King James yatangiye gufasha umuraperi Zilha yabonyemo impano ikomeye

Yanditswe na Nsengiyumva Emmy
Kuya 19 Ukwakira 2020 saa 10:28
Yasuwe :
0 0

Ruhumuriza James wamenyekanye mu muziki nka King James yatangiye gufasha umuraperi ukizamuka Zilha yabonyemo impano ikomeye.

Uyu muhanzi usanzwe akunda injyana ya Hip Hop nubwo atari yo akora, yatunguwe bikomeye no kubona impano y’uyu musore icyakora wari utarazamura izina rye mu muziki nyarwanda.

Amakuru ava mu bantu bari hafi ya King James ni uko akimwumva, yahise yiyemeza kumufasha.

King James ngo yanyuzwe bikomeye n’ubuhanga bwe, ababazwa n’uko abantu batamuzi ndetse n’umuziki akora hari uburyo utari ku rwego rwiza kubera amikoro.

Mu gufasha uyu musore, King James yahereye ku mushinga w’indirimbo “Zararyoshye” yasubiwemo ikorwa neza ndetse inakorerwa amashusho meza.

Si iyi ndirimbo gusa yamufashije, Zilha ageze kure umushinga wa Album ye ya kabiri ari nayo ya mbere azaba akoze kuva atangiye gufashwa na King James.

King James mu kiganiro na IGIHE, yagize ati ”Njye uyu musore namubonyemo impano numva namushyigikira uko nshoboye. Si umuhanzi ngiye gukorera ‘management’ ahubwo nzamufasha uko nzashobozwa. Afite impano kandi nibaza ko abanyarwanda bazishimira ubuhanga bwe mu muziki.”

Zilha agiye kuba umuhanzi wa kabiri King James afashije mu buryo buzwi, cyane ko ari nawe warambitse ibiganza ku rugendo rwa Yverry mu muziki.

Uyu muraperi mushya ugiye gushyigikirwa na King James ubusanzwe yitwa Kavugwa Ismael, yavukiye i Nyarugenge tariki 6 Mutarama 1993.

Ni umwana wa gatanu muri barindwi bavukana, amashuri yisumbuye yayasoreje muri APACE, ikigo giherereye mu Mujyi wa Kigali.

Zilha yavuze ko yishimiye kuba King James yaramubonamo ubushobozi, ati ”Ndi umuhanzi ukizamuka, sinakubeshya byarantunguye kumva ko icyamamare nka King James yaba yaranyuzwe n’umuziki wanjye. Nibaza ko nanshyigikira nta kabuza impano yanjye izagaragarira Abanyarwanda.”

Indirimbo "Zararyoshye" Zilha yayisubiyemo nyuma yo gutangira gufashwa na King James

Mu minsi mike, Zilha aratangiye gushyira indirimbo ze nshya yakoze afashijwe na King James
Zilha avuga ko gukorana bya hafi na King James bizamurika impano ye byoroshye
Zilha yishimiye kuba King James yariyemeje kumufasha
King James ni umwe mu bahanzi bakomeye muri muzika nyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .