udutera ishema. Ibi bihembo rero nk’umuryango tubituye abamukundaga. Bumve ko na bo babigizemo uruhare.’’

Twashinze Fondation kugira ngo iteka duhore tumuzirikana. Twarabikoze ku mugaragaro ariko abatarabimenye namwe mwabimenya.

Hari imishinga yari yaratangije yo gushyigikira umuco. Mukomeze no kwirinda iriya ndwara yamuhitanye.’’

  Umuryango wa Buravan wahawe impano y’ishusho ya Buravan

Umunyabugeni Joel ni we wakoze ishusho ya Buravan yashyikirijwe umuryango we.

Nyuma yo kuyitanga, Umuyobozi Mukuru wungirije wa Isango Star, Mugabo Laetitia, yavuze ko bizeye ko bazabonana na Yvan Buravan mu bundi buzima.

Ati “Urupfu ruragatsindwa kandi ruragahera. Uyu muvandimwe yari inshuti yanjye. Babyeyi beza mwasigaranye ishusho ye, azahora mu mitima yacu n’iy’Abanyarwanda. Twizera ko umunsi umwe tuzamubona.’’

  Jean Lambert Gatare yafashwe n’ikiniga atanga igihembo cyagenewe Yvan Buravan

Mu ijambo rye, Umuyobozi wa Radio Isango Star, Gatare yagize ikiniga avuga kuri Buravan wari inshuti ye magara.

Yagize ati "Hari ibintu rimwe na rimwe abantu bafata nk’ibintu byoroshye ariko biba bigoye. Umwana witwa Yvan, njye mumenya bwa mbere, nshobora kuba ndi mu bantu bake bamenye ko ari umuhanzi.’’

Yavuze ko akimenya ko Buravan ari umuhanzi yasaye umuvandimwe we ko babonana cyane ko radio abereye umuyobozi ifite ikiganiro giteza imbere abahanzi.

Yakomeje ati "Icyanshimisha ni uko nazamubona mu bundi buzima bajya batubwira. Nakundaga uriya mwana. Babyeyi mwarakoze ku burere mwahaye uriya mwana, mwarereye igihugu, mwareze neza kandi aho yagiye ni heza. Iki gihembo ni icy’uburere bwiza.’’

  Yvan Buravan yahawe icyubahiro

Ubuyobozi bwa Isango Star bubinyujije muri Isango na Muzika Awards bwageneye nyakwigendera Yvan Buravan igihembo.

Mbere y’uko iki gihembo gishyigikirizwa umuryango we, Cuncraz Band yaririmbye indirimbo y’uyu muhanzi yise “Twaje”.

Igihembo cyahawe Yvan Buravan cyiswe “Lifetime Achievement Award’’.

Burabyo Yvan wakoreshaga amazina ya Yvan Buravan mu muziki yitabye Imana ku wa 17 Kanama 2022. Ni umwe mu bahanzi batangaga icyizere mu hazaza ha muzika Nyarwanda.

  Kabarankuru Icon yagarutse

21:27: Umuraperi Kabarankuru Icon yongeye guhabwa ikaze ku rubyiniro.

Ati “Ngiye kubaririmbira indirimbo yanjye yitwa “Amapfa”. Yubakiye ku nkuru ya Bakame n’Icyiyone.

Iyo nkuru igira iti “Amapfa yarateye Bakame irasonza maze yibuka ibyo gusuhuka. Iti “Mu Kinyaga mpafite mabukwe nahakwereye inka zanjye umunani".

21:25: Cuncraz Band yataramye biratinda. Abasore n’inkumi bagize iyi band baririmbye indirimbo zitandukanye zirimo ‘Unconditional Love” ya Sauti Sol.

  Amafoto utabonye: Abo mu ruhando rw’imyidagaduro bitabiriye itangwa ry’ibihembo bya Isango na Muzika Awards 2022

  Yadukumbuje umuziki gakondo

21:00: Dushimimana Pacifique wiga ku Nyundo yaririmbye benshi baranyurwa. Uyu musore yifashishije indirimbo yitwa “Amahamba” yacuranzwe hifashishijwe ibicurangisho bya kizungu ariko bitanga injyana gakondo iryoheye ugutwi.

20:52: Dj Sonia yacuranze indirimbo zitandukanye zirimo iz’abahanzi Nyarwanda mbere yo guha rugari abahanzi biga mu Ishuri rya Muzika ku Nyundo bibumbiye muri Cuncraz Band.

  Israel Mbonyi yegukanye igihembo cy’umuramyi mwiza ku nshuro ya gatatu

20:45: Israel Mbonyi yegukanye igihembo cy’umuhanzi mwiza mu bahimbaza Imana. Ni ku nshuro ya gatatu yikurikiranya agitwaye.

Mu kanyamuneza kenshi, yagize ati “Ndanezerewe kandi ndashima Imana.’’

“Hari ukuntu Imana itanga igikundiro, ubuntu bwayo bukakubaho. Habamo n’ubwenge bwo gukora cyane, ugakora ibikwiye. Ndashima ko umuziki uhimbaza Imana, utera imbere kandi iyo mpinduramatwara nayigizemo uruhare.’’

Abajijwe inyungu ziri mu gukorera Imana ku bakiri bato. Yagize ati “Gukorera Imana uri umusore, kera batwigishaga ko gukorera Imana ari ibintu by’abaturage. Wakorera Imana kandi ugakomeza usa neza cyane.’’

Yahise atumira abitabiriye ibi birori kuzitabira Igitaramo afite ku wa 25 Ukuboza 2022. Yahise abakumbuza ibihe byiza bazahagirira abinyujije mu kubaririmbira agace gato k’indirimbo ye “Yaratwimanye”.

Israel Mbonyi uri mu bahanzi bakomeye mu muziki wo kuramya no guhimbaza Imana yegukanye igihembo nyuma y’uko muri uyu mwaka yasohoye album yise ‘Icyambu’ ari no gukorera ibitaramo byo kuyimenyekanisha.

Uretse igitaramo ateganya gukora mu mpera z’uyu mwaka kikaza tariki 25 Ukuboza 2022, akubutse muri Canada mu bitaramo binyuranye ndetse akaba anateganya kwerekeza muri Australia muri Mutarama 2023.

20:38: Nshimiyimana Gad yahembwe nka “Best Video Director” w’umwaka. Yari ahanganye na Flery Nkotanyi, Eazy Cuts na Isimbi Nailla.

Yashyikirijwe igihembo cye na Producer Ishimwe Clement.

Ati “Ndumva meze neza cyane. Nshimiye Isango Star kuba yarazirikanye imirimo yacu kuva mu kwa mbere. Nshimiye abahanzi bose twakoranye. Murakoze.’’

Ukuboko kwa Gad guheruka guhesha umugisha indirimbo Jaja ya Kivumbi King na Juno Kizigenza.

Nshimiyimana Gad w’imyaka 28 uvuka mu Burengerazuba bw’u Rwanda mu Karere ka Rusizi, yatangiye kumenyekana atunganya amashusho y’ubukwe ndetse n’ibitaramo.

Ubunararibonye yari amaze kugira mu gufata no gutanganya amashusho anyuranye bwatumye yiyemeza kwinjira mu gutunganya amashusho y’indirimbo z’abahanzi.

Gad ni izina ryazamutse cyane mu ruganda rw’imyidagaduro mu 2022 mu mashusho y’indirimbo ‘Mutuale’ ya Bruce Melodie na Nel Ngabo yatumye atangira kubengukwa n’abandi bahanzi.

Uretse iyi ndirimbo Gad yakoze amashusho y’izindi zakunzwe nka ‘Good Luck’ ya Ariel Wayz, ‘Akinyuma’ ya Bruce Melody, ‘Tobora’ ya Knowless, n’izindi.

  Impanuro ku babyeyi

Umubyeyi wa Bwiza yasabye abandi babyeyi gushyigikira abana babo mu gihe bagaragaza impano bifitemo.

Yakomeje ati “Ibihe turimo biratubwira gukora dukoresheje imbaraga zacu zose, bityo tukabasha kwiteza imbere. Niba impano y’umwana igaragaye mureke tuyishyigikire, tubereke urukundo n’inama zihoraho.’’

20:30: Umuhanzi mushya w’umwaka “Best New Artist of the Year” yagizwe Bwiza. Yari ahatanye na Afrique, Jowest na Yampano.

Igihembo cye cyafashwe n’umubyeyi we kuko uyu muhanzikazi yagiye mu Karere ka Rusizi aho afite igitaramo. Yagishyikirijwe na Gatarayiha Alpha uyobora Alpha Entertainment.

Umubyeyi we yashimiye Isango. Ati “Duhagaze hano ku bwa Bwiza. Yambwiye ngo nshimire Isango, itangazamakuru muri rusange. Kuba mpagaze hano, nshimiye Bwiza kuko agira umuhate mu kazi. Ndashimira KIKAC Music n’abakunzi be bose.’’

Bwiza wegukanye igihembo cy’umuhanzikazi mushya mu mwaka wa 2022, yatangiye umuziki mu 2021 nyuma yo gutsinda Irushanwa ‘The Next Diva’ ryateguwe na KIKAC Music.

Uyu mukobwa mu mwaka umwe amaze mu muziki amaze gusohora indirimbo zitari nke ndetse anamaze gukorana nabahanzi banyuranye barimo n’abo hanze y’u Rwanda.

Ni umuhanzikazi waririmbye mu bitaramo bikomeye mu Rwanda ariko akaba yaranagaragaye ku ruhando mpuzamahanga aho yataramiye muri Uganda inshuro zirenze imwe.

Mu mwaka umwe amaze yinjiye mu muziki w’u Rwanda, uwavuga ko Bwiza amaze gukomeza izina rye ntiyaba ari kure y’ukuri.

20:27: Umwanya wari utegerejwe na benshi urageze. Hagiye gutangira gutangazwa abahanzi bahize abandi mu byiciro bitandukanye bihataniwe. Shimwayezu Cedrick na Kayitesi Yvonne ni bo bagiye gutangaza abatsinze.

  Umuyobozi Mukuru wungirije wa Isango Star yashimiye abagize uruhare mu gutegura Isango na Muzika Awards

Umuyobozi Mukuru wungirije wa Isango Star, Mugabo Laetitia, yashimiye abahanzi bemeye kwinjira muri iri rushanwa n’abatanze umusanzu wabo mu mitegurire yose.

Ati “Uyu ni umunsi utagira uko usa. Ku nshuro ya gatatu twongeye guhura dutanga ibihembo bya Isango na Muzika, ni iby’agaciro mu ruhando rw’umuziki Nyarwanda.’’

Yavuze ko banyuze n’abahaye agaciro uyu munsi. Ati "Mushimire abemeye ko amatora abaho kuri uyu munsi. Duhaye ikaze abahanzi badahwema kutuba hafi, abakunzi b’umuziki Nyarwanda n’inshuti za Isango Star aho bari hose, turabashimira. Tubahaye ikaze muri iki gikorwa cyo gushimira abahanzi bitwaye neza muri uyu mwaka wa 2022.’’

Yavuze ko Isango Star ari igitangazamakuru cyifuriza Abanyarwanda iterambere ndetse n’abahanzi batasigaye.

Ati “Ntangije uyu muhango ku mugaragaro kandi nkomeza kubifuriza kugubwa neza. Umugoroba mwiza.’’

  Rap ishyuhije abari mu birori

20:01: Kabarankuru Icon yahinduye ibintu. Uyu musore yaserutse afite imbaduko ifatika abaza abitabiriye ibi birori niba “bafite imbaraga”.

Yakomeje ati “Tugiye kubikora.”

Uyu muraperi uririmba Injyana ya Hip hop ya kera yishimiwe cyane kubera uburyo asukiranya amagambo mu gutanga ubutumwa yifuza kugeza ku bamwumva.

19:50: Umunyempano wiyita Umwami Daniel we yaserukanye umwihariko. Mu gihe bagenzi be basubiragamo indirimbo z’abandi bahanzi, we yaririmbye iye yise “Isimbi”.

Ni indirimbo yubakiye ku magambo y’urukundo, aho umwe aba abwira mugenzi we ko yamusigiye irungu.

Abageze mu byicaro bwa mbere bafite akanyamuneza

  Umuziki uri kugaburwa uryoheye ugutwi

Cuncraz Band igizwe n’abanyeshuri bo ku Nyundo bari gucuranga umuziki uyunguruye kandi uryoheye ugutwi.

Bataramye mu ndirimbo zitandukanye zirimo nka “Versace on the Floor” y’Umuhanzi Bruno Mars.

19:28: Cuncraz Band igizwe n’abanyeshuri biga umuziki ku Nyundo riherereye mu Karere ka Muhanga, yakiriwe ku rubyiniro itangira gususurutsa abageze ahari kubera ibirori bya Isango na Muzika Awards.

19:18: Abanyamakuru ba Isango Star Shimwayezu Cedrick na mugenzi we Kayitesi Yvonne uzwi nka Tessy ni bo bayoboye iki gikorwa.

  Imyiteguro ya nyuma yasojwe!

Mu cyumba cya Park Inn Hotel ahabera ibirori byo guhemba abahize abandi muri Isango na Muzika Awards hateguye neza. Umwanya uwo ari wo wose ibirori nyirizina biratangira.

18:30: Abahanzi n’abandi bakurikiranira hafi uruganda rw’imyidagaduro mu Rwanda batangiye kunyura kuri Tapis itukura. Buri wese mbere yo kwinjira ahabereye ibirori ari kubanza gufatwa ifoto y’urwibutso.

Abakobwa bashinguye bari ku muryango batanga ikaze ku bitabiriye ibi birori bya Isango na Muzika Awards
Buri wese mu bitabiriye ibi birori ari kunyura ku itapi itukura
N'abanyamahanga b'inshuti za Isango Star bitabiriye ibi birori
Umunyamideli Umufite Anipha akaba n'Umunyamakuru wa Isango Star ni uku yaserutse
Umunyamakuru wa IGIHE, Nsengiyumva Emmanuel, anyura ku itapi itukura
Mugunga Christian ukora umuziki gakondo na we yitabiriye ibi birori
Umunyamakuru Umutesi Scovia afata agafoto k'urwibutso

  Imyiteguro ya nyuma yasojwe!

Amaso n’imitima by’abakunzi b’umuziki mu Rwanda babyerekeje muri Park Inn by Radisson Hotel i Kigali ahatangiwe ibihembo bya Isango na Muzika Awards.

Ibi bihembo bitegurwa na Radio Isango Star iri mu zatanze umusanzu ufatika mu guteza imbere imyidagaduro y’u Rwanda kuba mu myaka yo hambere. Bihabwa abahanzi n’abo mu ruganda rw’imyidagaduro bahize abandi mu mwaka bitewe n’ibikorwa bagaragaje.

Muri uyu mwaka, ibi bihembo byatanzwe mu byiciro umunani. Abahanzi barimo Bruce Melodie, Kenny Sol, Bwiza, Christopher, Nel Ngabo, Fireman, The Ben bari mu bahatanye mu byiciro bibiri.

Ni ku nshuro ya gatatu ibi bihembo byatanzwe kuko byatangiye gutegurwa mu mwaka wa 2020.

Urutonde rw’abari bahataniye ibihembo bya Isango na Muzika Awards 2022:

  Icyiciro cy’abahanzi bashya mu muziki (Best New Artist): Bwiza, Afrique, Jowest na Yampano.

  Icyiciro cy’abahanzikazi bahize abandi (Best Female Artist): Bwiza, Marina, Alyn Sano na Ariel Wayz.

  Icyiciro cy’abahanzi b’abagabo bahize abandi (Best Male Artist): Bruce Melodie, Kenny Sol, Juno Kizigenza na Christopher.

  Icyiciro cy’indirimbo ihuriweho nziza (Best collabo): Nyoola ya Bruce Melodie na Eddy Kenzo, Muzadukumbura ya Nel Ngabo na Fireman, Why ya The Ben na Diamond na Quality ya Kenny Sol na Double Jay.

  Icyiciro cy’abatunganya amashusho y’indirimbo bahize abandi (Best Video Director): Gad, Flery Nkotanyi, Eazy Cuts na Isimbi Nailla.

  Icyiciro cy’abatunganya indirimbo mu buryo bw’amajwi (Best Audio Producers): Niz Beatz, Element, Madebeats na Santana.

  Icyiciro cy’indirimbo nziza z’umwaka (Best song of the Year): Inana ya Chris Eazy, Muzadukumbura ya Nel Ngabo na Fireman, Micasa ya Christopher, Kashe ya Element na Why ya The Ben na Diamond.

  Icyiciro cy’abahanzi bakora umuziki wo kuramya no guhimbaza Imana bahize abandi (Best Gospel Artists): Israel Mbonyi, Dorcas na Vestine, James na Daniella hamwe na Bosco Nshuti.

Ibigenderwaho mu guhemba

Mu guhitamo abahanzi n’abandi bitwaye neza hakorwa amatora aba hifashishijwe ikoranabuhanga ndetse n’akanama nkemurampaka kagena amajwi yako.

Amatora akorwa hifashishijwe ubutumwa bugufi (SMS) ndetse hakiyongeraho amajwi y’abagize akanama nkemurampaka ndetse n’ayabanyamakuru b’imyidagaduro mu Rwanda.

Amafoto: Rwema Derrick na Isango Star


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .