00:00:00 IGIHE NETWORK KN KINYARWANDA EN ENGLISH FR FRANCAIS

Abakobwa 9 babonye itike yo guhagararira Amajyaruguru muri Miss Rwanda 2022 (Amafoto)

Yanditswe na Nsengiyumva Emmy
Kuya 29 January 2022 saa 12:13
Yasuwe :

Abakobwa icyenda ni bo batoranyijwe guhagararira Intara y’Amajyaruguru mu gushaka abazavamo uzambikwa ikamba rya Nyampinga w’u Rwanda 2022.

Ijonjora ry’ibanze rya Miss Rwanda ryatangiriye mu Karere ka Musanze mu Majyaruguru y’u Rwanda. Ni igikorwa cyabereye muri La Palme Hotel kuri uyu wa Gatandatu, tariki 29 Mutarama 2022.

Muri iyi ntara ibarizwamo imisozi miremire y’Ibirunga hiyandikishirije abakobwa 51, muri bo 43 ni bo bashoboye kunyura imbere y’Akanama Nkemurampaka; abagera ku icyenda ni bo batoranyijwe nyuma yo gushimwa ubwenge, umuco n’ubwiza.

Miss Rwanda iri kuba ku nshuro ya 12, uhereye nyuma ya Jenoside yakorewe Abatutsi mu 1994. Intara y’Amajyaruguru ifite umwihariko kuko abakobwa 10 bayihagarariye begukanye amakamba atandukanye.

Nyuma yo guhitamo abakobwa icyenda bahagarariye Amajyaruguru, biteganyijwe ko ijonjora ry’ibanze ryo guhitamo abakobwa bashaka ikamba rya Miss Rwanda rizakomereza mu Karere ka Rubavu, ku wa 30 Mutarama 2022.

Aba bakobwa b’uburanga bahataniye ikamba ry’uzasimbura Miss Ingabire Grace ufite irya 2021.

UKO IJONJORA RY’IBANZE RYAGENZE I MUSANZE:

Urutonde rw’ababonye itike yo guhagararira Amajyaruguru muri Miss Rwanda 2022

Nyuma yo gutangazwa nk'abatoranyijwe mu bagomba gukomeza mu kindi cyiciro bari bafite akanyamuneza
Abakobwa icyenda ni bo babonye itike yo guhagararira Intara y'Amajyaruguru muri Miss Rwanda 2022

  Ishimwe Muhayimpundu Adelaide [No 22]

  Mutavu Marie Leslie [No 37]

  Nshuti Vanessa [No 4]

  Bagiriteto Aliane [No 8]

  Uwase Mignone [No 1]

  Umutoniwase Dianah [No 10]

  Cyiza Raissa [No 33]

  Kaberuka Emmanuella [No 30]

  Igiraneza Mugisha Ghislaine [No 40]

18:39: Abanyamakuru Abera Martina na Kalisa Sam ba RBA bongeye guhabwa umwanya ngo batangire gusoma urutonde rw’abatsinze nyuma y’amanota yateranyijwe n’abagize akanama nkemurampaka.

Abakobwa bazahagararira Amajyaruguru muri Miss Rwanda 2022 bagiye kumenyekana

18:00: Akanama Nkemurampaka kagizwe na Umurerwa Evelyne, Mutesi Jolly na Munyaneza James kabanje kwiherera aho kagiye guteranya amanota no guhitamo abakobwa bazahagararira Amajyaruguru muri Miss Rwanda 2022.

17:53: Ishimwe Jaspe [No 43] ni we mukobwa wa nyuma wanyuze imbere y’Akanama Nkemurampaka.

Uyu mukobwa yavuze ko afite umushinga wo guteza imbere ubukerarugendo bw’imbere mu gihugu.

Nyuma yo gusobanurira abagize Akanama Nkemurampaka umushinga we, Ishimwe yahawe ’YES’ ebyiri na ’NO’ imwe.

17:48: Uwonkunda Nicole [No 42] ni we wabanjirije uwa nyuma gutambuka imbere y’akanama nkemurampaka ka Miss Rwanda 2022.

Uyu mukobwa wiga Ikoranabuhanga mu mwaka wa Gatatu muri UNILAK, afite umushinga wo guteza imbere ubukerarugendo yifashishije ikoranabuhanga.

Uwonkunda yavuze ko yifashishije ibyo yize yakora uburyo bw’ikoranabuhanga bwajya bufasha ba mukerarugendo gusura ibyiza nyaburanga by’u Rwanda bitagombye ko baza mu Rwanda.

Ubu buryo uyu mukobwa avuga bwafasha u Rwanda kongera amafaranga yinjizwa n’igihugu kubera ubukerarugendo.

Nyuma yo kumva umushinga we, uyu mukobwa yahawe ’YES’ ebyiri na ’NO’ imwe.

17:42: Akimana Latifah [No 41] yari ageze imbere y’Akanama Nkemurampaka ka Miss Rwanda 2022.

Uyu mukobwa yabanje kubazwa inkuru yamushimishije mu makuru y’ubuzima busanzwe bw’igihugu, yasubije ko ari ifungurwa ry’umupaka wa Gatuna uhuza Uganda n’u Rwanda.

Yavuze ko bigiye kugira ingaruka nziza mu buhahirane bw’ibihugu byombi.

Akimana afite umushinga wo gukangurira urubyiruko kubyaza umusaruro impano zarwo.

Uyu mushinga we yumva yawushyira mu ngiro yifashishije guhimba amarushanwa y’abanyempano kuva ku rwego rw’Umudugudu kugeza ku rw’Igihugu.

Aya marushanwa uretse kumurika impano z’urubyiruko, Akimana avuga ko azajya anatangiramo ubutumwa bujyanye n’ubukangurambaga buzajya buba bugezweho.

Nyuma yo gusobanura umushinga we neza, yahawe ’YES’ ebyiri na ’No’ imwe n’abagize Akanama Nkemurampaka.

17:37: Igiraneza Mugisha Ghislaine [No 40] yatambutse imbere y’Akanama Nkemurampaka ka Miss Rwanda 2022.

Uyu mukobwa yavuze ko afite umushinga wo kurwanya agahinda gakabije gatera indwara zo mu mutwe.

Nyuma yo kwemeza Akanama Nkemurampaka yahawe yahawe ’YES’ eshatu.

17:29: Irakoze Solange [No 39] yageze imbere y’Akanama Nkemurampaka. Yavuze ko atewe ishema no kuba Umunyarwandakazi ariko ugira ubuntu.

Yasobanuye ko ibi byatumye atekereza umushinga wo gufasha abana bacikirije amashuri bakiri bato kubera ubukene n’izindi mpamvu zitandukanye. Uyu mukobwa wabashije kwemeza akanama nkemurampaka yahawe ’YES’ eshatu.

17:25: Nyinawabeza Djamila [No 38] yageze imbere y’Akanama Nkemurampaka ka Miss Rwanda.

Nyinawabeza yavuze ko aramutse abaye Nyampinga w’u Rwanda yashyira mu ngiro impanuro Perezida wa Repubulika yigeze guha Abanyarwanda.

Ati “Perezida wa Repubulika yigeze kuvuga ati ’nuramuka ubonye amahirwe mu buzima uzayafate uyirukankane uyakoreshe’.”

Uyu mukobwa avuga ko mu gihe yaba atsindiye ikamba, ayo mahirwe yaba abonye yakora uko ashoboye ngo ayabyaze umusaruro.

Umushinga wa Nyinawabeza ushingiye ku kwigisha urubyiruko kwihangira umurimo.

Nyinawabeza wabashije kwemeza abagize akanama nkemurampaka yahawe ’YES’ eshatu.

17:20: Mutavu Manzi Leslie [No 37] yanyuze imbere y’Akanama Nkemurampaka.

Uyu mukobwa afite umushinga wo gushyigikira no kwigisha abakiri bato umuco w’u Rwanda.

Yavuze ko yakangurira buri karere kubungabunga umuco wako cyane ko buri karere gafite imico kihariye kandi iyi ikaba yakurura ba mukerarugendo baba bifuza kwiga kurushaho.

Nyuma yo gusobanura umushinga we, Mutavu yahawe ’YES’ eshatu n’abagize akanama nkemurampaka.

17:16: Nirere Fortunée [No 36] yageze imbere y’akanama nkemurampaka ka Miss Rwanda 2022. Uyu mukobwa afite umushinga wo gushyigikira abana b’abakobwa babyariye mu rugo binyuze mu bukangurambaga yakora ahereye mu nzego z’ibanze.

Nyuma yo gusobanurira umushinga we abagize akanama nkemurampaka, uyu mukobwa yahawe ’YES’ eshatu.

17:12: Muhoza Francine [No 35] yakandagiye imbere y’Akanama Nkemurampaka ka Miss Rwanda 2022.

Uyu mukobwa yabajijwe impano afite, ababwira ko azi kubyina bya Kinyarwanda, aha yahise asabwa kubereka ubuhanga abifiteho.

Muhoza yavuze ko afite umushinga wo kurwanya imirire mibi mu bana bakiri bato.

Uyu mukobwa nyuma yo kuganira n’abagize akanama nkemurampaka ku mushinga we yahawe ’YES’ eshatu.

17:03: Uwanyuze Eunice [No 34] yageze imbere y’Akanama Nkemurampaka ka Miss Rwanda 2022.

Uyu mukobwa afite umushinga wo gusubiza ku ishuri abana baritaye abinyujije mu bukangurambaga bwo mu miryango no kubashakira imiryango yabafasha.

Uwanyuze yahawe ’NO’ ebyiri na ’YES’ imwe.

17:00: Cyiza Raissa [No 33] yahingutse imbere y’Akanama Nkemurampaka ka Miss Rwanda 2022.

Uyu mukobwa afite umushinga wo gukangurira Abanyarwanda kwirinda indwara ya kanseri ikomeje kwivugana abatari bake ku Isi.

Uyu akaba yawushyira mu ngiro abinyujije mu bukangurambaga yafatanyamo n’inzego zinyuranye yaba iza Leta n’itangazamakuru.

Cyiza nyuma yo kwemeza abagize akanama nkemurampaka, yahawe ’YES’ eshatu.

16:56: Iradukunda Bonnette Olivia [No 32] yavuze ko afite umushinga wo kurwanya ibiyobyabwenge no guhashya kwiheba gukabije mu rubyiruko cyane ko ari rwo Rwanda rw’ahazaza.

Uyu mukobwa yahishuriye Akanama Nkemurampaka ko ari umwe mu rubyiruko rw’abakorerabushake biyemeje gufasha Leta muri gahunda yo kurwanya Covid-19.

Iradukunda yaganiriye neza n’abagize Akanama Nkemurampaka bituma ahabwa ’YES’ eshatu.

16:51: Umutoniwase Phiona [No 31] yatambutse imbere y’Akanama Nkemurampaka ka Miss Rwanda 2022. Yavuze ko afite umushinga wo gufasha bagenzi be bize ubuhinzi kubona akazi abinyujije mu mushinga afite wo guhinga ibihumyo.

Uyu mukobwa utabashije gusobanurira neza umushinga we Abagize Akanama Nkemurampaka, yahawe ’NO’ eshatu.

16:45: Kaberuka Emmanuella [No 30] yatambutse imbere y’Akanama Nkemurampaka ka Miss Rwanda 2022. Yavuze ko afite umushinga wo gushyiraho ikigega kizajya gikusanyirizwamo ubufasha bwo gufasha abakiri bato bagizweho ingaruka na Covid-19, kikaba cyanatera inkunga abafite imishinga myiza kurusha abandi.

Nyuma yo kumva ibisobanuro bye, abagize Akanama Nkemurampaka bahaye Kaberuka ’YES’ eshatu, gusa asabwa gutegura neza umushinga we.

16:40: Iradukunda Hajat [No 29] yatambutse imbere y’Akanama Nkemurampaka. Uyu mukobwa yavuze ko afite umushinga wo kwigisha abakiri bato kwinjira mu bworozi bw’inkwavu mu rwego rwo kubashishikariza kwizigama.

Abagize akanama nkemurampaka bose bahaye Iradukunda ’NO’.

16:34: Ishimwe Grace [No 28] yatambutse imbere y’Akanama Nkemurampaka ka Miss Rwanda 2022. Uyu mukobwa abajijwe umwihariko yumva arusha abo bahatanye watuma aba Nyampinga w’u Rwanda, yasubije ko abarusha ingingo eshatu ngenderwaho; Ubwiza Umuco n’Ubwenge byiyongera ku mushinga we ‘Ijya kurisha ihera ku rugo’.

Uyu mushinga yavuze ko ari uwo gukangurira Abanyarwanda by’umwihariko urubyiruko kwitabira ubukerarugendo bw’imbere mu gihugu.

Ishimwe yahawe ’YES’ ebyiri na ’NO’ imwe n’abagize akanama nkemurampaka.

16:31: Mugabekazi Gloria [No 27] nib wo yanyuze imbere y’Akanama Nkemurampaka. Uyu mukobwa yavuze ko afite umushinga wo kurwanya inda zitateganyijwe mu bangavu, zikunze guterwa n’uko abana b’abakobwa baba badafite amakuru ahagije ku buzima bw’imyororokere.

Yavuze ko yabinyuza mu bukangurambaga yakora mu miryango aho yifuza ko ibi biganiro byajya bitangirira.

Mugabekazi wanyuranye umucyo imbere y’abagize akanama nkemurampaka yahawe ‘YES’ eshatu.

16:27: Uwase Marvine [No 26] yavuze ko urubyiruko rwugarije n’ibiyobyabwenge n’inda zitateguwe.

Mu gukemura ibi bibazo, Uwase yavuze ko yakora ubukangurambaga mu rubyiruko ndetse akarukangurira kwirinda ibyo bibazo. Uyu mukobwa yahawe "NO" eshatu n’abagize akanama nkemurampaka.

16:22: Ikirezi Naila [No 25] yabajijwe icyo yamarira Intara y’Amajyaruguru aramutse abaye Nyampinga w’u Rwanda, avuga ko yakwiyambaza umushinga we wo guhinga inkeri kuko zishobora kwera neza by’umwihariko muri iyi Ntara.

Yavuze ko yahisemo uyu mushinga kuko inkeri zigira Vitamin A bityo zikaba zafasha mu kurwanya imirire mibi.

Nyuma yo gusobanura umushinga we, Ikirezi yahawe ’NO’ eshatu n’abagize akanama nkemurampaka katanyuzwe n’ibisobanuro bye.

16:19: Kaneza Delphine [No 24] yavuze ko afite umushinga wo kurwanya ikibazo cy’igwingira mu bana yifashishije ibihumyo.

Ubwo Kaneza yari abajijwe Umuyobozi w’Intara y’Amajyaruguru byamugoye kumusubiza nubwo ari ho ari kwiyamamariza. Uyu mukobwa yahawe ‘NO’ ebyiri na ‘YES’ imwe.

16:15: Nyinawumuntu Doreen [No 23] yavuze afite umushinga wo gukangurira urubyiruko gukoresha ikoranabuhanga mu buzima bwarwo bwa buri munsi.

Nyuma yo kumva ibisubizo bye akanama nkemurampaka kamuhaye ’NO’ eshatu.

16:11: Ishimwe Muhayimpundu Adelaide [No 22] yavuze ko abaye Nyampinga w’u Rwanda yafasha abari n’abategarugori guteza imbere umupira w’amaguru.

Ibi yabitewe n’uko abona muri sosiyete y’u Rwanda abakina ruhago badahabwa agaciro cyangwa binagire icyo bibamarira mu buryo bw’amikoro.

Nyuma yo kumva umushinga we akawuganira n’abagize akanama nkemurampaka, bamuhaye ‘YES’ eshatu.

16:06: Mutesi Sandra [No 21] yatambutse imbere y’Akanama Nkemurampaka. Uyu mukobwa yavuze ko afite umushinga wo gukangurira abana b’abakobwa kwihangira umurimo kugira ngo barusheho kwirinda kugwa mu bishuko.

Nyuma yo kuganira n’abagize akanama nkemurampaka ku mushinga we, yahawe ‘YES’ imwe na ‘NO’ ebyiri.

15:59: Uwishaka Malaika Vanessa [No 20] yavuze ko afite umushinga wo gukangurira urubyiruko n’Abanyarwanda muri rusange gukemura ikibazo cya gatanya gihangayikishije mu muryango Nyarwanda.

Uwishaka avuga ko yakangurira inzego zibishinzwe gushyira inyigisho z’imbonezamubano mu mashuri, zigatangira kwigishwa abakiri bato bityo bagakurana imyumvire yo guharanira kugira ingo nziza.

Uyu mukobwa yahawe YES eshatu n’abagize akanama nkemurampaka.

15:52: Umuraza Vanessa [No 19] afite umushinga wo kuzana mu Rwanda uruganda rukora amacupa ya Gaz mu rwego rwo gukomeza kurushaho kurinda ibidukikije.

Nubwo igiciro cya Gaz kiri kumanuka n’Abanyarwanda bashishikarizwa kuyikoresha, Umuraza avuga ko mu gihe u Rwanda rwaba rufite amacupa ya Gaz akorerwa mu Rwanda byagabanya igiciro cya Gaz ndetse bigatanga n’akazi mu rubyiruko.

Nyuma yo gusobanura umushinga we bagize Akanama Nkemurampaka ’NO’ eshatu.

15:44: Umubyeyi Olga [No 18] yatambutse imbere y’Akanama Nkemurampaka ka Miss Rwanda 2022.

Uyu mukobwa yavuze ko afite umushinga wo gushishikariza abagabo kuboneza urubyaro aho kubiharira abagore.

Umubyeyi yagaragaje ko kuboneza urubyaro ku bagabo nta ngaruka bibagiraho.

Yagize ati “Erega umugabo waboneje urubyaro nta ngaruka na nke bimugiraho, aba ashobora no gukomeza gutera akabariro!”

Ibi uyu mukobwa yabihuje no kuba abagore baboneza urubyaro bajya bahura n’ingaruka zirimo n’uburwayi.

Icyakora Umubyeyi yavuze ko nubwo yashishikariza abagabo kwitabira iyi gahunda bitakuraho ko n’abagore bakwiye kwitabira.

Uyu mukobwa wasekeje benshi mu cyumba cyaberagamo iri rushanwa yahawe ‘YES’ eshatu.

15:36: Ndisanze Marine [No 17] yageze imbere y’Akanama Nkemurampaka ka Miss Rwanda 2022. Uyu mukobwa yavuze ko ashishikajwe no gukangurira urubyiruko rugenzi rwe by’umwihariko abana b’abakobwa kwirinda ibishuko bibashora mu ngeso mbi zituma bashobora gutwara inda zitateguwe.

Uretse ibi ariko Ndisanze yanakomoje ku mushinga we wo gushishikariza urubyiruko guharanira uburenganzira bw’abana bo ku muhanda.

Yavuze ko abaye Nyampinga w’u Rwanda yaharanira gukura aba bana ku muhanda, akabasubiza mu miryango.

Nyuma yo gusobanura umushinga we, Ndisanze yahawe ’NO’ ebyiri na ’YES’ imwe yahawe na Umurerwa Evelyne.

15:29: Iliza Alcine [No 16] yageze imbere y’akanama nkemurampaka. Uyu mukobwa yavuze ko aramutse agize amahirwe yo kuba Nyampinga w’u Rwanda byamufasha gushyira mu bikorwa umushinga we, bikanamufasha guhagararira no kuvugira urubyiruko rugenzi rwe.

Uyu mukobwa yitabiriye irushanwa rya Miss Rwanda afite umushinga wo gushaka ubufasha bw’imishinga y’urubyiruko mu rwego rwo kugira ngo babashe kwiteza imbere.

Nyuma yo gusobanura umushinga we Akanama Nkemurampaka kakawumva neza, yahawe ’YES’ eshatu.

15:21: Igihozo Ntaganira Divine [No 15] yatambutse imbere y’Akanama Nkemurampaka abanza kukibwira mbere yo kubazwa umushinga yitwaje muri iri rushanwa.

Uyu mukobwa uturuka mu Karere ka Nyarugenge, yavuze ko yahisemo kwiyamamariza mu ka Musanze kuko ariho hagombaga kubanza kuberamo iri rushanwa.

Igihozo yavuze ko yifuza gushishikariza Abanyarwanda muri rusange umuco wo kwizigamira.

Nyuma yo gusobanurira Akanama Nkemurampaka umushinga we, Ntaganira yahawe ‘YES’ eshatu.

15:16: Uwase Agnes [No 14] yageze imbere y’Akanama Nkemurampaka. Yavuze ko agize amahirwe akaba Nyampinga w’u Rwanda yashyira mu bikorwa umushinga wo gufasha abana bavuka mu miryango itishoboye.

Yasobanuye ko yabikora binyuze mu buvugizi yakorera mu nzego zose n’imiryango itandukanye yabafasha.

Uyu mukobwa yahawe ’NO’ eshatu n’abagize akanama nkemurampaka.

15:07: Muzirankoni Cynthia [No 13] yatambutse imbere y’Akanama Nkemurampaka ka Miss Rwanda.

Umushinga we ugamije gushishikariza Abanyarwanda cyane cyane urubyiruko, kwitabira kwiga amashuri y’ubumenyingiro kugira ngo babashe kwihangira imirimo aho gutegereza guhabwa akazi.

Nyuma yo gusobanurira umushinga we abagize Akanama Nkemurampaka na bo bakamutega amatwi, Muzirankoni yahawe ‘YES’ imwe ya Munyaneza James mu gihe Jolly Mutesi na Umurerwa Evelyne bamuhaye ‘NO’.

15:01: Igihozo Ange [No 12] yatambutse imbere y’akanama nkemurampaka. Uyu mukobwa wari wiyemeje gusubiza mu Kinyarwanda, yavuze ko afite umushinga wo kuzamura abari n’abategarugori bo mu cyaro bifashishije gukora ibikoresho bya ‘Made in Rwanda’.

Igihozo yavuze ko mu gihe yaba Nyampinga w’u Rwanda yagerageza kwegera aba bagore akabaha amahugurwa akanabashyiriraho urubuga rwo kugurishirizaho ibikorwa byabo no kubimenyekanisha.

Uyu mukobwa yahawe ’YES’ eshatu n’abagize Akanama Nkemurampaka.

14:53: Tumukunde Lilliane [No 11] yavuze ko afite umushinga wo kubungabunga urusobe rw’ibinyabuzima n’umutungo kamere wo mu mazi mu gihugu.

14:48: Umutoniwase Diana [No 10] yavuze ko agize amahirwe yo kwegukana ikamba, yafasha abagore kwitinyuka birushijeho.

Iki gitekerezo cye avuga ko yagishyira mu bikorwa abinyujije mu bukangurambaga no mu itangazamakuru ryaba rimeze nk’abafatanyabikorwa be.

Uyu mukobwa anafite umushinga wo kurwanya ihohoterwa rikorerwa abana muri rusange.

Aha akaba yakwifashisha ubukangurambaga ku bana kugira ngo uwahuye n’ihohoterwa abashe kurivuga ndetse n’ababyeyi babo kugira ngo abafite abana bahuye naryo babashe kubimenyesha inzego.

Uyu mukobwa yahawe ‘YES’ eshatu n’abagize Akanama Nkemurampaka.

14:41: Umubyeyi Natacha [No 9] yavuze ko ari kwiga amategeko muri Kaminuza ya Kigali, akaba ahatanira ikamba rya Miss Rwanda 2022 ryazamufasha kwigisha urubyiruko ibijyanye n’imiyoborere.

Iki gitekerezo yavuze ko kigamije kujijura urubyiruko ku bijyanye n’imiyoborere. Avuga ko ibi byafasha urubyiruko kubaha inzego no kuzifasha gushyira mu bikorwa ibyemezo biba byafashwe na zo.

Umubyeyi yahawe ’YES’ eshatu n’abagize akanama nkemurampaka bamusaba kugerageza kugabanya ubwoba mu gihe yaba agize amahirwe yo kurenga iki cyiciro kugira ngo mu kizakurikiraho azahanyurane umucyo.

14:34: Bagiriteto Ariane [No 8] yabwiye Akanama Nkemurampaka ko afite umushinga wo guteza imbere ubukerarugendo bw’imbere mu gihugu mu rwego rwo kumenyekanisha u Rwanda no kuzamura ubukungu bwarwo.

Bagiriteto nyuma yo gusobanura umushinga we, yahawe ‘YES’ eshatu n’abagize akanama nkemurampaka.

14:30: Uwamariya Jacqueline [No 7] yatambutse imbere y’akanama nkemurampaka.

Uwamariya yarangije amashuri yisumbuye mu Ishuri ry’Ubuhanzi rya Nyundo aho yize Ubugeni.

Afite umushinga wo kurengera ibidukikije binyuze mu gushishikariza urubyiruko kumva neza iyi gahunda ya Leta n’Isi muri rusange.

Uyu mukobwa yahawe ’NO’ eshatu n’abagize akanama nkemurampaka.

14:24: Mutoni Denyse [No 6] afite imyaka 23. Yavuze ko afite umushinga wo kurwanya ibyangiza ibidukikije, by’umwihariko ibikoresho bitabora nka ‘Plastiques’.

Nk’umukobwa uturuka mu Karere ka Musanze ahaba imigano, yavuze ko yagerageza guhanga ibikoresho ayifashishije kuko yo itangiza ibidukikije.

Uyu mukobwa yahawe ‘NO’ imwe na ‘YES’ ebyiri, asabwa kunoza neza umushinga we.

Umurerwa Evelyne abaza ikibazo umwe mu bitabiriye ijonjora ry'ibanze rya Miss Rwanda 2022

14:19: Ninziza Brenda [No 5] yatambutse imbere y’akanama nkemurampaka.

Uyu mukobwa yavuze ko aramutse agize amahirwe yo kuba Miss Rwanda 2022 yafasha urubyiruko kwitondera ibishuko bibaganisha ku gutwara inda zitateguwe no kunywa ibiyobyabwenge.

Ni ubukangurambaga uyu mukobwa yavuze ko yakora yifashishije abahanzi ndetse n’inzego zibanze.

Ninziza yahawe ‘YES’ eshatu n’abagize akanama nkemurampaka.

14:15: Nshuti Vanessa [No 4] ni we wa mbere wasubije mu Cyongereza, batatu bamubanjirije bakoresheje Ikinyarwanda.

Nshuti yavuze ko aramutse abaye Miss Rwanda yaharanira kurwanya agahinda gakabije kaba gashobora gutera uburwayi bwo mu mutwe.

Nyuma yo gusobanura umushinga we, abagize Akanama Nkemurampaka bamuhaye ‘YES’ eshatu.

14:10: Umuhoza Élysée [No 3] yavuze ko aramutse abaye Nyampinga yaharanira gukangurira urubyiruko kwihangira imirimo abinyujije ku mbuga nkoranyambaga, cyane ko ari benshi bazikoresha.

Kwihangira imirimo mu rubyiruko asanga ari iturufu ikomeye yatuma rwiteza imbere. Yavuze ko abaye Nyampinga w’u Rwanda, yabera ijwi abafite ubumuga bwo kutavuga no kutumva.

Umuhoza yahawe ‘NO’ eshatu n’abagize akanama nkemurampaka.

Umuhoza Élysée yavuze ko aramutse abaye Nyampinga yaharanira gukangurira urubyiruko kwihangira imirimo
Abagize Akanama Nkemurampaka biteguye guhitamo abakobwa bazahagararira Intara y'Amajyaruguru muri Miss Rwanda 2022

14:03: Uwimbabazi Shakira [No 2] yavuze ko yifuza gufasha urubyiruko kuzamura impano zarwo abinyujije mu ikoranabuhanga.

Ibi akazabishobozwa no gukora urubuga ruzamura impano z’urubyiruko no gushyiraho amarushanwa azamufasha kubigeraho.

Uyu mukobwa yahawe ‘NO’ ebyiri za Umurerwa Evelyne na Mutesi Jolly na ‘Yes’ imwe ya Munyaneza James.

Uwimbabazi Shakira ubwo yanyuraga imbere y'abagize Akanama Nkemurampaka
Ubwo yasubizaga ibibazo ibibazo by'abagize Akanama Nkemurampaka

Uwase Mignone ni we wabimburiye abandi bakobwa kunyura imbere y’Akanama Nkemurampaka

Uwase Mignone [No 1] yarangije amashuri yisumbuye mu Ndimi n’Ubuvanganzo, avuka mu Ntara y’Amajyaruguru.

Uwase yavuze ko impamvu yaje muri iri rushanwa ari uko yifuza kwifashisha Miss Rwanda ngo ashyire mu ngiro umushinga we wo guteza imbere Siporo mu rubyiruko.

Abagize akanama nkemurampaka bibanze mu kumubaza neza akamaro ka siporo, Uwase ababwira ko "ari ingirakamaro kuko ituma umubiri w’umuntu ukora neza".

Uwase Mignone yahawe ’Yes’ eshatu n’abagize akanama nkemurampaka bose.

Uwase Mignone yifuza guteza imbere Siporo mu rubyiruko
Uwase Mignone ni we wanyuze imbere y'Akanama Nkemurampaka bwa mbere
Miss Mutesi Jolly ari mu bagize Akanama Nkemurampaka

13:57: Abakobwa bashaka itike yo guhagararira Amajyaruguru muri Miss Rwanda 2022 batangiye gutambuka imbere y’abagize Akanama Nkemurampaka.

13:52: Abanyamakuru Sam Kalisa na Martina Abera batangije irushanwa rya Miss Rwanda baha ikaze akanama nkemurampaka na buri wese witabiriye iki gikorwa.

Martina Abera na Sam Kalisa ni bo bayoboye iki gikorwa cyo gushakisha abakobwa bazahagararira Amajyaruguru muri Miss Rwanda 2022

13:45: Mu gihe habura iminota mike ngo ijonjora ry’ibanze riri kubera i Musanze ritangire, mu bakobwa bifuza guhatanira itike yo guhagararira Intara y’Amajyaruguru muri Miss Rwanda 2022 hiyongereyeho umwe wari wakererewe, baba 43.

  Andi mafoto y’abagize Akanama Nkemurampaka

Jolly Mutesi wabaye Miss Rwanda 2016 ari mu Kanama Nkemurampaka ka Miss Rwanda 2022
Umunyamakuru Munyaneza James ari mu Kanama Nkemurampaka ka Miss Rwanda 2022
Umunyamakuru Umurerwa Evelyne ari mu bagize Akanama Nkemurampaka

13:29: Abagize akanama nkemurampaka binjiye mu cyumba kigiye kuberamo ijonjora ry’ibanze. Mu minota mike igikorwa cyo gushaka abakobwa bazahagararira Intara y’Amajyaruguru muri Miss Rwanda 2022 kiraba gitangiye.

  Muhe ikaze abagize Akanama Nkemurampaka!

Miss Jolly Mutesi n’abanyamakuru Umurerwa Evelyne wa RBA na Munyaneza James wa The New Times ni bo bagiye kwifashishwa nk’abagize akanama nkemurampaka kazazenguruka intara zose gashakisha abakobwa bazazihagararira muri iri rushanwa.

Uhereye ibumoso: Munyaneza James, Umurerwa Evelyne na Miss Jolly Mutesi ni bo bagize Akanama Nkemurampaka
Abagize Akanama Nkemurampaka bageze kuri La Palme Hotel ahari kubera igikorwa cyo gutoranya abakobwa bazahagararira Intara y'Amajyaruguru muri Miss Rwanda

13:28: Imyiteguro ya nyuma irarimbanyije. Abayobora iri jonjora bageze mu mwanya wabo.

Abanyamakuru ba RBA, Sam Kalisa na Martina Abera ukora kuri Televiziyo ya Kigali Chanel 2 (KC2) ni bo bayobora igikorwa cyo gushakisha abakobwa bahatanira guhagararira Intara y’Amajyaruguru muri Miss Rwanda 2022.

Martina Abera ari mu bayoboye igikorwa cyo gutoranya abakobwa bazahagararira Amajyaruguru muri Miss Rwanda 2022
Sam Kalisa ukorera RBA yafatanyije na Martina Abera kuyobora iki gikorwa

13:25: Umubare w’abakobwa bitabiriye ukomeje kuzamuka! Abagera kuri batanu biyongereye kuri 37 bari bahageze mbere, ubu babaye 42 bari guhatanira guhagararira Intara y’Amajyaruguru muri Miss Rwanda 2022.

  Amafoto y’abakobwa mbere yo gutangira ijonjora

Mu bakobwa 51 biyandikishije guhagararira Intara y’Amajyaruguru, 37 ni bo babashije kugera kuri La Palme Hotel ahari kubera iri rushanwa.

Abakobwa babanje kwitoza gutambuka aha bari kwerekeza mu cyumba kiberamo irushanwa
Abakobwa bujuje ibisabwa bategereje gutambuka imbere y'Akanama Nkemurampaka
Amabwiriza yo kwirinda Covid-19 arimo guhana intera no kwambara agapfukamunwa ari kubahirizwa
Bategereje gutambuka imbere y'Akanama Nkemurampaka

12:30: Abakobwa batangiye kwitoza gutambuka imbere y’abagize Akanama Nkemurampaka. Bari mu myiteguro ya nyuma mbere y’uko ijonjora ry’ibanze ryo guhitamo abahagararira Amajyaruguru ritangira.

  Mu Majyaruguru hiyandikishije abakobwa basaga 50

Abakobwa bitabiriye ijonjora ry’ibanze muri Miss Rwanda babanza kwiyandikisha hifashishijwe ikoranabuhanga.

Ubuyobozi bwa Miss Rwanda bwatangarije IGIHE ko muri uyu mwaka abakobwa basaga 50 ari bo biyandikishije guhagararira Intara y’Amajyaruguru muri iri irushanwa rya 2022.

  Gupimwa COVID-19 no kwikingiza ni ihame

Mbere yo kwinjira mu cyumba kiberamo ijonjora, abitabiriye iki gikorwa babanje kwerekana icyemezo ko bipimishije Covid-19 mu masaha 72 ashize ndetse bakaba ari bazima. Ibi ni nako byagenze ku bakobwa bose bagiye gushaka itike yo guhagararira Intara y’Amajyaruguru.

Usibye kwipimisha, hari no gusuzumwa ko bikingije Covid-19 mu buryo bwuzuye.

Abakobwa bamaze kugera ahari kubera iki gikorwa hari gusuzumwa ko bujuje ibisabwa
Umuganga washyizweho ni we uri gusuzuma niba abitabiriye barikingije ndetse banabanje kwipimisha COVID-19
Iki gikorwa kiri kubera muri Hotel La Palme, imwe mu zikomeye ziri mu Mujyi wa Musanze
Ubwo itsinda ry'abategura Miss Rwanda ryari rigeze aho ijonjora ryabereye mu Majyaruguru

11:30: Ikipe y’abategura Miss Rwanda yari igeze ahari kubera igikorwa hatangira gutunganywa icyumba biberamo.

Irushanwa rya Miss Rwanda rigiye gutangira ku nshuro ya 11 nyuma ya Jenoside yakorewe Abatutsi mu 1994, ahagiye gushakishwa umukobwa uzambikwa ikamba asimbuye Miss Ingabire Grace ufite irya 2021.

Miss Rwanda 2022 izaba ari umwihariko kuko yinjiranye abaterankunga bashya barimo ikinyobwa cya PRIMUS cyengwa n’Uruganda rwa BRALIRWA ndetse n’Ikigo gikora ibijyanye n’imikino y’amahirwe, Forzza Bet.

Bitandukanye n’umwaka ushize aho iri rushanwa ryabaye hifashishijwe ikoranabuhanga kubera ubukana icyorezo cya Covid-19 cyari gifite, kuri iyi nshuro ryongeye kuba abahataniye ikamba bahari.

Mu Karere ka Musanze by’umwihariko haherukaga kubera ijonjora ku wa 28 Ukuboza 2019. Icyo gihe, mu Majyaruguru hiyandikishije abakobwa 75, muri bo 24 bagera aho igikorwa cy’ijonjora cyabereye mu gihe 14 ari bo banyuze imbere y’akanama nkemurampaka gahitamo batandatu bemerewe gukomeza mu kindi cyiciro.

Nyuma ya Jenoside yakorewe Abatutsi mu 1994, ni ubwa 12 iri rushanwa riri kuba, amakamba 10 atangwa muri Miss Rwanda ni yo yegukanywe n’abakobwa baryitabiriye bahagarariye Amajyaruguru.

Aba bakobwa barimo Ange Uwamahoro wegukanye iry’uwabanye neza kurusha abandi mu 2012. Mu 2014, Marlène Umutoniwase yegukanye Ikamba ry’Igisonga cya Kabiri, aba na Nyampinga w’Umuco n’Umurage.

Mu 2021, Isimbi Melissa wari wiyamamarije mu Majyaruguru yambitswe Ikamba ry’Umukobwa wabanye neza n’abandi.

Mu 2015 wari umwaka udasanzwe ku Ntara y’Amajyaruguru yari yegukanye Ikamba ryayo rya mbere ryegukanywe na Miss Kundwa Doriane.

Uretse Ikamba rya Miss Rwanda, Kundwa Doriane yanegukanye iry’umukobwa wari ukunzwe cyane mu irushanwa.

Mu 2016, iyi Ntara nabwo ntabwo yatahiye aho kuko Umuhoza Sharifa wari uyihagarariye yabaye Igisonga cya Kane, anambikwa Ikamba ry’umukobwa wari ukunzwe kurusha abandi.

Ikipe iri gutegura Miss Rwanda 2022 yahagurukiye mu Mujyi wa Kigali ahazwi nko kwa Makuza
Iyi modoka iriho ibirango bya Miss Rwanda, irushanwa ritoranyirizwamo umukobwa uhiga abandi mu bwenge, ubwiza n'umuco mu gihugu
Aha Ikipe itegura Miss Rwanda yari ku musozi mwiza wa Shyorongi yerekeza mu Majyaruguru y'u Rwanda
Miss Rwanda 2022 yatangiriye mu Karere ka Musanze
Imodoka ya Volcano Express ni yo yatwaye abagize ikipe ya Miss Rwanda berekeza i Musanze

Amafoto: Miss Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .